Blessing sa wushu ang pagkansela ng SEAG Vietnam

ni Gerard Peter - @Sports | July 16, 2021

Kung sa ibang National Sports Associations (NSAs) at national athletes ay nakadidismaya ang pagkakaliban ng 31st Southeast Asian Games sa Hanoi, Vietnam ngayong taon, ‘blessing in disguise’ naman para sa Wushu Federation of the Philippines (WFP).

Dahil sa naging malaking epekto ng mapaminsalang COVID-19 pandemic sa biennial meet, kahit paano ay malaking tulong para mas makapaghanda at makapagprepara ang wushu national team na napahinto ang pagsasanay dahil sa umiiral na mahigpit na health protocols.

Inihayag ni bagong wushu chief Freddie Jalasco na ang paglipat ng petsa ng SEAG sa 2022 ay mainam para makapagplano sila ng maigi at mapahaba pa ang ensayo ng mga atleta. “It’s very fortunate for us, most specially sa mga wushu athletes because, if I’m not mistaken, since nagkaroon ng pandemic ay nahinto sila sa regular practice dahil nag-uwian sila sa mga bahay kaya self-practice lang at walang group practice. Although continuously namo-monitor sila ni technical committee head Samson Co through online training,” pahayag ni Jalasco, kahapon ng ng umaga sa lingguhang TOPS Usapang Sports on Air. “Magandang opportunity for us yung postponement dahil at least makakabalik tayo ng full sa ating ensayo lalo na sa mga atleta. Buti na lang na-cancel dahil hindi tayo cramming,” dagdag ni Jalasco sa programang suportado ng Philippine Sports Commission (PSC), GAB at Pagcor.

Aniya, matatag at kumpleto pa rin ang kanilang line up at pipilitin nilang maipagtanggol ang overall title noong 2019 SEAG sa bansa na kumubra ng 11 medals mula sa 7 gold, 2 silver at 2 bronze.

Umaasa ang long-time wushu official na magkakaroon nang linaw ang gagawing ‘bubble camp’ training na planong idaos sa 5th floor ng Philippine Center for Sports Medicine Building sa loob ng Rizal Memorial Sports Complex sa Manila na dumaraan sa renobasyon.

Insentibong house and lot sa Olympic gold medalist

ni Gerard Peter - @Sports | July 15, 2021

Parang tumama na sa Lotto ang magwawagi ng gold medal sa 2020+1 Tokyo Olympics matapos bumuhos pa ang ginagarantiyang matatanggap ng pinakamagaling na atletang Filipino sa Quadrennial Games.

Masayang inanunsiyo ni Philippine Olympic Committee (POC) President Atty. Abraham “Bambol” Tolentino na makapagbubulsa ng limpak-limpak na reward ang magiging kauna-unahang gold medalist sa Olympics, at inaasahan na ang lahat ng 19 na Olympians ang makikitang magbubulsa nito.

Aniya, tinatayang aabot sa P50 million ang gantimpala ng gold medalist sa Olympics na magsisimula sa Hulyo 24-Agosto 8 mula sa 11 national sports association (NSAs) ng bansa.

Bukod sa financial reward mula sa gobyerno dahil sa Republic Act 10699, sa magwawagi ng gold, silver at bronze medals sa Olympics na nagkakahalaga ng P10-M, P5-M at P2-M, sumunod na nagsipangako ang MVP Sports Foundation (MVPSF) ni Manny V. Pangilinan at Business tycoon Ramon S. Ang, habang umaasa pa si Tolentino, na pinuno rin ng Integrated Cycling Federation of the Philippines (PhilCycling), na may darating pang biyaya sa Olympians.

“Now RSA is giving the same amount,” saad ni Tolentino, kahapon ng umaga sa PSA Forum webcast. “I expect more to come once the gold is delivered. It may even reach P50 million,” dagdag niya Tolentino.

Kasama na rito ang bagong house and lot sa atletang makaka-gold medal, na maaaring pumutol sa 97-taon na pagkagutom ng Pilipinas sapol ng unang sumali ang bansa nung 1924 Paris.

Maaaring isa kina 2016 Rio Olympics silver medalist Hidilyn Diaz ng women’s weightlifting, men’s pole vaulter Ernest Obiena, gymnasts Caloy Yulo, boxers Eumir Felix Marcial, Irish Magno, Carlo Paalam at Nesthy Petecio; golfers Juvic Pagunsan, 2021 US Women’s Open titlist Yuka Saso at Bianca Pagdanganan; women’s weightlifter Elreen Ando, shooter Jayson Valdez, rower Chris Niervaez, skateboarder Margielyn Didal, judoka Kiyomi Watanabe, sprinter Kristina Knott, Taekwondo Jin Kurt Barbosa at swimmers Luke Gebbie at Remedy Rule ang maaaring makapag-uwi ng kampeonato at masuwerteng makatanggap ng napakalaking gantimpala.“Definitely. This is our time. We’ll win that gold as one.”

Pagadian at Basilan Riders hindi isusuko ang top spots

ni Gerard Peter - @Sports | July 15, 2021

Target ng Jumbo Plastic Basilan Riders at Pagadian Explorers na manatiling undefeated at sumosyo sa top spots, habang puntiryang makabawi ng parehong ALZA-Alayon Zamboanga del Sur at Kapatagan Buffalo Braves mula sa nakaraang pagkatalo sa pagpapatuloy ng elimination round ng Mindanao division ng Chooks-to-Go Pilipinas Vis-Min Super Cup ngayong araw sa Ipil Provincial Gymnasium sa Zamboanga Sibugay.

Parehong naging matagumpay sa pagpapadapa sa kani-kanilang mga katunggali ang Basilan Riders at Explorers sa magkahiwalay na tagpo na nakatakdang magtapat sa main game ng 2 p.m. samantalang susubukang makaahon sa masamang laro ng ALZA-Alayon at Buffalo Braves sa opening game ng 12 p.m.

Noong Martes ay galing sa isang laro ang Peace Riders kontra sa Petra Cement Roxas Vanguards, ngunit napagdesisyunang ipatigil ang laban dahil sa madulas na sahig.

Lamang ang Vanguards sa 40-39. Dahil rito nananatiling tig-isang laro pa lang ang Basilan at Zamboanga del Sur matapos maging parte ng insidente sa magkahiwalay na laro.

Sa pakikipagtuos ng Basilan, muling susubukang makapanggulat ni Michael Mabulac nang kumamada ng team-high 16 points sa opening game kontra ALZA-Alayon sa 82-48. Susuporta sa kanya sina Hesed Gabo, Chris Bitoon, Bobby Balucanag at Michael Juico, habang planong sundan ni dating Centro Escolar University Scorpions standout Rich Guinitaran ang explosibong performance kontra JPA Zamboanga City na bumitaw ng 26 puntos. Paniguradong nakaalalay Kean Caballero, Christian Manalo, Vom Lloyd Dechos, at dating De La Salle center Mark Benitez.

Babawi sa pagkakasadlak ang ALZA-Alayon na sasandal muli kay dating San Beda Red Lions captain at champion Dan Sara, katulong sina John Jabello, JR Raflores, Archie Cabrila at Jeff Tajonera. Matapos makuha ng Buffalo Braves ang unang panalo kontra Archangels, nawala ang tapang nito sa huling laro laban sa Zamboanga City ng maibaon ito sa 36-points. Kinakailangang magdoble kayod sina Marlon Monte, Renz Palma, Alex Mandreza, Achie Inigo at dating Brgy. Ginebra sniper Teytey Teodoro upang makatuntong sa magandang posisyon.