Gaballo, target ang Interim WBC bantam title vs. Ex-champ Rodriguez

ni Gerard Peter - @Sports | December 20, 2020

Sisimulan ng tahakin ni Filipino undefeated at Sanman promotions boxer Reymart “Assassin” Gaballo ang isang daan patungo sa lehitimong title shot sa pakikidigma laban kay dating IBF bantamweight titlist Emmanuel “El Matador” Rodriguez ng Puerto Rico sa main event ng Showtime Boxing Championship at Premier Boxing Champions, sabado ng gabi (linggo ng umaga sa Pilipinas) sa Mohegan Sun Arena sa Uncasville, Connecticut sa Estados Unidos.

Tangan ang malinis na kartada sa 23-0 at pambihirang 20 panalo mula sa knockouts, masususbukan ang lakas ng kamao ni Gaballo, na nagpatumba sa 15-sa-16 na nakalipas na laban sapol noong 2015, sa dating 2010 Youth Olympic Games gold medalist na may kakayanan ring magpabagsak ng kalaban sa rekord na 19-1 win-loss card at 12 knockouts.

Kabilang rin sa fight card ang salpukan nina Jaron “Boots” Ennis laban kay Chris Van Heerden sa 12-round co-main event para sa bakanteng IBO welterweight title at bakbakan nina Antonio Russell at Juan Carlos Payano sa 10-round showdown na live na mapapanood sa Showtime. Maghaharap naman sa non-televised undercard action ang tapatan nina Brandun Lee at Dakota Linger sa 10-round super lightweight bout.

Matapos mapanalunan ang interim WBA 118-pound belt laban kay American Stephon Young via unanimous decisionnoong Marso 23, 2018 sa Hard Rock Live sa Florida; apat na magkakasunod na knockout ang inukit ng 24-anyos mula Polomolok, South Cotobato sa kanyang huling apat na laban. Huling sumabak si Gaballo noon pang Disyembre 14, 2019 sa Elorde Sports Complex sa Paranaque City, kung saan pinatumba nito sa 6th round ng scheduled 10-round si Kongfah Nakornluang ng Thailand.

Nais namang makabawi ng 28-anyos mula Manati, Puerto Rico sa nakapanlulumong 2nd round knockout laban kay unbeaten Japanese boxer Naoya “Monster” Inoue (20-0, 17KOs) noong Mayo 18, 2019 sa SSE Hydro sa Glasgow, Scotland para sa bakanteng The Ring bantamweight title at IBF belt nito sa World Boxing Super Series semi-finals.

Hindi naman umano nababahala ang Puerto Rican boxer sa biglaang pagpapalit ng kalaban dahil pareho pa rin naman umano ang preparasyon para kay dating five-division World champion Nonito “The Filipino Flash” Donaire, na dapat na makakalaban nito, at kay Gaballo. Ang pinagka-iba lang umano ay mas bata si Gaballo at mas eksperyensyado at beterano si Donaire.

“I feel great right now. I’m physically and mentally in great shape and ready for whatever comes Saturday night,” saad ni Rodriguez. “I don’t believe that there’s much difference between Nonito and Gaballo. Gaballo tends to open up a little bit more than Nonito does, so it’s easier to connect on him. He is probably a little more aggressive than Nonito and his defense isn’t as good. I think Nonito would have been a tougher fight than Gaballo but I am not taking this fight lightly. We’re prepared for whatever comes. If it goes 12 rounds, I’m ready for all 12. He’s going to have his game plan and we’re going to have ours, and I’m confident that I’m going to come away with the win.”

Hindi inaasahan ang pagtatapat ng dalawang boksingero matapos mauwi sa masaklap na kaganapan ang dapat na magtatapat para sa titulo ng WBC bantamweight title na tunay na may hawak nito na si undefeated Nordine Oubaali (17-0, 12KOs) ng France, na kinilalang ‘Champion in Recess’ ng WBC at dating five-division World champion Nonito “The Filipino Flash” Donaire matapos parehong magpositibo sa mapaminsalang novel coronavirus disease (Covid-19).

GAB, tuloy ang paghihigpit sa health and safety protocols

ni Gerard Peter - @Sports | December 19, 2020

Hindi hahayaan ng Games and Amusement Board (GAB) na magiging maluwag ito sa pagpapatupad ng kanilang alituntunin at mandato kahit pa man nalalapit na ang pagdating ng vaccine para sa novel coronavirus disease (Covdi-19).

Nais maniguro ni GAB chairman Abraham “Baham” Mitra na patuloy ang kanilang ahensya sa pagbabantay at pagpapatupad ng mahigpit na health guidelines at safety protocols sa lahat ng stakeholders nito sa professional sports.

“By next year even though the vaccine is coming, we should not be relax. Wag tayong magpapabaya. Baka kung kelan OK na at parating na ‘yung vaccine eh lalo tayong magkakaproblema,” pahayag ni Mitra, Huwebes sa lingguhang TOPS: Usapang Sports webcast via Sports on Air sa Facebook page.

Patuloy na pinaalalahanan ng dating Palawan governor ang lahat ng sakop nito na maging mapagbantay at sumunod palagi sa mga inilabas na safety guidelines at protocols ng Inter-Agency Task Force on Emerging Infectious Disease (IATF-EID), kung saan malaki umano ang pasasalamat ng ahensya sa pagbuo ng Joint Administrative Order (JAO), katulong ang Philippine Sports Commission at Department of Health (DOH) na payagan na muling ipagpatuloy ang pagsasagawa ng pampalakasan sa gitna ng pandemya, higit na sa mga manlalarong kumukuha lamang ng ikabubuhay sa mundo ng pampalakasaan.

“Let’s please continue to be vigilant and let’s look after on the health and safety of our stakeholders,” wika ni Mitra. “We don’t want the sports to be the source of the problem.”

Inihayag din ni Mitra na dahil sa maayos na pagpapatakbo ng ahensiya ng gobyerno sa panahon ng pandemya, tila napansin ang maganda nitong ginagawa, kung kaya’t nabigyan ng 30% increase ang kanilang pondo sa Senate Committee on Sports mula sa panulak ni Sen. Christopher “Bong” Go.

“Nakita siguro nila na despite the pandemic, we adopt, nag-innovate ang GAB kaya nakikita nila in the future na baka maraming maitutulong,” saad ng dating 2nd district ng Palawan. “It’s pandemic time, ang hirap ng sitwasyon and nag-adopt tayo, even there is pandemic and there are few sports activities present, lalong dapat gumawa ng paraan na gumawa ng summit,” wika ni Mitra sa matagumpay na pagsasagawa ng 2nd Philippine Professional Sports Summit makalipas ang dalawang linggo.

“We are very thankful and grateful sa IATF for the resumption of professional sports, hanap buhay ito eh. Maraming naging challenges, but big help and big step forward ang JAO in resumption of sports,” sabi ni Mitra. “Learning experience namin baka medyo ma-perfect na namin mga stakeholders yan. Mabuti na yung careful tayo. It’s just a fair reminder to everybody na we have to look out for each other. Kapag nagkaproblema sa isang pro-league damay na ang lahat.”

Umaasa si Mitra, na kahit pa man marami pa ring pagbabawal sa larangan ng sports, lalo na sa hindi pa rin pagpapahintulot ng mga fans at pagsasagawa ng mga sports events at tournament sa Metro Manila, kasunod ng General Community Quarantine (GCQ) rito, positibo pa rin itong magiging maganda ang pasok ng pampalakasan sa bansa, higit na sa professional sports dahil sa mga pagpasok ng ilang pampalakasan sa propesyunal na liga. “We’re very excited and we’re looking forward to see things coming in 2021.”

Boxer Marcial, wagi sa unang pro fight sa U.S.

ni Gerard Peter - @Sports | December 18, 2020

Agad na nagpakitang gilas si Filipino middleweight boxing prospect Eumir Felix Marcial nang kanyang dominahin ang American boxer na si Andrew Whitfield, Miyerkules ng gabi (Huwebes ng umaga sa Pilipinas) sa Shrine Exposition Center sa Los Angeles, California sa U.S. upang makuha ang kauna-unahang professional fight sa labas ng bansa.

Pinamaga ng 25-anyos na Lunzuran, Zamboanga City-native ang kanang mata ng 29-anyos mula Lewiston, Idaho at ipamalas ang malalakas na suntok sa pakikipagsabayan kay Whitfield (3-2, 1KOs) sa loob ng 4-round middleweight bout. Nakamit ng 2021 Tokyo Olympics-bound ang iskor na 40-36 sa mga hurado para sa unanimous decision upang makamit ang 1-0 rekord na bumitaw ng 310 punches para sa 120 na kumunekta rito habang ang kalaban ay mayroon lamang 46 punches sa may 273 na binitawan nito.

Naging magandang handog para sa 2019 AIBA World Championships silver medalist ang panalo sa kanyang boxing promoter na si eight-division world champion at World Boxing Association (WBA) welterweight champion Sen. Manny “Pacman” Pacquiao na nagdiriwang ng kanyang ika-43rd na kaarawan kahapon, Huwebes.

Ito ang maaari sa iba pang pro-fight ni Marcial bago magbukas ang kanyang daan patungong Summer Olympic Games na nakatakdang magbukas simula Hulyo 23-Agosto 8. Matinding preparasyon at paghahanda ang ginagawa ni Marcial sa unang pagsalang nito sa pro-boxing matapos ang matitinding strength at conditioning, gayundin ang pagsabak sa mabibigat na sparring sessions sa ilang eksperyensyadong boxers sa sikat na Wild Card Gym sa Los Angeles.

Pinutol din ni Marcial ang 2-fight winning streak ni Whitfield nang talunin sina Adam Smith at Thomas Turner.

Matatandaang pumirma ng 6-year contract si Marcial sa MP promotions ni Pacquiao nitong Hulyo ng taon upang matulungan siya sa kanyang paghahanda sa Summer Games. Nais ni Marcial na matupad ang pangarap ng kanyang ama at ng pumanaw na kapatid na mapanalunan nito ang kauna-unahang gintong medalya ng Pilipinas sa Olympiad. Naniniwala itong malaking tulong ang maibibigay ng kanyang pagsasanay sa ibang bansa, higit na kina Roach at sa Wild Card Gym.