P1.50 taas-presyo sa diesel at kerosene

ni V. Reyes | March 5, 2023

Asahan na umano ang panibagong malakihang pagtataas ng presyo ng mga produktong petrolyo sa mga susunod na linggo.

Batay sa pagtataya ng mga eksperto sa industriya ng langis, posibleng tumaas ng P1.20 hanggang P1.50 kada litro ang diesel at kerosene.

Maaari namang madagdagan ng P0.10 hanggang P0.40 ang kada litro ng gasolina.

Tinukoy na dahilan ng mga eksperto ang pagtaas ng demand sa langis sa China habang bumabawi ang ekonomiya nito.

Ikinababahala rin ang pagsipa pa ng interest rate at mataas na halaga ng krudo at finished product sa imbentaryo ng Estados Unidos.

P2.50 rollback sa diesel

ni BRT | February 12, 2023

Asahan ang panibagong tapyas sa presyo ng petrolyo sa papasok na linggo.

Batay sa pagtataya, aabot ng P2.20 hanggang P2.50 kada litro ang ibababa sa presyo ng diesel.

Samantala, posibleng walang paggalaw o may bahagyang pagtaas ng 30 sentimo kada litro sa presyo ng gasolina.

Kasabay nito, inihayag ni LPG Marketers Association (LPGMA) president Arnel Ty na magpapatupad ng P1 bawas-presyo sa kada kilo sa liquefied petroleum gas (LPG).

Nangangahulugan ito ng P11 pagbaba sa 11-kilogram na tangke ng LPG.

P3.10 tapyas sa diesel, P2.40 sa gasoline

ni V. Reyes | February 6, 2023

May aasahan ang publiko na malakihang bawas-presyo sa gasoline at diesel ngayong linggo.

Ayon sa source mula sa oil industry, posibleng magpatupad ng rollback na P2.60 hanggang P3.10 sa kada litro ng diesel habang nasa P1.90 hanggang P2.40 kada litro sa gasolina.

Nauna na ring tinataya ng kumpanyang Unioil ang pagbaba ng gasolina at diesel sa Pebrero 7. 

“Diesel should go down by P2.60 to P2.80 per liter. Gasoline should go down by P1.90 to P2.00 per liter. Load up accordingly,” ayon sa kumpanya.

Batay sa datos ng monitoring ng Department of Energy mula noong Enero 31 hanggang Pebrero 2, naglalaro sa P63.30 hanggang P72.05 kada litro ang gasolina sa Quezon City habang ang diesel ay nasa P64.03 hanggang P72.55 kada litro sa Makati City. 

Ngayong taon, umabot na sa P7.20 kada litro ang itinaas ng gasolina habang P3.05 sa diesel at P4.45 sa kerosene.