Talisay Aquastars, finalist na; Dumaguete, nanalo sa Super Cup

ni Gerard Peter - @Sports | May 1, 2021

Tila tumpak ang mga koponan na katunggali ng MJAS Zenith-Talisay City Aquastars na sila ang ‘team-to-beat’ bago pa man magsimula ang liga at makalipas ang dalawang round ng eliminasyon ay nanatiling walang talo sa 10 laro matapos isubsob sa lusak ang ARQ Builders Lapu-Lapu City Heroes, 99-62, Huwebes ng hapon, para tuluyang dumiretso sa championship round ng Visayas leg ng Chooks-to-Go Pilipinas Vis-Min Super Cup sa Alcantara Civic Center sa Cebu.

Maghihintay na lamang ng makakalaban para sa best-of-three finals ang Talisay City Aquastars laban sa limang iba pa sa quarterfinals at step-ladder semifinals. Rumehistro ng 22 puntos si dating Adamson Falcons shooter Patrick Cabahug, kaantabay ang 3 rebounds habang sinegundahan nina Shane Menina sa 11 points, Allan Santos sa 10pts. at ni team captain Paolo Hubalde sa 13 assists, kasama ang 6pts. Nanguna si Ferdinand Lusdoc para sa Lapu-Lapu City Heroes sa 12pts na bumagsak sa 4-5 panalo-talo. “Malaking bagay sa amin na makuha namin yung sweep para makapahinga kami,” pahayag ni Aquastars head coach Aldrin Morante. “Siguro masasabi ko lang is all of this is because of the players. They deserve to rest.”

Maghihintay ang No.2 ranked at semifinalist na KCS Computer Specialist Mandaue City sa isang twice-to-beat advantage sa mananalo sa Lapu-Lapu City Heroes, Tabogon Voyagers, Tubigon Mariners at Dumaguete Warriors na maglalaban para sa knockout games. Nakatakdang magtapat ang No.3 laban sa No. 6, at No. 4 na tatapatan ang no. 5, para sa mananatiling matibay para kaharapin ang Mandaue City.

Casera, bumida sa Mariners; KCS, 'di matibag sa Super Cup

ni Gerard Peter - @Sports | April 30, 2021

Isinalpak ng homegrown player na si Jumike Casera ang jump shot sa nalalabing 0.3 segundo upang maitakas ang panalo para sa Tubigon Bohol Mariners laban sa kulelat na Dumaguete Warriors, 62-61, Habang pinadapa ng KCS Computer Specialist Mandaue City ang Tabogon Voyagers, 82-71, Miyerkules, sa nalalapit na pagtatapos ng elimination round ng Visayas leg ng Chooks-to-Go Pilipinas Vis-Min Super Cup sa Alcantara Civic Center sa Cebu.

Habang naghahabol ng isang puntos na kalamangan, tinangka ni league scoring leader Joseph Marquez na dalhin sa panalo ang Mariners, ngunit sinalubong ng matinding supalpal ni Warrior big man Jovanie Aguilar, hanggang sa bumitaw ng dos si Casera para makuha ang kalamangan sa 0.3 segundo. Sinubukan pang magmilagro ni Mannie Gabas para tangkaing ipanalo ang Warriors, ngunit sumablay ito.

Nakuha ng Mariners ang solo 5th place sa 2-7 kartada bago pumasok ng q'final round. Nagtapos si Casera ng 7 puntos habang muling pinangunahan ng dynamic-duo nina Marquez, 18 puntos at veteran Narciso “Pari” Llagas Jr, 21 pts. ang Bohol team. “Para talaga kay Marquez yung tira na iyon eh at kung ano man ang result nun, we we’re going to live with it. Pero masuwerteng andun si Casera sa ilalim ng mga oras na iyon,” wika ni Mariners head coach Gino Enriquez.

Pacquiao vs. Garcia, tuloy sa Dubai ; Tyson vs. Lewis sa L.A. sa Setyembre

ni Gerard Peter / MC - @Sports | April 30, 2021

Tuloy ang laban ng Pambansang Kamao Manny Pacquiao kontra kay Mexican-American boxer Mikey Garcia sa Dubai, U.A.E., ayon kay Arnold Vegafria, ang business manager ng Senador.

Aniya, ilang detalye na lamang umano ang pinaplantsa at iaanunsiyo na nila ang laban para sa muling pagbabalik sa ring ni Pacquiao. Inaasahang sa Hulyo o Agosto gagawin ang nasabing laban. Isiniwalat ni Vegafria na noong pang isang taon ginagawa ang negosasyon para sa laban. Si Garcia ay ang 4-division champion na nanalo ng featherweight, super featherweight, lightweight at junior welterweight class.

Mismong si Garcia ang nagsabi na noong pang 2019 niya asam na makasagupa ang fighting senator. Bukod kay Garcia, ilang boksingero ang sinasabing nakapila para labanan si Pacquiao gaya nina Terrence Crawford na nitong huling balita ay di na matutuloy dahil walang sponsor at Errol Spence.

Samantala, ibinida ni dating heavy weight champion Mike Tyson na sasagupain niyang muli sa ring si heavyweight champion at mortal din niyang kasagupa na si Lennox Lewis. Ayon kay Tyson, gaganapin ang kanilang sagupaan sa Los Angeles sa Setyembre. Dahil dito, nilinaw nitong hindi tuloy ang pinaplantsang laban nila ni Evander Holyfield.

Matatandaang naglaban ang dalawa noong June 2002 kung saan pinabagsak ni Lewis si Tyson sa loob ng ikawalong round. Bukod kay Tyson, giniba din ni Lewis sina Vitali Klitschko, Holyfield, Shannon Briggs, Ray Mercer, Frank Bruno at Tyson.