Mabigat ang parusa sa NBA teams na lalabag sa COVID-19 protocols

ni Gerard Peter - @Sports | December 8, 2020

Bunga ng pagkakaroon ng COVID-19 outbreak sa NBA, papatawan ng malalaking parusa ang mga koponan sa liga sakaling lumabag ang mga ito sa itinalagang mga panuntunan upang mabawasan ang pagkalat ng mapaminsalang novel coronavirus disease.

Inihayag ng pamunuan ng liga at ng National Basketball Players Association (NBPA) na tatalakayin ang mga usaping ito sa mga manlalaro, coaches at ibang staff na hihilingan nilang mahigpit na ipag-utos ang pagtanggap ng coronavirus vaccine sa mga manlalaro sakaling dumating na ito, habang mariing hinimok ang mga koponan na obligahin ang mga manlalaro at staff nito na tumanggap ng flu-shots na agarang inaatasan ang lahat ng players, coaches at staff na iwasan ang bars, lounges, clubs, maging ang mga kainan, higit na ang mga live entertainment o gaming venues, public gyms, spas at pool areas. Hihigpitan din sa mga indoor activities na may 15 katao pataas.

Ang mga patakarang ito ay tumutukoy kapag ang koponan ay nasa home-and-away matches, at ang sino mang lumabag dito ay maaaring pagmultahin, suspendihin, ma-forfeit ang mga laro o magkaroon ng adjustments o mawalan ng draft picks. Sisimulan ang mga pre-season games sa Biyernes, habang opisyal na magbubukas ang regular season sa Dis. 22 sa U.S. time.

Ibinigay na ang mga guidelines at protocols na may dapat sundin hinggil sa pagkakaroon ng distansya sa mga upuan sa mga eroplano at buses na pinagkasunduan ng NBA at NBPA. “The biggest thing is obviously, from what we've been told, is the testing on the daily,” wika ni Philadelphia forward Tobias Harris hinggil sa protocols na pinapanalisa sa panayam ng Associated Press. “And guys holding each other accountable to be safe and limit exposure from outside people or whatever. For me, it's a bit confusing because you never know. You could go into a grocery store and you may get the virus somehow, right? So, I think it's a fine line, but I think we have to do our best to follow protocol, keep each other safe, keep the team safe and just see how it plays out.”

Noong nagdaang linggo ay 48 manlalaro ang nagpositibo sa coronavirus bago pa lamang simulan ang training camp. Bibigyan din ng pagkakataon ang mga kapamilya ng players, coaches at staff na magpakuha ng PCR testing sa testing provider nitong BioReference at magpakuha ng flu shots.“We're just trying to follow the guidelines, do it as best we can,” saad ni Golden State coach Steve Kerr. “It's not easy, but everybody's got to go through it. We're just trying to navigate our way through it.”

Isang slot sa Asian Qualifying pipiliting kunin ng Dragonboat

ni Gerard Peter - @Sports | December 4, 2020

Butas ng karayom muna ang susuutin ng koponan ng Canoe team Olympic Qualifying Tournament, ngunit determinado pa rin ang mga ito na makakuha ng nag-iisang slot na ibinibigay para sa darating na Asian Qualifying na nakatakda sa Marso 11-13 sa Pattaya, Thailand.

Inihayag ni Philippine Canoe-Kayak-Dragonboat Federation (PCKDF) head coach Leonora “Len” Escollante na patuloy pa rin ang paghahanda at pagsasanay ng dalawang atletang nila sasabak para sa qualifying tournament na sina 2019 Southeast Asian Games gold at double silver medalist Hermie Macaranas at ka-tandem nitong si Ojay Fuentes para sa 1000-meters canoe doubles.

“Puspusan pa rin naman ang ating ginagawang mga pagsasanay at programa sa ating mga athletes, kaso lang hindi lang sila maka-paddle sa ngayon dahil sa mga protocols. Ang mahalaga sumunod sila sa programs na pinapadala natin sa mga athletes natin sa probinsya na nache-check naman sa paggamit ng mga series of tests para malaman kung nagte-training talaga sila,” pahayag ni Escollante, kahapon sa lingguhang TOPS: Usapang Sports na live na mapapanood sa Sports on Air sa Facebook page at suportado ng Philippine Sports Commission (PSC), Games and Amusement Board (GAB) at PAGCOR. “Pero inaasahan na namin na talagang dadaan ka sa butas ng karayom bago ka makapag-qualify dito, lalo na’t 1km long distance talaga,” dagdag ng Tacloban City-native.

Mabigat na makakatapat ng Pilipinas para sa qualifying ay ang powerhouse na China, Iran at Kazakhstan, gayundin ang mga koponan mula sa Tajikistan, Kyrgistan, at Uzbekistan dahil tiyak na malalaki at matatangkad ang mga manlalaro nito na paniguradong malalakas sa long distance events.

“Mahirap pa na mag-predict sa ngayon dahil kadarating lang ng invitation and sa nangyaring pandemic all over the world. Maging yung mga makakalaban naman natin naapektuhan rin, kaya hindi natin masabi pa ngayon ang tsansa ng mga athletes natin pero panigurado lalaban ang ,ga iyan,” saad ni Escollante.

Hindi nakalahok ang koponan ng Pilipinas sa nagdaang World 2019 ICF Canoe Sprint World Championshsips noong Agosto 21-25, 2019 sa Szeged, Hungary na mayroon ng 10 nagkwalipika na kinabibilangan ng China, Cuba, Brazil, Germany, Romania, Poland, Russia, Ukraine, Czech Republic at Sao Tome and Principe. Tig-iisang slot na lamang ang inilalaan para sa Asian, Europe at Americas.

Sambo World Cup, bawal ang fans sa December meet dahil sa COVID-19

ni Gerard Peter - @Sports | December 3, 2020

Mananatiling bakante para sa mga manonood at mga tagasubaybay ng larong Sambo ang gaganaping World Cup: A. Kharlampiev Memorial sa Disyembre 18-19 sa Luzhniki Sports Complex sa Moscow, Russia, bilang pag-iingat sa patuloy na paglaganap ng mapaminsalang novel coronavirus disease (Covid-19) pandemic.

Inaasahang aabot sa mahigit 300 sambo wrestlers at iba’t ibang representante ng national sports federations ang nagsimula ng magparehistro upang lumahok sa prestihiyosong event na dadaluhan ng 15 bansa sa buong mundo.

Ipinangalan ang naturang torneo sa isa sa mga founder ng sambo sa Soviet Union na si Anatoly Kharlampiev, isang Russian researcher ng iba’t ibang klase ng wrestling at martial arts. “In view of the difficult epidemiological situation in the country and in line with recommendations of [Russia’s sanitary watchdog] Rospotrebnadzor a decision was made to hold the tournament without spectators in attendance,” pahayag ng organizing committee sa inilabas na statement nito.

Ayon kay Pilipinas Sambo Federation (PSF) secretary-general Paolo Tancontian, pag-aaralan pa nila kung magpapadala sila ng mga atleta sa naturang kompetisyon, higit na si 5-time World bronze medalist at 2019 Asian Sambo champion Sydney Sy Tancontian, na kakapanalo pa lang ng tansong medalya sa Sambo World Championships senior’s division noong nakaraang buwan.

Kakulangan ng oras sa preparasyon at pondo ang tinukoy na dahilan ni Tancontian, na inaaasahang mabigat umano sa bulsa ang pamasahe patungong Russia. “Medyo mahal kase ang pamasahe papuntang Russia, isa pa pandemic ngayon at medyo wala masyadong preparation ang ating mga athletes, also less budget tayo ngayon. Wala pang budget ang Philippine Sports Commission (PSC) para sa ganyang mga competition,” pahayag ni Tancontian sa panayam ng Bulgar sa online interview.

Sinabi ni Tancontian na paghahandaan na lamang nila ang darating na Asian Indoor Martial Arts Games (AIMAG) sa susunod na taon sa Bangkok at Chonburi sa Thailand. Pina-finalized pa nila ang listahan ng bagong line up sa national team.“We are still preparing our new lists of athletes. Medyo na-delay na kase because of pandemic, kaya di kami nagkakaroon ng selection, but we’ve got 8 new players, panay babae in preparation sa AIMAG,” saad ni Tancontian.