Year of the Rooster, masyadong mataas ang tingin sa sarili

ni Maestro Honorio Ong @Forecast | March 18, 2023

Ipagpatuloy natin ang pagtalakay sa mga katangian at magiging kapalaran ng animal sign na Rooster o Tandang ngayong Year of the Water Rabbit.

Ang Tandang o Rooster ay silang mga isinilang noong taong 1933, 1945, 1957, 1969, 1981, 1993, 2005, 2017, at 2029.

Hindi lang palapintas at perpeksyunista ang Tandang, bagkus, mahilig din siyang makipagdebate.

Asahan mo na habang siya ay nagpapaliwanag, sa kanyang husay, napapabilib niya ang lahat ng nakikinig at nanonood.

Ang problema lamang, kapag may nakadebate na ang Tandang, kahit siya ay mali, hindi siya aamin, sa halip, pilit siyang maghahanap ng palusot upang hindi mo mapangalandakan ang kanyang pagkakamali. At dahil perpeksyunista, ayaw niyang makakita ng pagkakamali sa ibang tao, gayundin sa kanyang sarili.

Subalit kapag nagkamali talaga ang isang Tandang at napansin niyang ganu’n ang kanyang nagawa, tulad ng nasabi na, tatawanan niya lang ito at paninindigan niyang hindi siya nagkamali.

Kaya kung ikaw ay may karelasyon na Tandang, mas mabuting iwasan mong makipagtalo sa kanya dahil tiyak na hindi ka mananalo sa isang pilosopo at mahilig magpalusot na Tandang kahit huling-huli na siya.

Kung ikaw naman ay nagkataong nakapag-asawa ng Tandang, kailangang handa kang makinig sa mga katwiran niya at habaan mo ang iyong pasensya, gayundin, dapat kang makinig sa kanyang mga kuwento upang lalong lumawig at lumigaya ang inyong pagmamahalan habambuhay.

Samantala, dahil mahilig mamintas sa mga kahinaan at pagkakamali ng kanilang kapwa, kadalasan ay hindi masaya ang Tandang na makisalamuha sa mga kaibigan o lipunan na kanyang ginagalawan.

Ito ay dahil mas nauuna niyang makita ang pagkakamali ng kapwa kaysa sa mga tama at kabutihan nitong nagawa.

Dahil dito, minsan ay nagiging mailap ang Tandang sa kanilang mga kaibigan at kasamahan.

Halimbawa, sa trabaho o kung saang institusyon siya kabilang, ginusto niya man o hindi, ‘ika nga, aloof at may pagka-loner ang kadalasan nangyayari sa buhay ng Tandang sa panahong siya ay nakikisalamuha sa lipunan.

Ang nakatutuwa pa sa isang Tandang, bagama’t aloof at loner, sinasabi niyang siya ay matalino, magaling at sikat, sa isip-isip niya, kapag may pinaparangalan, habang nakaupo sa isang sulok at ‘yung pinaparangalan ay umaakyat na sa stage, bumubulong-bulong ang Tandang sa kanyang sarili at sinasabing, “Paano kaya naparangalan si Mr. Engot, eh, samantalang magaling pa ako r’yan?”

Ganu’n ang attitude ng Tandang sa halos lahat ng larangan ng buhay, palagi niyang naiisip na mas magaling siya sa kanyang kapwa at akala naman niya ay totoo ito.

Samantalang kapag siya ang mapaparangalan, ang nasa isip niya naman ay,“Kulang pa nga ang karangalang ito sa kakayahan at galing ko!”

Ganu’n kayabang ang Tandang, pero hindi niya ito pinagsasabi at nahahalata dahil hindi naman siya makuwento. Sa halip, tulad ng nasabi na, dahil aloof at loner siya, hindi niya nahahalata na sa loob ng natatago niyang katawan o unconsciously, siya lang talaga ang nakakaalam at minsan ay hindi niya pa ito alam, talaga namang ang mga Tandang, bukod sa sobrang bilib sa kanyang sarili ay sobrang yabang pa at akala mo ay magaling na magaling siya sa lahat ng kanyang kilala at nasasakupan.

Itutuloy

Isinilang sa Year of the Rooster, sobrang perfectionist

ni Maestro Honorio Ong @Forecast | March 16, 2023

Sa pagkakataong ito, tatalakayin natin ang mga katangian at magiging kapalaran ng animal sign na Rooster o Tandang ngayong Year of the Water Rabbit.

Ang Tandang o Rooster ay silang mga isinilang noong taong 1933, 1945, 1957, 1969, 1981, 1993, 2005, 2017, at 2029.

Ang Year of the Rooster o Tandang ay pinaghaharian ng impluwensya ng planetang Mercury sa Western Astrology at siya ring kumakatawan sa zodiac sign na Virgo.

Sinasabing ayaw na ayaw ng mga Tandang ang hindi organisado at may magulong buhay, kaya pinipilit nilang maging maayos ang lahat.

Bukod sa pagiging maayos at organisado, gustung-gusto rin ng mga Tandang na nakaplano ang lahat ng bagay at matapos planuhin, sinisikap niya talaga na masunod kung anuman ang nakapalano sa kanyang mga pangunahing gawain at ambisyon sa buhay.

Kapag wala sa plano, wala siyang balak gawin o tapusin ito dahil para sa Tandang, ang buhay ay isang napakalaking plano. Dahil sa ugaling ito ng Tandang, maraming magaganda at masasayang oportunidad ang nakakalagpas sa kanyang buhay dahil para sa kanya, hindi puwedeng gawin, aturgahin o sunggaban agad ang mga bagay na hindi nakapalano.

Gayundin, ang Tandang ay galit sa surpresa dahil para sa kanya, walang surpresa sa buhay na ito dahil ang lahat ay pinagpaplanuhan bago mangyari o matupad.

Dagdag pa rito, inaakala rin ng Tandang na siya ay napakahusay sa pamamahala at kung siya lang ang masusunod, nais niyang sumunod sa kanya ang lahat ng kanyang nasasakupan nang pikit-mata. Para sa kanya, batid niyang huhusay at bubuti ang buhay o pangyayari sa sandaling siya ang nasunod at namahala.

Namamahala man o hindi, sa halip ay nanonood at tumitingin-tingin lang, madaling nakakapansin ang Tandang ng mga simpleng pagkakamali at kapangitan o kakulangan.

Sa sandaling napansin niya ito, tiyak na ito ay sasabihin at ipagkakalat niya agad dahil naniniwala siya na bawal ang magkamali, pangit, mahina, at ang lahat ay dapat perpektong nasa ayos at magandang-maganda.

Dahil sa pagiging sobrang kritiko at pintasero, kadalasan ay hindi niya namamalayan na naaasar at nilalayuan na siya ng kanyang mga kaibigan dahil animo’y napakagaling ng Tandang na ito, kahit sa totoo lang ay hindi naman.

‘Yun kasi ang nararamdaman ng Tandang —siya ay akala mong napakatalino at napakagaling.

Kaso lamang, sa tuwing ipapakita o ipadadama niya ang pagiging matalino at magaling, hindi sinasadyang pinapalutang niya ang pagkakamali at kapangitan ng mga taong nakapaligid sa kanya, kung saan halos sukdulan at lantaran na niyang pinipintasan ang mga maling ginagawa ng kanyang mga kasama.

Itutuloy

Isinilang sa Year of the Water Rabbit, mas maraming suwerte ‘pag naglibang sa malalayong lugar

ni Maestro Honorio Ong @Forecast | March 14, 2023

Ipagpatuloy natin ang pagtalakay sa mga katangian at magiging kapalaran ng animal sign na Monkey o Unggoy ngayong Year of the Water Rabbit.

Ang Unggoy o Monkey ay silang mga isinilang noong taong 1932, 1944, 1956, 1968, 1980, 1992, 2004, 2016, at 2028.

Kung ikaw ay isang Unggoy na isinilang noong 2004, pagtapos ng malaking tagumpay at mga achievement na iyong makakamit, sa panahong ito ng iyong buhay, kailangang-kailangan mo ang pahinga. Ang pamamahinga at pagrerelaks ang paraan upang lalong ma-recharge ang iyong kasiglahan at enerhiya. Pagkatapos nito, tiyak na ang dagdag na tagumpay at pagpapala na naman ang iyong aahinin. Mas masarap at matamis na romansa ang ipinapangako ng Year of the Water Rabbit.

Para sa Monkey na isinilang noong 1956, ang pagtulong sa kapwa at kaibigang nangangailangan ang dapat mong isagawa ngayong 2023. Piliin mo ang mga taong nararapat tulungan dahil sa ganyang paraan, habang ikaw ay tumutulong sa mga taong karapat-dapat tulungan, dobleng biyaya ang ibabalik sa iyo ng langit sa buong Year of the Rabbit.

Kung ikaw ay Unggoy na isinilang noong 1968, ang mga dating achievement o karangalan at karagdagang kita na hindi mo nakuha noong nakaraang taon ay tiyak na mapasasaiyo ngayong 2023. Panatilihin mo lamang ang dati mong ginagawang pagtitipid at pag-iipon, upang kapag may dumating na bultong biyaya, hindi mo agad ito maubos. Sa halip, nakapag-ipon ka para sa future. Tandaan mo na para sa Unggoy na isinilang sa taong 1968, future ang higit na mahalaga, kaysa ang kasalukuyan.

Para sa mga Unggoy na isinilang noong 1920 at 1980, tuluy-tuloy na lalago ang kabuhayan mo at makakatanggap ka ng biglaang suwerte at pakinabang na hindi mo inaasahan. ‘Yun nga lang, sa taong ito ng Kuneho, may mga kakilala na magkukunwaring tapat at totoong kaibigan, pero sa bandang huli, iisahan at lolokohin ka lamang. Kaya dapat mag-ingat ka sa mga kakilalang mapagsamantala dahil sa taong ito, may babala na madadaya ka ng malaking halaga.

Samantala, ang mga Unggoy na isinilang noong 1932 at 1992 ay higit na magiging malapit sa iyong pamilya at minamahal. Habang nagiging malapit ka sa iyong pamilya at minamahal, maaaring may dumating na bigla at bagong relasyon na sadyang magpapaligaya sa iyo. Gamitin mo ito bilang inspirasyon at pampasuwerte. Ngunit dapat mo pa ring iwasang magkasala. Sa pinansyal na aspeto, tuluy-tuloy ang pagdating ng pera, basta patuloy ka na magiging positibo at masayahin ang attitude sa buhay sa buong taon. Gayundin, tandaan mo na hindi dapat malungkot upang ang buong taon ay lalo pang suwertehin at mas maging maligaya. Itapon mo na ang mga kalungkutan, habang panatilihin ang pagsasaya at paglilibang sa malalayong lugar. Sa malalayong lugar, mas maraming suwerte at magagandang kapalaran ang naghihintay sa iyo ngayong Year of the Water Rabbit.

Itutuloy