Promotional tour ni M'Weather nauwi sa rambulan at blackeye

ni Gerard Peter - @Sports | May 08, 2021

Hindi pa man nagsisimula ang nakatakdang exhibition bout sa pagitan nina 5-division World champion at undefeated boxer Floyd “Money” Mayweather at YouTuber at social media influencer Logan Paul, maagang nasaksihan ng ilang dumalo sa promotional tour ang pambungad na buntalang magaganap sa Hunyo 6 sa Hard Rock Stadium sa Miami, Florida – at sa pagkakataong ito laban sa kapatid na si Jake Paul.

Imbes na maitaguyod at makapagbigay ng panibagong aliw sa mga manonood ay nauwi sa gulo ang parehong kampo nina Mayweather at Paul sa pagsisimula ng promotional tour, na nagbunga sa pang-aagaw ni Paul ng baseball cap sa 44-anyos na future Hall of Famer boxer.

Nagsimula ang insidente nang sabihan ni Mayweather sa isang panayam sa kanya ng mga reporter na “Fake fighters” ang magkapatid at “kaya niyang pagsabayin ang dalawa sa iisang gabi.” Dito tila nainsulto ang nakababatang Paul at nakipag-buweltahan ng asaran kay Mayweather, hanggang sa parang batang inagaw ni Paul ang baseball cap ni Mayweather sabay sabing “I got your hat” para pagsimulan ng pagkakagulo. “I don't have to talk about what I'm going to do. The world knows what I'm going to do. I'm willing to fight both in the same night,” pahayag ng dating world boxing champion.

Sinubukan ng security ng bawat panig na awatin at pumagitna sa nangyayaring kaguluhan, ngunit tila desidido na makaganti ang Grand Rapids, Michigan-native na nagresulta sa isang kaliwang black eye ni Paul, na nitong Abril 17, 2021 ay nagpabagsak kay dating mixed-martial arts champion Ben Askren sa 1st ng nakatakdang 8th round fight sa Mercedes Stadium sa Atlanta, Georgia.

Napanatili ni Mayweather, na dating 1996 Atlanta Olympics bronze medalist, ang malinis na kartada sa 50 wins at 27 knockouts sa mahigit tatlong dekada, kung saan tinalo niya ang mga dekalibre at world champions na sina one-and-only eight-division world tilist Manny “Pacman” Pacquiao, Canelo Alvarez, at Oscar dela Hoya, gayundin ang pagpapasuko niya kay two-division UFC champion “The Notorious” Conor McGregor sa 10th round ng scheduled 12-rounds ng boxing noong 2017.

Netball, pupursigihin ng PNFI para sa Pinay Loving N'Ballers

ni Gerard Peter - @Sports | May 07, 2021

Maituturing na paboritong isport at past time ng mga Filipino ang larong basketball at wala itong pinipiling edad o kasarian – ngunit isang isports ang kumakatok sa pintuan ng bawat isa na halos kapareho ng basketball – ang Netball.

Umaasa ang pamunuan ng Philippine Netball Federation Inc (PNFI) na mas mapapalaki pa ang bilang ng mga manlalaro at national coaches sa bansa, gayundin ang pagkakaroon ng magagamit na regular na pasilidad upang pagdausan ng mga pagsasanay.

Inihayag ni PNFI secretary-general Sae-Ann Gallegos na simula nang ipakilala ang kanilang pampalakasan sa bansa noong 2014 bilang paghahanda sa 2015 SEA Games sa Singapore, aminado itong wala pa silang maituturing na malaking grupo o malawak na populasyon gaya ng pagkakaroon ng iba’t ibang clubs at teams, samantalang naghahanap pa sila ng lugar na maaring tayuan ng kanilang courts, kung saan napipisil nila ang Ninoy Aquino Stadium sa loob ng Rizal Memorial Sports Complex sa Maynila, sakaling matapos ang paggamit rito bilang coronavirus disease (Covid-19) facility.

“It was originated from basketball, and specifically to cater women in general. It is almost the same concept, but we don’t dribble, no running with the ball with 7 players. No ball hoggings because only needs 3 seconds to pass the ball and with no backboards. Our ball is quite smaller at iba rin yung fouls. Although, basically it’s a women’s version of basketball,” paliwanag ni Gallegos, Huwebes ng umaga sa weekly TOPS: Usapang Sports sa Sports on Air kasama sina coach Piao Fedillaga at Eunice Japone.

Idinadag ni Gallegos na plano nilang mas ipakilala pa sa mga unibersidad at eskwelahan ang kanilang pampalakasan, lalo na sa mga kabataan, kung saan naipakilala na nila ito sa St. Paul Quezon City, World Citi Colleges, St. Bridget School, Poveda College, Beacon International School at University of the Philippines Netball Club. “We we’re starting it already and introduce it to schools, but we’re hit by pandemic. Netball is for everyone. We are open to teach them the basics of the sport mostly to younger generations. We want to recruit younger kids and start them young and get involved in the sport,” wika ni Gallegos.

Mandaue at Lapu-Lapu agawan na sa final seat

ni Gerard Peter - @Sports | May 06, 2021

Hindi nga lahat ng bayani ay nakasuot ng kapa, minsan hawak nila palagi ay bola at lahat ng bayani ay hindi sumusuko sa anumang kinakaharap na laban – gaya ni dating PBA veteran Reed Juntilla na muling kuminang para sa ARQ Builders Lapu-Lapu City Heroes upang manatiling buhay sa semifinal battle laban sa KCS Computer Specialist-Mandaue, 67-52, Martes ng gabi sa Visayas leg ng Chooks-to-Go Pilipinas Vis-Min Super Cup sa Alcantara Civic Center, Cebu.

Sa ikatlong laro para sa do-or-die game, sunod-sunod na impresibong mga laro ang ginampanan ng 36-anyos na Carmen, Cebu-native upang tulungan ang koponan na makapagpatuloy sa liga at subukang masilat ng tuluyan ang Mandaue City tungo sa inaasam na unang finals appearance sa inaugural tourney ng kauna-unahang professional league sa katimugan, kalaban ang undefeated na MJAS Zenith Talisay City Aquastars na naghihintay sa championship round.

Bumitaw ng 19 puntos, 6 rebounds, 2 assist at tig-isang steal at block ang dating University of the Visayas Lancers shooting guard na nakipagsanib-pwersa kay dating Adamson Soaring Falcons stalwart Dawn Ochea na nagrehistro ng 15pts at 16 boards.

Bukod sa dalawa ay tumulong din sina pro-veteran Jercules Tangkay na may 8pts, 8 rebs, 5 steals at tig-isang assist at block, Rendell Senining sa kanyang 8pts, 4rebs at 2 asst at Hofer Mondragon na naging masipag sa pagkulekta ng rebounds sa 14 boards at 3 pts. Wala namang nakakuha ng double digit score para sa Mandaue City na tanging si Al Francis Tamsi ang pinakamataas sa 9pts at 2 rebs habang masaklap na 24.4% sa 2-pts at 20% sa 3-pt field goals lamang ang mga ito.

“The big difference was everyone responded well. Everybody chipped in in their own little way,” wika ni ARQ assistant coach Jerry Abuyabor. “Kahit yung bench namin was so positive, talking and encouraging one another. We played as a team,” dagdag ni Abuyador.

Tatlong magagandang performance na ang ipinapakita ni Juntilla laban sa Tubigon Bohol Mariners sa 16pts at 10rebs, Dumaguete Warriors na may mainit na 33pts, at 7 rebounds, at sa KCS-Mandaue City.