Gaballo, napalitan lahat ng sakripisyo at hirap nang manalo

ni Gerard Peter - @Sports | December 26, 2020

Malaki ang paniniwala ni bagong hirang na World Boxing Council (WBC) interim bantamweight champion Reymart “Assassin” Gaballo na lahat ng kanyang paghihirap at pagsusumikap ay may kabayarang tagumpay.

Ang lahat ng kanyang mga sakripisyo’t pagpapakasakit na manatili sa Estados Unidos at malayo ng halos isang taon sa kanyang mga mahal sa buhay ay napalitan ng pagdiriwang at magandang resulta kasunod ng malaking panalo nitong nagdaang linggo laban kay dating World Boxing Organization (WBO) 118-pound titlist Emmanuel “Manny” Rodriguez ng Puerto Rico sa pamamagitan ng split decision victory sa Mohegan Sun sa Uncasville, Connecticut.

“I was so blessed because with my hard work, I got this one,” wika ni Gaballo ng may pagsulyap sa kanyang bagong titulo sa panayam ng Ringtv.com. “My hard work. It pays off.”

Halos mag-iisang taon ng nasa U.S. ang 24-anyos na tubong Polomolok, South Cotobato, partikular sa Miami, Florida, sapol noong Enero, kung saan dinatnan ng novel coronavirus pandemic habang nagsasanay sa ilalim ng batikang trainer na si coach Osmiri “Moro” Fernandez ng Cuba.

Inulan ng maraming kritisismo at batikos ang kanyang panalo laban sa 28-anyos na Puerto Rican boxer matapos paburan ng dalawang huradong sina John Mackie at Don Trella na nagbigay ng 115-113 at 116-112 na iskor sa unbeaten Sanman Promotions boxer, habang ibinigay ni David Sutherland ang 118-110 sa dating kampeon; samantalang pinagmulan ng kontrobersiya ang mga salita ng mga komentarista ng Showtime at boxing’s unofficial judge Steve Farhood na 118-110, gayundin ang hindi makapaniwalang tagasunod sa social media.

“For me it was a close fight,” sambit ni Gaballo (24-0, 20 knockouts). “Even though I’m coming forward I’m always punching, so maybe they look at me like I won the fight.”

Hindi naman nararapat umano na isisi sa Filipino knockout artist ang nakuhang panalo kung ibigay man sa kanyang ang desisyon ng dalawang hurado dahil makikita namang agresibo ito sa kanyang mga atake. “You cannot win a fight by coming and trying to steal a decision and just moving backwards and occasionally trying to land some punches. Reymart dictated the pace, just kept coming and coming, that’s how I saw the fight,” saad ni MP Promotions President at international matchmaker Sean Gibbons, na naging co-promoter ni Gaballo at ang Sanman Promotions ni JC Manangquil. “It wasn’t Gaballo’s fault that one guy tried to stink it out and he tried to make the fight.”

Umaasa ang kampo ni Rodriguez na mabibigyan sila rematch bout ng WBC matapos itong umapila pagkatapos ng laban. Hindi matanggap ni Rodriguez at ng kampo nito ang ibinigay na desisyon ng dalawang hurado na para sa mga mata at pananaw ng kampo ni Rodriguez (19-2, 12KOs), siguradong nanaig ito laban at naniniwalang mula sa unang pitong rounds ay kanyang nakuha, habang naibulsa rin nito ang 9-12 rounds.

Hindi makaka-abot sa kanyang mga kapamilya sa kapaskuhan si Gaballo, ngunit maaaring makauwi ito sa Pilipinas sa pagpasok ng Bagong Taon. Naghahanda na rin umano itong muling makabalik sap ag-eensayo sa Sanman Gym sa General Santos City upang hasain pa ang kanyang mga kakulangan at kahinaan sa laban.“I’ve been training in Miami a long time. I miss the Philippines.”

Yulo Tabla sa no. 1 sa FIG world rankings

ni Gerard Peter - @Sports | December 22, 2020

Nakisalo sa unahang puwesto ng International Gymnastics Federation (FIG) world rankings ng men’s floor exercise si 2021 Tokyo Olympics-bound Filipino gymnasts Carlos “Caloy” Yulo kasunod ng dalawang medalyang natamo sa Japan tournament.

Tumabla ang 20-anyos na Leveriza, Manila-native kay Mediterranean at European Games champion Rayderley Zapta ng Spain na parehong nakamit ang 70 puntos, samantalang sumunod sa kanila si 2017 at 2019 Universiade gold medalist Kirill Prokopev ng Russia na may 64 points, gayundin sina 2-time World Championships silver medalist Artem Dolgopyat ng Israel na may 60 points at 2019 Universiade runner-up Milad Karimi ng Kazakhstan na may 52 points.

Naging malaking tulong para sa 2019 Southeast Asian Games double gold medalist ang pagkakakuha ng dalawang bronze medal sa nagdaang All-Japan Gymnastics Championships sa Takasaki Arena, upang mas lalo pang mapaghandaan ang preparasyon sa Summer Olympic Games na magbubukas simula Hulyo 23-Agosto 8, 2021 sa Tokyo, Japan.

Nitong nagdaang Setyembre, matapos ang halos anim na buwang pagpapaliban ng mga kompetisyon sa Japan dulot ng novel coronavirus disease (Covid-19) pandemic, sinubukan ni Yulo na gawin ang mga sinanay na routine upang makamit ang bronze medal finish sa vault event sa 53rd All-Japan Senior Masters Gymnastics Championships, kung saan lumapag lamang sa ika-19th place ito sa paboritong floor exercise at 12th sa All-Around.

Mahigit isang taon na ang nagdaan nang mapanalunan ni Yulo ang gintong medalya sa 49th Artistic Gymnastics World Championships sa Hanns-Martin-Schleyer-Halle Arena sa Stuttgart, Germany mula sa floor exercise para maging susi nito patungong Tokyo Games. Isa si Yulo sa apat na Pinoy na nakakuha ng ticket patungong quadrennial meet kasama si pole vaulter Ernest “EJ” Obiena at boxers Eumir Felix Marcial at Irish Magno.

Samantala, inuulat sa isang report na hindi makakapagdiwang ng kapaskuhan at bagong taon ang Filipino gymnasts kasama ang pamilya upang mas pagtuunan pa ng pansin ang pagsasanay at paghahanda nito sa Japan kasama ang kanyang coach na si Munehiro Kugiyama.

2030 Asian Games sa Doha, 2034 Asiad sa Saudi Arabia

ni Gerard Peter - @Sports | December 21, 2020

Muling makukuha ng Doha, Qatar ang hosting ng Asian Games sa ikalawang pagkakataon matapos ibigay muli rito ang 2030 edisyon ng Olympic Council of Asia, habang mapupunta naman sa Riyadh, Saudi Arabia sa unang beses na hosting sa 2034 meet na ginanap sa JW Marriott Hotel sa Muscat, Oman.

Nagkakaisang napagbotohan sa isinagawang executive board meeting ng OCA ang hosting ng Asian quadrennial meet sa Doha, na minsan ng naghost ng multi-sport event mula Disyembre 1-15, 2006 na pinagwagiang muli ng bansang China. Naibigay naman sa runner-up winner sa naturang botohan na Riyadh ang 2034 hosting.

“I can now announce... that the city who had the highest vote and will host 2030 is Doha,” wika ni OCA president Sheikh Ahmad Al-Fahad Al-Sabah ng Kuwait. “The second hosting city, for 2034, is Riyadh.”

Naganap ang botohan sa gitna ng matagal na alitan sa politika sa pagitan ng Qatar at Saudi Arabia, kung saan isa ang huli sa mga bumoto upang magpataw ng ‘trade and travel’ boycott sa una noong 2017, ngunit may ilang mga indikasyon, kamakailan na maaring maayos na ang gusot sa hindi pagkakaunawaan ng dalawang bansa.

Naabot ng OCA ang kasunduan ng botohan para sa 2030 hosting, subalit napagkasunduan na ibigay sa runner-up na Saudi Arabia ang 2034 hosting upang mangahulugang walang natalo o nanalo sa naturang botohan. “That means no winner, no loser,” wika ni Sheikh Ahmad al-Fahad al-Sabah, na pinasalamatan ang Saudi at Qatari foreign ministers at ang conference host na Oman para ganapin ang kasunduan. “Thank you, Asia, for solidarity and coordination.”

Dumalo sa naturang pagtitipon para sa Pilipinas sina Philippine Olympic Committee (POC) President Abraham “Bambol” Tolentino at Samahang Kickboxing ng Pilipinas secretary-general Atty. Wharton Chan para sa 26 na delegadong bumoto sa pamamagitan ng paper ballots, habang 19 ang bumoto sa pamamagitan ng electronic voting system, dahil sa pag-iingat na rin novel coronavirus (Covid-19).

Gaganapin muna ang 2022 Asian Games sa Hangzhou, China simula Setyembre 10-25 na may 40 sports events na paglalabanan, kabilang ang 28 Olympic sports events, habang sunod na ipapasa ito sa Aichi-Nagoya, Japan sa Setyembre 18-Oktubre 3.