Angels target ang liderato, F2, Hitters at Titans, uusad

ni GA @Sports | November 2, 2023

Mga laro ngayong Huwebes

(Santa Rosa Sports Complex)

2 n.h. – PLDT vs NXLed

4 n.h. – Choco Mucho vs Galeries

6 n.g. – F2 Logistics vs Petro Gazz

Puntirya ng Petro Gazz Angels na sumosyo sa liderato, habang pilit na maghihiwalay ng landas ang F2 Logistics Cargo Movers, PLDT High Speed Hitters at Choco Mucho Flying Titans sa pagkakatabla sa nakalinyang triple-header na bakbakan ng 6th Premier Volleyball League (PVL) 2nd All-Filipino Conference ngayong araw sa pagdayo ng liga sa Santa Rosa Sports Complex sa Laguna.

Paniguradong magtutulungan muli para sa Petro Gazz sina Aiza Maizo-Pontillas, Gretchel Soltones, Jonah Sabete, Remy Joy Palma at ace playmaker Djanel Cheng na makatabla sa Creamline Cool Smashers na nananatiling walang talo sa liga sa 4-0 kartada, laban sa mas pinalakas na hambalos ni Ivy Lacsina na suportado nina Majoy Baron, Jolina Dela Cruz, Ara Galang, Aby Marano, at Kim Fajardo para pilit takpan ang kawalan nina Kim Kianna Dy at Myla Pablo mula sa injury sa tampok na laro ng 6 p.m.

Kasalukuyang tabla sa 2-1 marka ang Cargo Movers, PLDT at Choco Mucho, kung saan nakahandang makipagharap ang PLDT laban sa NXLed sa pambungad na laro ng 2 p.m. na susundan ng tapatan ng Flying Titans at Galeries sa ikalawang laro sa 4 p.m.

Galing sa pangwawalis na panalo ang Petro Gazz kontra Chameleons sa 25-23, 25-21, 25-22 nitong nagdaang Sabado sa Candon City Arena sa Ilocos Sur, gayundin ang F2 Logistics laban sa Galeries na madaling dinispatya sa 25-15, 25-22, 25-17. Galing din sa panalo ang Choco Mucho nang walisin ang Cignal HD Spikers sa 25-21, 25-19, 25-18, habang mataas ang sagap ng laro ng PLDT ng dominahin ang Farm Fresh Foxies sa 25-17, 25-17, 25-20 noong Oktubre 24 sa Ynares Center sa Antipolo City.

Seryoso na sa training si Pacman vs. Mayweather

ni GA @Sports | November 2, 2023

Kinumpirma ng nag-iisang 8th-division World champion Manny “Pacman” Pacquiao ang napipintong laban kay dating undefeated at retired Future Hall of Famer Floyd “Money” Mayweather Jr. para sa pinaka-aasam na Pac-May 2 rematch na planong itulak sa Disyembre sa Tokyo, Japan.

Mababanaag ang matinding pag-eensayo at paghahanda ng 44-anyos na Filipino boxing legend at siguradong boxing Hall of Famer sa hinaharap upang paghandaan ang inaasam na pagsabak sa Summer Olympic Games sa 2024 Paris, habang matindi ang pagnanais nitong makaharap muli si Mayweather upang mabawian sa naunang paghaharap noong Mayo, 2015.

“I’m still active, I’m an active guy, I’m actively training,” pahayag ni Pacquiao sa FightHubTV ng dumalaw ito sa isang event sa Saudi Arabia. “I have an exhibition match this coming December.

In Japan. We’re working on it, the opponent. We’re working with Mayweather. Yes [a Mayweather fight],” bulalas ni Pacquiao na nagsimula ng magpakondisyon sa boxing mitts at punching bag.

Minsan ng nagtapat sina Pacquiao at Mayweather na tinawag na “Fight of the Century” at “Battle for Greatness” noong Mayo 2, 2015 na nagresulta sa 12-round unanimous decision panalo sa American boxer upang mapanatili ang WBA (unified), WBC, The Ring welterweight title at maagaw ang WBO belt na ginanap sa sold-out MGM Grand Garden Arena sa Las Vegas, Nevada.

Lumikom ito ng limpak-limpak na kita na umabot umano sa mahigit sa $400 million at PPV viewership na 4.6 million na pagbili upang tanghaling pinakapinanood na sporting event sa kasaysayan ng telebisyon at pay-per-view. “We’re working on it. Actually, supposedly this coming December, but we’re still working on it and hoping for that exhibition match in Tokyo, Japan,” paglalahad ni Pacquiao na may nakalinya ring umanong exhibition match kontra kay Muay Thai at Kickboxing icon Sombat “Buakaw” Banchamek ng Thailand sa Enero 2024.

Huling sumabak sa exhibition match si Pacquiao noong Disyembre 11, 2022 kontra kay South Korean fighter DK Yoo sa Korea International Exhibition Center na nagtapos sa unanimous decision ng kanilang six round bout, habang huling beses lumaban si Mayweather laban kay John Gotti III na nauwi sa disqualification sa 6th round dulot ng walang humpay na trash talking nitong Hunyo 11 sa FLA Live Arena sa Sunrise, Florida sa America. y.

Ancajas vs. Inoue kanselado ang laban

ni GA @Sports | November 1, 2023

Maghihintay muli hanggang Enero sa susunod na taon si dating long-time super-flyweight champion Jerwin “Pretty Boy” Ancajas upang maisakatuparan ang pangarap na muling maging kampeon matapos makansela ang laban kay World Boxing Association (WBA) bantamweight title holder Takuma Inoue dulot ng rib injury.

Kinakailangang magkaroon ng kaunting pagsasa-ayos at pagbabago sa ginagawang pagsasanay at paghahanda ng dating International Boxing Federation (IBF) 115-pound titlist matapos maurong ang nakatakdang Nobyembre 15 na laban sa Tokyo, Japan. “Ang plano raw is January.

Normal na yan kay Jerwin na may schedule na laban na naka-cancel. Wala tayong magagawa, nasa kanila ang bola basta ready na lang tayo palagi,” pahayag ni head trainer at manager na si Joven Jimenez.

Inihayag ng promoter na si Hideyuki Ohashi nitong Biyernes ang pagkakaroon ng fractured rib injury ni Inoue, na idedepensa sa unang pagkakataon ang kanyang titulo na napanalunan kontra Liborio Solis nitong Abril 8 sa Ariake Arena sa bisa ng unanimous decision para sa bakanteng posisyon na iniwan ng nakatatandang kapatid na si Naoya “The Monster” Inoue matapos maging undisputed titlist sa 118-lb division.

Inamin ni Jimenez na mayroon silang babaguhing pagbabago sa kanilang ensayo upang hindi masayang ang matagal na paghahanda, lalo pa’t wala pang eksaktong petsa ng gagawing laban. “Pag-uusapan namin ni Jerwin yung kaunting changes. Tuloy-tuloy pa rin ang training namin. May mga adjustments lang kaming gagawin dahil hindi pa namin alam ang schedule ng laban,” paglalahad ni Jimenez.

Patungo na sana sa inaasam na ‘peak’ ang 31-anyos na tubong Panabo, Davao City para sa ikalawang pagkakataon sa title shot matapos mawala sa baywang ang junior-bantamweight na mahigit sa 5-taon na hinawakan nang dominahin ng dalawang beses ni reigning IBF titlist Fernando "Pumita" Martinez ng Argentina.