MPBL National Finals: Pampanga vs. Quezon sa Best-of-5 sa Dubai

ni Gerard Arce @Sports News | Dec. 1, 2024

Pampanga vs Quezon - MPBL promo photo

Mga laro ngayong gabi (Disyembre 1) (Al Nasr Club’s Rashid Bin Hamdan Indoor Hall, Dubai UAE) Game 1: Best-of-five National Finals

11:00 n.g. – Pampanga vs Quezon Oras sa Pilipinas

Muling magniningning ang kahusayan ni reigning MVP Justine Baltazar para pamunuan ang atake para sa defending champions na Pampanga Giant Lanterns laban sa karibal sa South Division na Quezon Huskers upang makuha ang inaasam na kauna-unahang back-to-back title sa Game 1 ng best-of-five championship series ng 6th season ng Maharlika Pilipinas Basketball League (MPBL) sa prestihiyosong Al Nasr Club’s Rashid Bin Hamdan Indoor Hall sa Dubai, United Arab Emirates.

Gagamitin ni Baltazar ang nakuhang double-double para ibalik muli sa championship round ang Pampanga matapos higitan ang No.1 ranked na San Juan Knights sa 81-73 noong Nobyembre 11 sa Bren Z. Guiao Convention Center sa San Fernando, Pampanga, habang nakatakdang sandalan ng Quezon si ace guard LJay Gonzales na nagawang mahigitan ang Batangas City Tanduay Rum Masters sa 65-60 noong Nob. 14.

Sa naturang mga laro ay maghaharap sa unang pagkakataon ang Pampanga at Quezon sa National Finals ng 11:00 ng gabi (oras sa Pilipinas) bilang handog sa mga basketball fans na Overseas Filipino Workers (OFWs).

Ang kaganapang ito ay inaasahang magiging isang makabuluhang milestone na magpapatibay sa pangako ng liga na ipagdiwang ang talento at pagkahilig ng mga Filipino para sa sport sa ibang bansa.

Nagpakita ng lakas ang 27-anyos na forward na si Baltazar na hinirang na first overall draft pick ng 2024 PBA Draft para sa koponan ng Converge FiberXrs, para muling dalhin sa championship round ang Pampanga.

Umiskor ito sa huling laro ng 24 puntos, 18 rebounds, 4 assists, habang sumegunda si Archie Concepcion sa 19 puntos, gayundin sina Encho Serrano sa 11 puntos at Brandon Ramirez sa 7 puntos.

“Nakapag-prepare kami sa Quezon na champion sa South kung anong game plan na ipapakita namin, number one pa rin yung depensa, pinag-eensayuhan namin buong week, depensa talaga 'yung pagtutuunan namin,” wika ni Baltazar patungkol sa naging paghahanda nila kontra Quezon.

Bumida para sa Huskers ang 5-foot-10 guard mula FEU Tamaraws na si Gonzales sa 22 puntos at 8 rebounds kontra Batangas City, na makakatulong ng mahigpit sina Judel Ric Fuentes, Jason Opiso, Ximone Sandagon, RJ Minerva, Rodel Gravera, Al Francis Tamsi at Gab Banal.

---

MARTIN KUKUNIN ANG 2ND WIN NGAYON LABAN SA MEXICAN BOXER

Planong mas lumapit pa sa World rankings at sa inaasam na title fight ni Filipino rising star at undefeated boxer Carl Jammes “Wonder Boy” Martin sa kanyang pagbabalik laban sa ikalawang salang sa bansang Mexico kontra hometown bet Ruben Tostado Garcia sa isang non-title super bantamweight bout sa “Noche De Box 46” ngayong Linggo ng umaga (oras sa Pilipinas) sa Grand Hotel, Tijuana, Mexico.

Kasalukuyang nakasampa bilang No.2 sa World rankings sa 122-pound division ng World Boxing Organization (WBO) Global titlist ang kasalukuyang hawak na No.2 ranked sa WBO at No.7 sa International Boxing Federation (IBF) title belt na tangan lahat ni undisputed 122-pound champion at undefeated Naoya “Monster” Inoue.

Aasamin ni Martin na patibayin pa ang matatag na puwesto sa kanyang dibisyon upang makalapit sa pagkakataong makasuntok sa World title fight sa hinaharap. “We look forward to a junior featherweight title fight in 2025. He will be ready by that time because we expect him to show it in Mexico,” wika ni international matchmaker at MP Promotions President Sean Gibbons.

Nais sundan ng 25-anyos mula Lagawe, Ifugao ang nakuhang second-round knockout victory sa naunang Mehikanong biktima na si Anthony Jimenez “Boy” Salas nitong nagdaang Setyembre 6 sa Culiacan, Sinaloa, Mexico upang pahabain ang winning streak sa 24 panalo kasama ang 19 panalo mula sa knockouts.

Susubukang manatiling matatag ang kartada ng 5-foot-6 boxer na kasalukuyang pukpok sa ensayo sa Knucklehead Boxing Gym sa Las Vegas, Nevada, na bago lumipad patungong Amerika ngayong taon ay nagawa munang tapusin sa sixth-round si Chaiwat “Kongfah Nakornluang” Buatkrathok ng Thailand nung Disyembre 18, 2023 sa The Flash Grand Ballroom ng Elorde Sports Complex sa Paranaque City.

Naunang nakuha nito ang 10-round unanimous decision na panalo kay Oscar Duge sa parehong venue noong Agosto 19, matapos ang mahigit walong buwang pananahimik sa laban dahil sa inindang right rib injury.

Back-to-back crown target ng NU Lady Bulldogs sa UAAP

ni Gerard Arce @Sports | Nov. 26, 2024

Photo: Itinanghal na Most Valuable Player si Bella Belen, habang Best Opposite Spiker si Alyssa Solomon, Best Libero si Shaira Jardio at si Camilla Lamina ang Best Setter sa katatapos na Shakey's Super League Tournament.

Kasunod ng makasaysayang three-peat grand slam title na iginiya ng National University Lady Bulldogs sa 2024 Shakey’s Super League, plano namang ipagpatuloy at dalhin ang nakuhang momentum sa pagkuha ng back-to-back na korona sa 87th University Athletics Association of the Philippines (UAAP) women’s volleyball tournament sa 2025.

Nakahandang pangunahan nina Alas Pilipinas standout Bella Belen at Alyssa Solomon, na ginawaran din bilang MVP at Best opposite spiker, kaagapay ang paggabay ng dekoradong coach na si Sherwin Meneses, ipaparada ng Lady Bulldogs ang ikatlong sunod na titulo sa Collegiate Pre-Season Championships bago ang pinananabikang UAAP tourney.

Kinumpleto ng powerhouse squad ang matinding laban sa finals series nang walisin ang De La Salle University sa bisa ng 23-25, 25-18, 25-16, 25-20 sa Game 2 nitong Linggo ng gabi sa Rizal Memorial Coliseum upang makuha ang ikatlong kampeonato upang patuloy na mag-reyna sa torneong suportado ng Shakey’s Pizza Parlor.

“Siyempre sobrang excited din ako na nanalo kami. Malaking tulong talaga ‘to sa preparation for UAAP. ‘Yun naman talaga ‘yung goal kaya sumali kami rito,” wika ng multi-titled tactician.

Babalik bilang coach sa UAAP ang multi-titlist coach mula sa Cool Smashers matapos ang huling paggabay sa Adamson Lady Falcons noong 2016, hinalinhinan si coach Norman Miguel bilang coach ng Lady Bulldogs kasunod ng kauna-unahang National Invitationals championship noong Hulyo.

Nagtulong sina Solomon at Belen para dalhin pabalik sa kampeonato ang NU at talunin ang mahigpit na karibal na Lady Spikers sa inaugural SSL titular showdown makalipas ang dalawang taon.

Kumamada si Solomon ng 19 puntos sa lahat ng atake, habang nagdagdag pa si Belen ng 15 puntos, katuwang si Vange Alinsug sa 10 puntos kabilang ang championship kill.

UP double gold sa Athletics, Ateneo at DLSU Tankers astig

ni Gerard Arce @Sports | Nov. 19, 2024

File photo

Kuminang sa takbuhan si dating Palarong Pambansang distance runner champion Mia MeaGey Niñura upang makuha ang kauna-unahang double gold medal sa 87th season University Athletic Association of the Philippines (UAAP) Athletics Championships matapos pagreynahan ang women’s 5,000 meters, Lunes ng umaga sa New Clark City Stadium sa Capas, Tarlac.

Dinuplika ng graduating senior mula Kapatagan National High School ang unang gold medal sa 10,000 meters nitong Linggo para dominahin ang paligsahan sa oras na 18:47.33, kontra national triathlete Erika Burgos, na tumapos sa 18:54.90 at kay Jessa Mae Roda ng NU para kumpletuhin ang podium finish sa 19:14.50.

“Ngayong season ang ginagawa ko is gusto kong bumabawi ako for the last season ko. Kasi tapos na ko mag-aral, kumbaga giving back na lang sa Unibersidad ng Pilipinas. Ito ‘yung nagpa-aral sa ‘kin eh at dahil sa university, nakapagtapos ako,” pahayag ng Physical Education graduate, na minsang nag-reyna sa Palarong Pambansa.

Hindi nagpahuli ang pambato ng UST nang pumukol ng gold sa women’s javelin throw mula kay Lanie Carpintero sa distansiyang 47.36 metro.

Samantala sa ilalim ng makulimlim na panahon, nagtala ang Ateneo de Manila University at De La Salle University ng record-breaking performances sa New Clark City Aquatic Center sa Day 1 ng UAAP Swimming Championships kung saan namayani ang bawat koponan nila sa men’s at women’s relay events.

Dinomina ng Ateneo’s Ivo Enot, Rian Tirol, Victoriano Tirol IV, at Nathan Sason ang men’s 4×50-meter Medley Relay sa oras na 1:45.31.

Kumolekta ang Blue Eagles ng 4 golds, 2 silvers, at 2 bronzes sa Day 1. Winasak ng Green Tankers ang UAAP record sa Men’s 4×200-meter Freestyle Relay. Naorasan sina Alexander Chu, Josemaria Roldan, Bryce Barraza, at Reiniel Lagman sa 8:00.19.