- BULGAR
- Mar 22, 2024
ni Maestro Honorio Ong @Forecast | Marso 22, 2024
Ipagpatuloy natin ang pagtalakay sa mga katangian at magiging kapalaran ng mga animal sign ngayong 2024 o Year of the Green Wood Dragon.
Sa pagkakataong ito, dadako na tayo sa pag-aanalisa ng pangunahing ugali at magiging kapalaran ng Boar, Pig o Baboy.
Ang Boar, Pig o Baboy ay silang mga isinilang noong 1923, 1935, 1947, 1959, 1971, 1983, 1995, 2007, 2019 at 2031.
Sa pag-ibig, romansa at pakikipagrelasyon, ang mga Baboy ay nahihirapang magtago ng kanilang damdamin o emosyon. Kaya kapag nakursunadahan ka ng Baboy, sinadya man o hindi, makikita mo agad ang kanilang pagkalinga, lambing at pagmamahal sa iyo.
Sa 12 animal signs, ang Baboy ang isa sa pinaka-prangka at mahahalata mo talaga ang kanyang damdamin. Kapag napalapit na ang loob niya sa iyo, tunay ngang mararamdaman mo agad ang kanilang paghanga.
Nangyaring ganu’n, dahil bukod sa malambing at mapagmahal, tunay ngang ang mga Baboy ay mahusay din sa romansa. Kaya kung naghahanap ka ng very satisfied, meaningful love affair at sexual experience, talaga naman sa piling ng isang Baboy maso-solve ka na, dahil nga hindi nagagawang itago ng Baboy ang kanyang damdamin at pagnanasa. Pero, kadalasan itong nauuwi sa kabiguan at pagkadismaya dahil masyado silang nagmamadali at hindi nila natatantsa kung ang pinapakitaan ba nila ng motibo o pagmamahal ay may gusto rin sa kanila. Pero, higit naman na mas lumiligaya at very satisfied ang ikalawang pag-ibig o ikalawang pakikipagrelasyon kung ikukumpara sa nauna.
Kaya kung ikaw ay isang Baboy at nabigo ka sa unang pag-ibig o pakikipagrelasyon, ‘wag kang malungkot o manghinayang, dahil tiyak naman na sa ikalawang pag-ibig, paniguradong habambuhay ka ng magiging satisfied at maligaya.
Samantala, ka-compatible naman ng Baboy ang isang mahinhin at tahimik na Tupa o Kambing, at ang sopistikadong Kuneho.
Nauunawaan ng Kambing ang damdamin ng Baboy habang masasarapan naman ang Kambing sa malambing at mapagkalingan nito. Hinggil naman sa relasyong Kuneho at Baboy, pinagpupursigihan ng Kuneho ang medyo magaspang at padaskol na ugali ng Baboy, habang tuturuan naman ng Baboy ang Kuneho para magkaroon ng lakas ng loob at laging maging positibo sa buhay, kaya kapag laging kasama ng Baboy ang Kuneho, unti-unting mawawala ang pagiging pesimista ng Kuneho, hanggang sa tuluyang siyang matutong tumingin sa mga bagay-bagay na may optimistang pananaw.
Bukod sa Kuneho at Kambing, ka-compatible rin ng Baboy ang maraming inililihim na Tigre. Kung ikaw ay isang Tigre, may mapagsasabihan ka na ng mga nililihim at mga tinatago mong sikreto na ayaw na ayaw mong sabihin sa iba. Habang sa piling ng Tigre, makakatagpo naman ang Baboy ng isang may kabuluhang kadaldalan, at may malalim na pagkatao.
Habang ang relasyong Baboy sa Baboy ay maaari namang sa umpisa lang magiging masaya at maligaya na sa bandang huli ay posible ring mauwi sa panlalamig at pagkasawa.
Puwede ring makasama ng Baboy ang mga Daga, Baka, Dragon, Kabayo, Tandang at Aso, dahil ang pagiging excess sa maraming bagay ng isang Baboy ay kaya-kayang disiplinahin, supilin at limitahan ng nasabing mga animal signs.
Manatiling nakasubaybay sa Forecast 2024 na eksklusibo n’yo lang mababasa sa pahayagang BULGAR upang madami pa kayong matutunan at matuklasan, tungkol sa inyong magiging kapalaran ngayong 2024. Iisa-isahin natin ang pangunahing ugali at magiging kapalaran ng 12 animal signs at kung ano ang dapat n’yong gawin upang suwertehin kayo ngayong 2024.
Itutuloy….