Lady Knights, ginasgasan ang record ng Pirates para sa F4

ni Gerard Arce @Sports | April 30, 2024

Binahiran ng pagkatalo ng palabang Colegio de San Juan de Letran Lady Knights ang kartada ng last season runner-up na Lyceum of the Philippines University lady Pirates sa bisa ng dikdikang laro para mairaos ang 4th set panalo na nagtapos sa 24-26, 25-20, 25-22, 25-22, kahapon upang palakasin ang tsansa nito sa Final 4 sa 99th season ng NCAA women’s volleyball tournament sa Filoil EcoOil Arena sa San Juan City.

Muling pinagbidahan ni rookie sensation Gia Maquilang ang atake ng Letran Lady Knights ng kumana ito ng double-double sa 18 puntos at 16 excellent digs kasama pa ang walong excellent receptions upang tapusin ang dalawang sunod na pagkatalo at iangat sa 5-2 marka ang Oliver Almadro-coached squad.

Nagpakitang-gilas rin ang isa pang rookie na si Yen Martin na tumapos ng 16 marka mula sa 13 atake at tatlong blocks upang makabawi sa kulelat na kontribusyon sa pagkatalo sa 4th set na laro kontra Mapua Lady Cardinals noong isang linggo, habang nag-ambag din si Judiel Nitura ng 15pts.

Hindi natinag ang Lady Knights sa ipinakitang palaban na laro ng Lady Pirates ng magtabla ang laro sa 9-all kasunod ng 5-0 run, matapos na magpakawala si Maquilang ng magkakasunod na atake, bago saraduhan ni Nitura ng isang block ang hambalos ni Johna Dolorito para sa 19-all na laro. Nagpakawala ng malupit na magkasunod na aces si setter Natalie Estreller, na sinundan ng atake ni Maquilang upang makuha ang 22-19 na bentahe.

Hindi naman sumuko ang Lady Pirates sa magkasunod na ace rin ni two-time best setter Venice Puzon para putulin ang kalamangan sa 21-22, subalit nagtala naman ng error ang LPU upang maibigay sa Letran ang panalo. Nanguna naman para sa Lady Pirates si Jaja Tulang sa 19pts mula sa 14 atake at limang blocks, habang nagdagdag sina Joan Doguna ng 14pts at Hiromi Osada ng 12pts.

Kontensiyon ng Crossovers sa PVL semis pinalakas ni Laure

ni GA @Sports | April 22, 2024

Mga laro sa Martes

(Philsports Arena)

4 n.h. – Capital1 vs NXLed

6 n.g. – Farm Fresh vs Choco Mucho 

Muling nagpakitang-gilas si all-around spiker Ejiya “Eya” Laure para sa Chery Tiggo Crossovers upang iangat ang koponan sa krusyal na estado ng Premier Volleyball League (PVL) All-Filipino Conference elimination round tungo sa nalalapit na pagpasok ng koponan papuntang semifinal round. 

Humarurot nang husto sa hampasan ang dating University of Santo Tomas Golden Tigresses sa ginawang 14 puntos sa huling panalo ng Crossovers upang lumapit ang koponan sa semifinals, matapos walisin ang Akari Chargers sa 25-17, 25-20, 25-17 nitong Sabado ng hapon sa Sta. Rosa Sports Complex sa Laguna tungo sa ika-anim na sunod na panalo para sa 8-2 kartada para sa four-way tie sa liderato kasama ang Petro Gazz Angels, Choco Mucho Flying Titans at defending champions Creamline Cool Smashers.

Naging mabisa rin ang ipinakitang laro ni Laure laban sa PLDT High Speed Hitters sa bisa ng straight set sa 25-22, 25-16, 25-20, kasunod ng 12pts at pitong digs, dahilan para hiranging PVL Press Corps Player of the Week sa magkasunod na linggo mula Abril 16-20 sa nag-iisang professional league na handog ng Sports Vision.

Sunod-sunod ang mabibigat na larong itinawid ng Crossovers kabilang ang pangwawalis sa Creamline at makapigil-hinigang five-setter na panalo laban sa Petro Gazz upang maisakatuparan ang pagpasok sa Final 4 kasama pa rin ang collegiate coaches na sina Kungfu Reyes at Ian Fernandez.

“Siguro kung ano ‘yung mga sinasabi ni coach Kungfu dati, lagi ko yung nire-recall kasi sometimes 'yung pagtitiwala sa sarili, sometimes ‘di siya enough for me.

Malaking bagay si coach Kungfu talaga na nagre-remind kung sino talaga ako, kung ano ba yung napag-hirapan ko dati na kayang-kaya kong dalhin sa pro,” wika ni Laure.                                                                   

Gymnast Ruivivar swak sa 2024 Paris Olympics

ni GA / VA / Clyde Mariano @Sports | April 22, 2024

Tatlo na ang mga Filipinong gymnasts na kakatawan sa Pilipinas sa darating na Paris Olympics matapos mag-qualify ni Levi Jung-Ruivivar makaraan nitong magwagi ng silver medal sa women’s uneven bars event ng Doha, Qatar leg ng FIG Artistic Gymnastics World Cup Series noong Biyernes.

Muntik pang di umabot ng finals pagkaraang tumapos na pangwalo at huling qualifier sa naturang event, nakakuha ng iskor na 13.633 ang Fil-Am gymnast na nagbigay sa kanya ng una niyang World Cup medal gayundin ng minimithing Olympics berth.

Base sa panuntunan, tanging ang top 2 gymnasts lamang sa bawat apparatus pagkaraan ng apat na World Cup legs ang uusad sa Paris.

Nakamit ni Jung-Ruivivar ang kanyang Olympic seat nang pumangalawa ito sa uneven bars rankings sa natipon niyang 62 puntos. 

Bago ang Doha leg, nasa ikalimang puwesto si Jung-Ruivivar na may 44 na puntos mula sa nakolekta nyang 14 puntos sa Cairo, Egypt leg, 12 puntos sa Cottbus, Germany, at 18 puntos sa Baku, Azerbaijan. Nadagdagan ang kanyang puntos at tumaas sa 62  matapos magwagi ng silver medal na may katumbas na 30 puntos.

Si Kaylia Nemour ng Algeria ang nagwagi ng gold sa nakuha nitong iskor na 15.366 puntos.

Gayunman, hindi siya binigyan ng ranking points dahil qualified na siya sa Paris Games matapos magwagi sa World Artistic Gymnastics Championships noong isang taon.

Bago ang Doha leg, nasa ilalim si Jung-Ruivivar nina Jennifer Williams ng Sweden at Vanesa Masova ng Czech Republic na kapwa may tig-48 puntos gayundin ng Isa pang Swedish na si Nathalie Westlund na mayroon namang 47 puntos.

Sa naunang tatlong World Cup legs, hindi tataas sa 8th place ang naitalang pagtatapos ni Jung-Ruivivar. Pumuwesto syang pang-13 sa Cairo, 12th sa Cottbus at pang-8 sa Baku.

Ito na ang pinakamaraming bilang ng gymnasts na sasabak sa Olympics para sa Pilipinas makalipas ang halos anim na dekada nang katawanin nina Norman Henson at Ernesto Beren ang bansa sa 1968 Mexico City Games.