Thirdy Ravena, sapol ng Coronavirus sa Japan

ni Gerard Peter - @Sports | November 29, 2020

Hindi rin nakaiwas sa hagupit ng novel coronavirus disease (Covid-19) si dating 3-time UAAP champion mula Ateneo de Manila at kasalukuyang Japan B-League player Thirdy Ravena matapos magpositibo nang makaranas ng ilang sintomas ng mapaminsalang sakit.

Inihayag ng koponan nitong San-En Neo Phoenix sa social media account na dinapuan ang 23-anyos 3-time Finals MVP ng Covid-19 kasunod makaranas ng sore throat, panghihina at temperaturang umabot sa 38.2 degrees. Kinumpirma sa test nito mula sa isang medical institution sa Toyohashi ang pagkakaroon ng naturang karamdaman. Habang patuloy na nagpapagaling sa kanyang apartment.

“On the morning of November 26th (Thursday), he reported that he was in poor physical condition, and when the temperature was measured, a fever of 38.2°C was confirmed,” ayon sa statement ng San-En. “He reported to the Toyohashi City Health Center and at a designated medical institution under the direction of the Health Center.”

Pinawi naman ng shooting guard, na nakababatang kapatid ni NLEX road warrior point gurad Kiefer Ravena, ang pag-aalala ng mga malapit sa kanya, gayundin ang mga tagasubaybay at tagahanga nito na nasa maayos na kondisyon na ito at patuloy na nagpapagaling at nagpapalakas sa kanyang apartment habang sumusunod sa health at safety protocols.

“All good over here. Appreciate all the love and concern over the past 24 hours. I feel well already but have to follow quarantine protocols indefinitely,” pahayag ni Ravena sa kanyang twitter account.

Patuloy itong nagpa-alala sa lahat na huwag balewalain ang lupit ng naturang sakit at kinakailangang mag-ingat dahil nasa paligid lamang ang virus. “Just a reminder that the virus is still out there so let’s not take it for granted. Stay safe everyone! Much love,” ika nito.

Kasalukuyang kumakamada si Ravena sa San-En ng 12.0 points sa 36% shooting, kabilang ang 4.8 rebounds at 1.4 assists sa kabuuang 23.7 minuto ng paglalaro sapol ng unang beses itong maglaro sa koponan noong buwan ng Nobyembre. Gayunman, nahihirapan ang kanyang koponan na makaangat sa team standings sa kartadang 2-13 sa dulo ng B-League 2020-21 season.

9 na players at MVP Jackson, ng NFL, positive sa COVID-19

ni Gerard Peter - @Sports | November 28, 2020

Umabot na sa siyam na manlalaro mula sa koponan ng National Football League (NFL) na Baltimore Ravens, ang nagpositibo sa mapanganib na novel coronavirus disease (Covid-19), kabilang na si 2019 MVP quarterback Lamar Jackson, dahilan upang iurong ang pakikipagharap nito sa undefeated na Pittsburgh Steelers sa darating na linggo.

Ang 23-anyos mula Pompano Beach, Florida ang pinakabagong NFL superstar na tinamaan ng mapaminsalang karamdaman na lumikha ng malaking outbreak sa NFL. Ang 2018 32nd pick ang ika-apat na manlalaro ng Ravens na nahawahan ng Covid sa nakalipas na buong linggo, kung saan nauna nang nagpositibo sa naturang sakit sina running backs Mark Ingram at J.K. Dobbins, gayundin si defensive tackle Brandon Williams.

“Praying for my brother [Lamar Jackson] and every player, staff member and their families dealing with COVID-19,” wika ni quarterback backup Robert Griffin III sa kanyang tweet nitong Huwebes. “Ensuring the safety of the entire organization is important. Handling this outbreak within the team is bigger than football.”

Bago pa ang pagkakaroon ng apat na atleta, mayroon ng iba pang mga miyembro ang tinamaan ng Covid sa kanilang organisasyon na patuloy na naka-self-isolate at naka-contact tracing matapos matanggap ng ibang mga manlalaro ang resulta. Ang iba pang mga players ay sina Calais Campbell (Defense), Pernell McPhee (OLB), Trace McSorley (QB), Patrick Mekari (C), at Matt Skura (OLM).

Ayon umano sa source, nakuha ni Jackson ang naturang sakit laban sa Tennessee Titans sa M&T Bank Stadium na nagresulta sa 24-30 pagkatalo sa overtime, na nakitaan naman ng pagka-positibo nito lamang Huwebes. Ilalagay ang mga naturang Covid-19 victims sa reserve lists na naglagay sa kanilang koponan sa ika-limang sunod na araw na may nagpositibo.

Makakatapat ni WBO middle champ Andrade, nadale ng COVID-19

ni Gerard Peter - @Sports | November 26, 2020

Naiwang walang kalaban si World Boxing Organization (WBO) middleweight champion Demetrius ‘Boo Boo’ Andrade matapos magpositibo sa novel coronavirus disease (Covid-19) si Dusty Hernandez-Harrison para sa undercard non-title match sa Nobyembre 27, Biyernes, sa DAZN live show sa Seminole Hard Rock Hotel & Casino sa Hollywood, Florida.

Napuwersang tanggalin ang tapatan ng undefeated champ na si Andrade (29-0, 18KOs) at wala ring talong American-Puerto Rican na si Hernandez-Harrison (34-0-1, 20KOs) matapos mahawa ang huli mula sa ulat ng beteranong manunulat na si Chris Mannix.

“Dusty Hernandez-Harrison has contracted Covid-19 and is out of the scheduled fight against Booboo Andrade next weekend, per sources. Andrade is off the card – will likely go straight into a fight with Liam Williams of Billy Joe Saunders next year,” pahayag ni Mannix sa kanyang twitter account.

Magpapatuloy naman ang iba pang mga laban kung saan pangungunahan ito ng super middleweight bout sa pagitan nina dating IBF at WBA (regular) middleweight titlist Daniel “The Golden Child” Jacobs (36-3, 30KOs) at veteran boxer Gabriel “King” Rosado (25-12-1, 14KOs).

Plano sana ng kampo ni Andrade na magkaroon ito ng isa pang laban bago muling idepensa ang kanyang titulo sa susunod na taon sa mapipili kina knockout artists Williams (23-2-1, 18KOs) o undefeated na si Saunders (29-0, 14KOs), matapos ang matagumpay na 3rd title defense kay Luke Keeler (17-3-1, 5KO) ng Ireland na nagtapos sa 9th round TKO victory.

Pawang mga knockout naman ang mga nakalipas na apat na panalo ng 26-anyos na si Hernandez-Harrison, kung saan galing ito sa 2nd round KO victory noong Pebrero 8, 2020 laban kay Les Sherrington ng Australia bago ito tamaan ng mapanganib na sakit.