Pacquiao-Mcgregor fight posibleng mangyari sa 2021

ni Gerard Peter - @Sports | November 26, 2020

Makapaghihintay naman umano ang pagtatagpong inaabangan ng karamihan – ang salpukan ng nag-iisang eight-division World champion Manny “Pacman” Pacquiao at UFC two-division titlist Conor “The Notorious” McGregor sa darating na taon – ngunit kinakailangan munang harapin ng Irish bad-boy si lightweight contender Dustin Poirier sa UFC 257 sa Enero 23 sa Fight Island sa Abu Dhabi sa United Arab Emirates.

Naniniwala si Paradigm Sports Management Audie Attar na parehong kagustuhan nina Pacquiao (62-7-2, 39KOs) at McGregor (0-1 boxing; 22-4 MMA) ang magtapat sa ibabaw ng ring. Alam na alam umano ito Attar dahil parehong kliyente niya ang dalawang fighters.

“He’s gonna be handling business against Dustin first, but Conor’s come out and said he wants to fight Manny. Manny’s come out and said he wants to fight Conor. As I’ve stated publicly before, we’ve had conversations,” wika ni Attar sa panayam sa kanya ng Bloomberg. “That is a fight that we’re definitely going to make because both fighters want it, and there seems to be interest from the fans all around the world.”

Haharapin muna ng 32-anyos mula Crumlin, Dublin, Ireland ang dating interim UFC lightweight titlist para sa kanilang rematch na kanyang unang beses na tinalo noong Setyembre 27, 2014 sa UFC 178 sa pamamagitan ng 1st round TKO.

Minsan nang lumaban si McGregor sa isang boxing match laban kay Floyd “Money” Mayweather noong Agosto 26, 2017 sa T-Mobile Arena sa Las Vegas, Nevada, kung saan tinalo siya ng 43-anyos na undefeated-retired boxer sa bisa ng 10th round TKO. Nagresulta ito sa malaking kita na itinalaga bilang ikalawang pinakamataas na pay-per-view sa kasaysayan kasunod ng salpukang Mayweather-Pacquiao fight noong Mayo 2015.

Huling beses natagpuan sa isang laban si McGregor noong Enero 18, 2020 sa 40-second knockout victory kay Donald “Cowboy” Cerrone sa UFC 246, sabay inanunsiyo ang kanyang muling pagreretiro nitong Hunyo 6 sa kanyang social media account.

Sa panig naman ni Pacquiao, huling beses itong lumaban kay Keith “One Time” para kunin ang World Boxing Association (WBA) welterweight title sa isang ‘split decision’ noon Hulyo 18, 2019 sa MGM Grand Garden Arena sa Las Vegas, Nevada.

E-Sports, may tsansa at ibinilang sa Vietnam SEAG

ni Gerard Peter - @Sports | November 24, 2020

Kasunod ng muling pagkakabilang ng bagong sports ng kabataan na Electronic Sports (E-Sports) sa ikalawang sunod na pagkakataon sa darating na 31st Southeast Asian Games sa Hanoi, Vietnam simula Nobyembre 21-Disyembre 2, makaka-asa ang Pilipinas na pipilitin ng bubuuing national team na maipagtanggol ang kampeonato sa susunod na edisyon.

Lubos ang kaligayahang nararamdaman ng pamunuan ng Philippine Electronic Sports Organization (PESO) sa pagbibigay ng basbas sa kanilang pampalakasan na maisama sa listahan ng 40 sports sa Vietnam Games. Hindi nabigo ang kanilang grupo na muling makabalik sa biennial meet matapos mag-debut noong 2019 SEAG sa bansa, kung saan nakopo nito ang 3 gold at tig-isang silver at bronze medals para makamit ang overall title.

Nitong nagdaang linggo sa ginanap na Southeast Asian Games Federation (SEAGF) Council meeting sa pamamagitan ng online virtual ay pormal ng nakasama ang E-Sports, kabilang ang Triathlon, Tenpin Bowling at Jiujitsu sa 36 sports iba pa, habang pag-uusapan pa kung maisasama ang Indoor Hockey at Water Polo sa Vietnam meet.

Aminado si PESO interim secretary-general Joebert Yu na malaking tulong ang ginawa ng counterpart nilang Vietnam Recreational and Electronic Sports Association (VIRESA) para kumbinsihin ang Vietnam Organizing Committee, katulong ang pagsang-ayon ng 10 miyembrong bansa para muling maibalik ang E-Sports sa regional multi-sport event.

“On behalf of PESO, we would like to thank the Vietnam SEA Games Organizing Committee and the whole SEAGF members for deciding to include electronic sports as one of the official (40) forty sports that will be competed at the 31st Southeast Asian (SEA) Games hosted by Vietnam next year on November 21 to December 2,” pahayag ni Yu sa panayam ng Bulgar sa online interview. “With PESO, together with the guidance of the Philippine Olympic Committee (POC), we will make sure that the Philippines will field in the best possible players / teams that will compete against other SEA nations and help defend its overall SEA Games championship,” dagdag ni Yu, na siya ring pinuno ng E-Sports National Association of the Philippines (ESNAP).

Marcial: No pain, no gain sa U.S. para sa asam na gold sa Olympics

ni Gerard Peter - @Sports | November 20, 2020

'Ika nga ng isang kasabihan, walang hirap, walang sarap – ito ang tila pinagdaraanan ngayon ni 2021 Tokyo Olympics-bound Eumir Felix Marcial sa kanyang ginagawang pagsasanay sa ilalim ni legendary Hall of Fame coach Freddie Roach sa Wild Card Gym sa Los Angeles, California sa U.S. upang matupad ang pinapangarap na mailap na gold medal ng Pilipinas sa Olympics.

Bukod sa sakit ng katawan na tinatanggap sa paghahanda para sa Summer Games at posibleng unang professional fight sa Disyembre, dama rin ng 25-anyos mula Lunzuran, Zamboanga City ang bigat ng kalooban sa pagpanaw ng kanyang nakatatandang kapatid na si Eliver.

“Masakit man na di ko siya makita kahit na sa huling pagkakataon, mas pinili ko pa rin na magstay ako dito at matuloy-tuloy ko yung ensayo ko. Alam ko yung kapatid ko mas masaya sa akin dahil pangarap din niyang manalo ako ng Gold sa Olympics, mag-World champion ako. Mas pinili ko yung bugbugan sa training hanggang sa Olympics, mga sakripisyo na kailangan gawin ngayon,” pahayag ni Marcial, kahapon ng umaga, sa lingguhang TOPS: Usapang Sports na live hatid ng PSC, GAB at Pagcor na napanood sa Sports on Air. “Sobra talaga sakit ng katawan ko sa training dito, kase nung unang pagdating ko dito, halos mamatay-matay ako sa training nila eh, parang pagtapos ng training ang sakit ng katawan ko, tapos derecho na tulog ko. Sa tuwing gigising ako nagrequest akong magpamassage kase sobrang sakit ng katawan ko,” dagdag nito.

Lumipad patungong Los Angeles ang 2019 World Amateur silver medalist noong nakalipas na buwan upang harapin ang matinding pagsasanay kina Hall of Fame coach Freddie Roach, strength and conditioning coach Justin Fortune at Filipino protégé trainer Marvin Somodio, bilang tulong ng MP Promotions nina president Sean Gibbons at eight-division World Champion Manny “Pacman” Pacquiao sa kanyang paghahanda para sa Summer Games sa susunod na taon na nakatakda simula Hulyo 23-Agosto 8 sa Tokyo, Japan.

Nilinaw ng 3-time Southeast Asian Games gold medalist na patuloy na nakatuon ang atensyon nito, kabilang ang kanilang kampo sa Olympiad. Bagkus, ay sinabi nitong sinusunod pa rin niya ang mga amateur program na ipinapadala ni men’s boxing head coach Ronald Chavez, gayundin ang tuloy-tuloy na tulong ng Association of Boxing Alliances in the Philippines (ABAP) sa kanilang pamilya. Gayunman, humingi pa rin ito ng karagdagang suporta sa Philippine Sports Commission (PSC) sa kanyang mga gastusin at pangangailangan sa kanyang page-ensayo.

“Nakikiusap naman si sir Sean sa mga gastusin at pambayad kay coach Freddie, alam naman natin na Hall of Famer yun, kaya pang-Hall of Famer din ang bayad sa kanya,” pangiting wika ni Marcial. “Sana suportahan nila ako. Nag-pro ako still Olympics pa rin ang preparation ko. Yun lang nilalagay ko sa isip. Hinihiling ko sa gusto mag-support. Kung ano yung maibabalik ko sa Olympics,” paliwanag ni Marcial.

Ayon naman umano kay PSC executive director Atty. Guillermo Iroy, nasa proseso na umano ang pagsasa-ayos ng pondo para kay Marcial at magbabase sila ng kanilang tulong sa kontrata nito sa MP promotions.

“Next week may Board Meeting, last Board positive naman. The Board need only to have the proper endorsement by ABAP and humingi ang Board ng copy ng contract of Marcial to determine the extent of support of PSC to avoid technicality,” eksplika ni Iroy sa panayam ng Bulgar sa online interview. “We have a procedure already in place, so we will ensure govt compliance.”

Siniguro ng 2020 Asia & Oceania Boxing Olympic Qualifying gold medalist na paghuhusayan niya ang kanyang preparasyon upang matulungan ang bansa na matuldukan na ang pagkagutom sa gintong medalya sa quadrennial meet. “Yung chance natin sobrang laki kase nagte-training tayo ng maayos. Lahat naman malaki ang chance. Ang hirap lang talaga makuha yung gold sa Olympics pero gagawin ko yung best ko sa training ko sa Olympics,” saad ni Marcial na tiyak na mapapalaban ng todo sa mga World class amateur boxers gaya nina World No.1 Gleb Bakashi ng Russia, 2016 Rio Olympics middleweight champion Arlen Lopez ng Cuba; ang tinalo nito sa semifinals ng 2019 World na si Tursynbay Kulakhmet ng Kazakhstan; Herbert Da Conceicao Sousa ng Brazil, Rio silver winner Bektemir Melikuziev ng Uzbekistan, Salvatorre Cavallaro ng Italy at 2020 OQT silver medalist Abilkhan Amankul ng Kazakhstan.