Sikreto ng kampeonato nina Polidario at Magdato, ibinunyag sa TOPS on air

ni Gerard Peter - @Sports | March 5, 2021

Hindi naging mahirap sa tambalang Alexa Polidario at Erjane Magdato ng Abanse Negrense na makamit ang inaasam na tagumpay at kampeonato sa katatapos lang na Philippine Superliga (PSL) beach volleyball ‘bubble’ tournament dahil sa naging matagal na pagsasama sa mga nagdaang taon.

Tila ipinagpatuloy lang muli ng mga dating pambato ng University of Negros Occidental-Recoletos (UNO-R) ang kanilang maningning na kasaysayan sa loob ng sand courts, kung saan 3-beses silang hinirang na kampeon ng Beach Volleyball Republic sa Visayas, mga inter-scholastics events, gaya ng UNI-Games at iba pang mga liga.

“Hindi naman kami nahirapan na magkaroon ng ibang adjustments nu'ng nagsama kami ulit, si Erjane kase yung pinakamatagal ko ng kasama sa beach volley, parang kapatid ko na iyan kaya alam na namin 'yung bawat galaw ng isa’t isa,” pahayag ni Polidario, Huwebes ng umaga sa TOPS: Usapang Sports webcast na live na napakinggan sa Sports on Air. “Iyong partnership namin is nag-complement sa mga personalities namin, in becoming a tandem ulit. hindi na kami nagkaroon ng malaking adjustments, kaya 'yung advantage namin is yung connection namin pareho na kahit may misunderstanding kami or miscommunication both inside and outside the court ay kaya naming i-manage agad,” paliwanag ni Magdato, sa programang suportado ng Philippine Sports Commission (PSC), Philippine Amusment and Gaming Corporation (PAGCOR) at Games and Amusement Board (GAB).

“Hindi ko inaasahan na muli kaming magsasama, nag-conclude na kami pareho after our partnership sa UNO-R, pero ibinalik yung tandem naming ulit and at the same time hindi ako pwede maglaro sa PSL because of my contracts sa Creamline, pero nung natapos na yung contract ko, I commit ng buo sa Abanse, together again with Erjane,” saad ni Polidario.

Gayunpaman, nagkaroon ng katanungan si Magdato sa kanyang kapasidad at kakayanang maglaro ulit sa sandcourts dahil sa matagal itong nawala sa paglalaro at kompetisyon, subalit lahat ng mga katanungan ay ginawa nilang makatotohanan upang makuha ang gold medal at kauna-unahang korona para sa Abanse Negrense sa panahon ng pandemya. “Since I’m not totally active during pandemic, maraming nagbago sa katawan at endurance ko. Marami akong what if kung kaya ko pa ba maglaro at baka di na ako makasabay kay Alexa, yung mga what if’s na iyon ay nag-turn out to be a gold medal,” eksplika ni Magdato.

Masuwerte ring nakamit ng Abanse Negrense B partner nina Jennifer Cosas at Gelimae Villanueva, mga UNO-R representatives rin ang third place ng gapiin ang Pineda-Sabete duo.

Aqua Stars, team chemistry ang pambato sa VisMin Cup

ni Gerard Peter - @Sports | March 3, 2021

Magiging pangunahing arsenal ng MJAS-Zenith Talisay Aqua Stars ang malalim na naipundar nitong team chemistry at balanseng line up upang maging isa itong paborito na magwagi ng inaugural tourney ng kauna-unahang Vis-Min Super Cup sa Abril 9 sa bubble set-up tournament sa tinaguriang “The Big Dome” ng municipality ng Alcantara, Cebu.

Pamumunuan ito ni dating University of the East standout at PBA player Paolo Hubalde, katulong sina Val Acuna, Patrick Cabahug, University of the Visayas Lancer star Tristan Albina, Darell Shane Menina, local stars Lugie Cuyos (UC), Kevin Villafranca (USJ-R), at Joshua de la Cerna (CIT-U).

Karamihan sa mga koponang bumubuo sa Aqua Stars ay mga miyembro rin ng Valenzuela Classics sa liga ng Maharlika Pilipinas Basketball League (MPBL), kung kaya’t hindi na rin naging problema sa kanilang koponan ang makuha agad ang magandang samahan, kahit na sa online-virtual training lang ang mga ito nagkikita-kita ng madalas para magsanay.“This is a well-balanced team, if we are talking about the positions and experience, with a mixed of rookies and professionals. Maganda ang blend ng team, specially the local players, they are quite strong,” pahayag ni Team Manager Jon Santos, Martes ng umaga sa weekly PSA Forum webcast, kung saan kasama rin sa naturang programa sina team captain Hubalde at Puma PH, Senior Manager for Sales Marketing and Operations Mr. Michael Aldover.

“We know that everyone wants to win the inaugural title, but for us siguro we want to win it more, kase buo na kami since last year pa. Hindi man kami nagpa-practice ng face-to-face but yung chemistry ng team andun na and also, we’re not just a team, we’re a family,” saad naman ni Hubalde na planong dalhin ang veteran leadership at eksperyensya mula sa kanyang mga nakuhang malawak na kaalaman sa paglalaro sa San Miguel Beermen, Barangay Ginebra Gin Kings, Barako Bull Energy Boosters, Mahindra Enforcers, Petron Blaze, Global Port Batang Pier at championship run sa Alab Pilipinas sa ABL.

Nabuo ang kanilang koponan sa pag-aasam na makatulong ng malaki sa mga manlalarong naapektuhan ng matinding paghirap at kawalan ng trabaho dulot coronavirus disease (Covid-19) pandemic at lockdown noong isang taon. Ang naturang paliga rin ang nagbigay ng pag-asa sa mga manlalaro mula sa katimugan upang makilala at hindi na malayo sa kani-kanilang pamilya na nagnanais na makapasok sa mga professional ranks gaya ng PBA at iba pang liga tulad ng MPBL at ABL.

Cuarto, bagong IBF mini champ, Taduran tinilad

ni Gerard Peter - @Sports | March 1, 2021

Nahirang na bagong International Boxing Federation (IBF) minimumweight champion ang Zamboanga-native na si “Mighty Mouse” Rene Mark Cuarto matapos maagaw ang titulo laban kay “Kid Pedro Heneral” Pedro Taduran via unanimous decision, Sabado ng hapon sa Bula Gym sa General Santos City.

Nakamit ng 24-anyos mula Jose Dalman (Ponot), Zamboanga del Norte ang pagpabor ng tatlong hurado sa paggawad sa kanya ng pare-parehong 115-113 na madikitang puntos upang makuha ang kauna-unahang world title laban sa nagdedepensang kababayan.

Ipinamalas ni Cuarto (19-2-2, 11KOs) ang mga counter-punching skills, kontra sa agresibong atake ni Taduran (14-3-1, 11KOs), bagamat matipid sa mga bitaw, ngunit malinis ang mga patama ay siyang nakita at pinaboran ng mga hurado.

Naitala ng Zamboangeno angikatlong sunod na panalo, na huling lumaban noon pang Disyembre 15, 2019 laban kay Jayson Francisco sa pamamagitan ng 5th round TKO sa Robinsons Mall Atrium, General Santos City. “Maganda yung laban namin ni Pedro, Matibay si Pedro,” pahayag ni Cuarto matapos ang laban sa panayam sa kanya ng Powcast Sports. “Sure na sure na ako kase pinag-aralan namin 'yung style niya, kaya ‘yung mga pinag-aralan namin ang talagang lumabas sa fight. Happy naman ako na naging ganun ang desisyon, matagal ko rin itong pinaghirapan ang lahat ng ito at dininig ng Panginoon 'yung mga panalangin ko, natupad 'yung mga pangarap ko,” dagdag nito hinggil sa ginawang preparasyon at paghahanda sa naturang laban.