Bawal pa rin ang mga torneo at kompetisyon sa MM at GCQ areas

ni Gerard Peter - @Sports | December 17, 2020

Posible pa ring hindi papayagang makapagdaos ng anumang uri ng sports sa Metro Manila o mga lugar na sakop ng General Community Quarantine (GCQ) sa 2021.

Kasunod ito ng plano ng bagong professional league na Premier Volleyball League (PVL) na magbubukas sa unang quarter ng taon sa loob ng NCR, na saka-sakaling mapasailalim pa rin ng GCQ ang kalakhang Maynila, kinakailangang gawin ang anumang torneo o kompetisyon sa mga lugar na sakop lamang ng Modified General Community Quarantine (MGCQ) tulad ng Laguna, Bulacan o Angeles City sa Pampanga, kung saan idinaos ang matagumpay na PBA Bubble sa Angeles University Foundation (AUF).

“Initially kase they wanted to play in Manila. We informed them that its still GCQ, and its not going to happen. I know Sir Ricky (Palou) is very innovative. We don’t want to rock the boat, kase kapag pinayagan 'yan lahat na ng leagues papayagan na,” wika ni GAB chairman Abraham 'Baham' Mitra, Martes ng umaga sa lingguhang PSA Forum webcast.

“I don’t want to go ahead of the IATF (Inter-Agency Task Force), but I liked to say that, but I guess we will not allowing any professional sports competitions, tournaments, upon instructions of the IATF within GCQ areas, which is the Metro Manila, So if they want they can go to Laguna, go to Bulacan, or Angeles (Pampanga),” dagdag ni Mitra.

Pinaalalahanan ng 50-anyos na tubong Palawan na marapat lamang na patuloy na mag-ingat ang lahat ng stakeholders nito upang maiwasan ang hindi inaasahang hawahan sa sports, partikular na sa professional sports.“Mahirap na. we don’t want a second wave and we don’t want the sports to be the cause of this (Covid), specially sa professional sports,” esplika ni Mitra.

Aminado siya na hindi prayoridad ang kanilang ahensya ng pamahalaan dahil nakatuon una ang atensyon ng bansa sa ibang mga sektor, pangunahin ang mga lumalaban sa naturang sakit o mga frontliners, gayundin ang mahihirap na kababayan.

Inilahad din ng kalihim na iaangat na ang bilang ng mga partisipante sa isang palaro o ang mga tao sa loob ng isinasagawang sports event sa 2021 ngunit nilinaw nitong mananatili pa ring sarado sa manonood at tagahanga ang mga palaro. Patuloy na nakikipag-ugnayang mabuti ang kanilang ahensya sa Department of Health, Department of Social Welfare and Development at sa Philippine Sports Commission hinggil sa mga mga karagdagang panuntunan.

Aniya, maraming events na maaring buksan sa 2021, kabilang anginternational MMA sa 2nd quarter, bagong professional basketball league, beach volleyball at pingpong (table tennis). “Looking for 2021 as banner year. May gigil at pananabik. Aangat tayo sa 2021.”

Garcia, lubayan na ang paghamon kay Pacquiao

ni Gerard Peter - @Sports | December 16, 2020

Pinayuhan ni veteran boxing trainer Robert Garcia ang kapatid nitong si four-division World champion Mikey Garcia na simulan ng maghanap ng ibang makakalaban at tuluyan ng lubayan ang paghahabol kay Filipino boxing icon Manny “Pacman” Pacquiao dahil tila walang patutunguhan ang pag-aasam nito.

“It’s a possibility that he could be wasting his time because honestly Pacquiao is also turning 42 [this] month,” pahayag ni Garcia sa panayam ng PBC Podcast. “So Pacquiao may just consider getting easier fights against MMA/UFC guys, like they’ve talked about with (Floyd) Mayweather did and make just tons of money and not take any chances. You never know what Pacquiao might do. If it doesn’t happen, Mikey has to think of something else. We have to plan other stuff.”

Hindi lingid sa lahat ang pursigidong kagustuhan na hamunin ni Mikey Garcia (40-1, 30KOs) ang Pambansang Kamao, kung saan kabilang ito sa mga napipisil na makakalaban ni Pacman, ngunit dahil sa pag-usbong ng mapaminsalang novel coronavirus disease (Covid-19) pandemic sa buong mundo ngayong taon, tila lumabo na ang tsansa ng pakikipag-ugnayan ng dating lightweight champion.

Inihayag ni Robert Garcia na walang anumang indikasyon na may patutunguhan pa ang negosasyon sa laban kay Pacquiao (62-7, 39KOs) o anumang malalaking laban na kahalintulad ng sa Filipino boxing legend.

“If the pandemic continues the way it is and they start shutting down everything down again we might have to do something smaller (fight) than big,” saad ng nakatatandang kapatid na Garcia. “As of right now, there’s nothing really. There’s nothing lined up. There’s not even any talk (about any other fight). Pacquiao, that’s the only one­…we haven’t really heard much.”

Nagtataka lang umano ang matandang Garcia kung bakit ayaw munang kumuha pansamantala ng mga tune up matches ng kapatid, gayundin ang kaharapin ang iba pang world champions. Huling lumaban ang 32-anyos na American boxer noong Pebrero 29 laban kay Jessie Vargas na nagresulta sa unanimous decision victory sa Ford Center sa The Star Frisco, Texas sa Estados Unidos.

Hinabilinan na lamang nito na mas makabubuting bumaba na lamang ito ng 140-pound division o light-welterweight, dahil naniniwala itong maaari niyang simulan ang kanyang karera sa naturang weight division.

Bubble Olympic training camp, aprub na sa IATF

ni Gerard Peter - @Sports | December 16, 2020

Binigyan nang basbas ng Inter-Agency Task Force on Emerging Infectious Disease (IATF-EID) ang kahilingan ng Philippine Olympic Committee (POC) na magsagawa ng ‘bubble-type training’ camp ang mga bumubuo ng national team na sasalang para sa mga darating na Olympics sa susunod na taon.

Inihayag ni Presidential Spokesperson Harry Roque, Martes ng umaga sa press briefing, ang resolusyon bilang 88 na nagbibigay karapatan sa mga miyembro ng pambansang koponan na magpatuloy sa kanilang gagawing pagsasanay sa ilalim ng sinasabing ‘Bubble’ camp, kung saan planong ilagay ang tatlong koponan mula sa Boxing, Karate at Taekwondo sa Inspire Sports Academy sa Calamba, Laguna sa unang linggo ng Enero.

“The request of the POC to resume the training of national athletes vying for the Tokyo Olympics in a ‘bubble-type’ setting is approved,” ayon sa lumabas na rekomendasyon ng IATF mula sa anunsyo ng Presidential Communications.

Kinakailangan umanong masusing makipag-ugnayan at maipaalam sa mga regional task force at local government unit ng mga pagdarausang ‘bubble training camp.’ Gayunpaman, hindi naging malinaw sa pahayag ni Roque kung tinutukoy nito ang mga Olympic hopefuls na naghahanda para sa pagsasanay sa darating na mga qualifying tourneys, gayundin ang mga sasabak para sa Asian Indoor Martial Arts Games (AIMAG), at 31st Southeast Asian Games sa Hanoi, Vietnam simula Nobyembre 20-Disyembre 2, 2021.

Noong nakaraang linggo ay inilabas ni Philippine Sports Commission (PSC) chairman William “Butch” Ramirez ang mga kakailanganing health at safety protocols upang payagan ang mga national athletes at coaches na magsimula ng mga aktuwal na pagsasanay. Idinagdag nitong magiging mahigpit sila sa pagpapatupad ng mga alituntuning inilabas para sa kaligtasan at kapakanan ng pambansang koponan.

Sinabi rin ng 70-anyos na sports official na mas magiging mahigpit ang kanilang ipatutupad na kautusan kung ikukumpara sa matagumpay na pagtatapos ng PBA Bubble sa Angeles City at Quest Hotel sa Clark sa Pampanga.

Matatandaang ipinatigil lahat ng ahensiya ng pampalakasan ang aktuwal na preparasyon at pagsasanay ng lahat ng bumubuo sa national team nitong Marso, gayundin ang lahat ng torneo kabilang ang 10th ASEAN Paragames, Philippine National Games, National Sports Summit, Batang Pinoy, UAAP, NCAA at iba pang mga pa-torneo ng national sports associations (NSAs), sapol ng pumutok ang Covid-19 pandemic sa buong mundo.

Kasalukuyang may apat na national atheletes ang pasok na sa 2021 Tokyo Olympics na binubuo nina pole vaulter Ernest Obiena, gymnast Caloy Yulo at boxers Eumir Felix Marcial at Irish Magno. Sina Obiena, Yulo at Marcial ay nagsasanay sa ibang bansa, partikular na sa Italya, Japan at U.S. ayon sa pagkakasunod, habang nasa bayan niya sa Iloilo ang women’s flyweight na si Magno.