Tagumpay sa Asia-Oceania target ng Nat'l Fencing Team

ni Gerard Peter - @Sports | April 18, 2021

Umaasa ang Philippine national fencing team na mapagtatagumpayan nilang makapagpadala ng kauna-unahang manlalaro sa Summer Olympic Games sa pagsabak ng 6-man hopefuls sa Asia-Oceania Olympic Qualifying Tournament simula Abril 25-26 sa Tashkent, Uzbekistan.

Paglalabanan ng maraming bansa ang nag-iisang pwesto para sa bawat kategorya na bubuuin nina 2019 SEAG gold medalist Jylyn Nicanor at CJ Concepcion sa Sabre event, SEAG Ream epee champion Hanniel Abella at individual epee bronze medalist Noelito Jose para sa paboritong event at biennial meet 2nd runner-up Nathaniel Perez at Penn State University standout at dating UAAP juniors MVP Samantha Catantan na makikipagtagisan sa foil event. Gagabayan sila nina national head coach Roland Canlas at Armand Bernal.

Inamin ni Philippine Fencing Association (PFA) president Dr. Richard Gomez na malaking tulong ang ibinigay na pondo at pag-apruba ng Philippine Sports Commission (PSC) sa ginanap na ‘bubble training camp’ sa Ormoc City, kung saan namalagi ang 20 fencers ng ilang buwan upang magsanay para sa huling qualifying tournament para sa 2021 Tokyo Olympics sa Hulyo 24-Agosto 9 sa Japan.

Sinabi ng 55-anyos na actor, sportsman, director, leader at public-servant na dahil sa paglobo ng COVID-19 sa NCR, ay napilitan silang dalhin ang mga atleta sa Ormoc City at malayo sa distraksyon at panganib.

“Hopefully maging maganda yung performance nila roon at ipagdarasal natin sila,” pahayag ni Gomez sa TOPS: Usapang Sports special edition kahapon ng umaga sa Sports on Air via zoom. “Lahat sila naghanda talaga and they tried thir best na makapag-perform nang mabuti. Ang laro kase ng fencing, kung maganda talaga ang gising mo, maganda talaga 'yung laro mo, at posibleng makakuha ng Olympic slot, which we are praying for na pagdating nila ng Tashkent, I’m hoping na makapaglaro sila ng mabuti, dahil matagal na tayong walang napapadalang fencer sa Olympics and I’m hoping this time mayroon tayong maipadala from this batch,” dagdag ni Gomez.

Tulong ng LGU's hiningi ng PSC-POC para sa atletang pa-SEAG

ni Gerard Peter / VA - @Sports | April 17, 2021

Nagkasundo ang Philippine Sports Commission (PSC) at ang Philippine Olympic Committee (POC) na humingi ng tulong sa mga local government units (LGUs) para sa paghahanda ng Team Philippines sa 31st Southeast Asian Games na gaganapin sa Vietnam bago matapos ang taon. Naghahangad na maidepensa ang overall championship o kaya'y tumapos sa top 3 sa gitna ng kinakaharap na global health crisis, nahaharap sa matinding hamon ang mga national athletes.

Sa kanilang naging pagpupulong noong nakaraang Huwebes, tinanong ni POC president Rep. Abraham Tolentino ang mga kapwa sports officials kung sasapat ang inilaang P200 milyon para sa preparasyon at partisipasyon ng bansa sa biennial meet. Batay sa tinatayang magiging gastos, kalahati ng nasabing budget ay para sa aktuwal na pagsabak ng halos 700-man Philippine delegation. Pagkaraan ng mga naging diskusyon, nagkasundo ang mga spots officials na hingin ang tulong ng mga LGUs na handang mag-ampon ng teams at tumulong sa ibang aspeto ng gagawin nilang training gaya ng venue, pagkain at tirahan. “Baka may gustong magninong muna sa ating mga atleta, we are very open to this,” ani PSC Commissioner Ramon Fernandez na siya ring Philippine team’s Chef de Mission sa SEAGames. Ayon kay Tolentino, kinakailangan nilang hilingin ang tulong ng Department of the Interior and Local Government upang mag-isyu ng direktiba hinggil sa “godfather-LGU program.” Nagboluntaryo rin si Tolentino na ampunin ang mga national cyclists at skateboarders sa kanyang distrito sa Cavite. “The joint secretariat for the SEAG is carefully working on the SEAG plan,” wika pa ni Fernandez.

Puntirya ang petsang Hulyo 1 para simulan ang training, may panahon pa umano para makipag- usap sa mga LGUs ayon pa kay Fernandez. Umaasa aniya sila na magiging positibo ang pagtugon ng mga tao sa programa bilang pagpapakita ng kanilang pagiging makabayan dahil para naman ito sa bansa.

Kabilang sa mga dumalo sa pulong kasama nina Tolentino at Fernandez sina POC Secretary-General Edwin Gastanes, POC Deputy Secretary-General Karen Caballero, PSC Executive Director Guillermo Iroy Jr., PSC Deputy Executive Directors Queenie Evangelista at Merlita Ibay at PSC National Training Director Marc Velasco.

Banned Team at players dahil sa 'game fixing' sa Super Cup

ni Gerard Peter - @Sports | April 17, 2021

"Wag natin babuyin ang basketball na pinakamamahal ng Pinoy.”

Ito ang mabigat na mensaheng binitawan ni Pilipinas Vis-Min Super Cup Chief Operating Officer Rocky Chan sa mga delingkwente at mapang-abusong koponan, players at coaches na umano'y sangkot sa "malawakang bentahan ng laro" nitong nagdaang Miyerkules ng hapon na naging sanhi ng tuluyang pagpapatalsik at pagbabawal na makabalik sa liga, kasunod ng sangkaterbang suspensiyon at multa sa Alcantara Civic Center sa Alcantara, Cebu.

Magkakabilang parusa ang binitawan ng pamunuan ng Vis-Min Super Cup sa koponan ng Siquijor Mystics at ARQ Builders Lapu Lapu City Heroes na umano'y kinakitaan ng mga sablay na lay-ups at sinadya umanong pagmintis sa mga free throws na natigil sa 27-13 sa pagtatapos ng halftime pabor sa Heroes, na siyang naging ugat ng paghihinala ng malawakang game-fixing at point-shaving.

Tuluyan nang pinatalsik sa liga ang buong koponan ng Mystics na binubuo nina Joshua Alcober, Ryan Buenafe, Vincent Tangcay, Jan Penaflor, Gene Bellaza, Michael Calomot, Frederick Rodriguez, Jopet Quiro, Isagani Gooc, Miguel Castellano, Juan Aspiras, Peter Buenafe, at Michael Sereno, kabilang din si head coach Joel Palapal at ang buong coaching staff nito.

“It’s disgraceful acts to the sport we love the most,” sambit ni Chan sa isang video statement noong nagdaang Huwebes ng hapon sa Alcantara, Cebu kasama sina Cielito Caro at Technical director Rey Canete. “Itinayo namin ang liga na ito to provide a livelihood to players, coaches, utilities and other people behind. Sana 'wag nating sirain because of the sacrifice that we’ve made is not that easy,” dagdag ng sports official.

Pinatawan ng isang buong season na suspensyon at multang P15,000 si Rendell Senining, ang kontrobersyal na nagpalipat-lipat ng kanan-pakaliwa na tira sa free throw, habang sinuspinde rin ng kabuuan ng first rounds at P15,000 na multa sina Hercules “Jojo” Tangkay, Reed Juntilla, Monbert Arong, Dawn Ochea, at Ferdinand Lusdoc, kabilang si head coach Francis Auquico, na binigyan naman ng P30,000 na multa at parehong suspensyon.

Hindi rin nakalampas sa naturang hagupit sina assistant coaches Jerry Abuyabor, Alex Cainglet, John Carlo Nuyles, Hamilton Tundag, at Roger Justin Potpot na pinatawan rin ng P20,000 kada isa. “This is a clear statement of the Pilipinas VisMin Super Cup. Any deliberate actions by any player and coach is not tolerated in this league,” wika ni Chan. “If ginagawa n'yo po ito sa ibang liga, 'wag n'yong gawin dito sa VisMin Super Cup.”

Nagpalabas na rin ng Memorandum ang liga sa iba pang nalalabing limang koponan sa Visayas at 10 sa Mindanao na huwag tularan ang ginawa ng Siquijor na pinatawan ng tuluyang pagpapalayas sa liga at multang P1,000,000.00.

“This is a strong message to everyone who is involved. Hindi namin gusto o tolerate yung wrong doings. We will fine and sanctioned everything na nakita naming mali,” saad ni Canete.