Iba’t ibang pampasuwerte ng mga isinilang sa Year of the Rooster

ni Maestro Honorio Ong @Forecast | April 6, 2023

Ipagpatuloy natin ang pagtalakay sa mga katangian at magiging kapalaran ng animal sign na Rooster o Tandang ngayong Year of the Water Rabbit.

Ang Tandang o Rooster ay silang mga isinilang noong taong 1921, 1933, 1945, 1957, 1969, 1981, 1993, 2005, 2017, at 2029.

Para sa Tandang na isinilang noong 1945 at 2005, ngayong Year of the Water Rabbit, hindi mo na kailangang hanapin ang kaligayahan sa malayong lugar. Sa ayaw at sa gusto mo, ayon sa mga bituin, ang kaligayahan ay nasa tabi mo lamang. Kung ikaw ay may pamilya, ibig sabihin, sa pagmamahal sa pamilya mo matatagpuan ang kaligayahan.

Habang kung ikaw naman ay may karelasyon, malinaw na sa iyong kasintahan matatagpuan ang wagas na kaligayahan, ang masarap na romansa, maunlad na pamumuhay at maligayang karanasan sa buong 2023. Samantala, kung ikaw ay walang karelasyon, ngayong taon, hindi ka na dapat pang lumayo, luminga-linga ka lang dahil dati mo nang katabi at kakilala ang makakarelasyon mo. Dagdag pa rito, anumang likhang sining ang iyong pagkakaabalahan, tiyak na ngayong 2023 ay aani ka ng malalaking tagumpay at ligaya.

Kung ikaw ay isinilang noong taong 1957 at 2017, kapag hindi mo ibinigay sa iyong kapwa ang serbisyo at pagtulong ngayong Year of the Water Rabbit, tiyak na hindi ka makakatanggap ng mas maraming pagpapala at suwerte. Ibig sabihin, ngayong 2023, inuutusan ka ng langit na tumulong at maglingkod sa iyong kapwa. Gayundin, lumabas ka sa iyong comfort zone at ialay mo ang iyong serbisyo, talent at galing sa iba, may bayad man o wala. Kapag nagawa mo ‘yan, ‘pag nagseserbisyo ka nang hindi naghihintay ng anumang kapalit, langit ang gaganti sa mga kabutihang loob na ginawa mo, bibigyan ka ng langit ng mas marami at malalaking gantimpala sa buong taon.

Para sa mga Tandang na isinilang noong 1969, maraming magagandang surpresa ang ipagkakaloob sa iyo ngayong Year of the Water Rabbit, pero may kundisyon. Kailangang lumabas ka ng bahay at makihalubilo sa lipunan. Gayunman, kapag nasa loob ka ng bahay, may mga biyaya ka ring makakamit, pero hindi gaanong malaki, subalit sinasabi ng langit na sa pakikihalubilo mo sa lipunan, makakamit ang mas maraming suwerte at magagandang kapalaran sa buong 2023.

Samantala, kung ikaw ay isinilang noong 1921 at 1981, sa pamamagitan ng iyong talino at galing, madodoble ng limpak-limpak na halaga ang iyong investment. Ang tanong, may investment ka ba? Kung wala, okey lang dahil ang taong ito ay sadyang magiging paborable sa iyong kapalaran sa aspetong pananalapi at career. Kung wala kang investment o pinagkakakitaan na labas sa regular mong income, ngayong Year of the Water Rabbit, magugulat ka dahil bigla kang magkakaroon.

Dagdag pa rito, anuman ang iyong pinagkakaperahan, ang pasok ng salapi ay magiging bultu-bulto at sobrang dami talaga na halos hindi mo na mabibilang pa ng iyong mga daliri sa kamay at paa.

At upang lalo kang suwertehin, kailangan ding sa taong ito ay marunong kang magpatawad sa mga taong nakakagalit mo at nakakasamaan mo ng loob. Kapag nagawa mo ito, mas marami pang suwerte at biyaya ang darating sa iyo ngayong 2023.

Samantala, pinag-iingat ka rin sa mga nagbabait-baitang kaibigan, dahil ‘pag ikaw ay nakatalikod, ikaw ay pinag-uusapan at sinisiraan.

Kapag hindi ka nag-ingat, may babala na maloloko at mapapahamak ka dahil sa mga akala mo’y malapit na kaibigan.

Para sa Tandang na isinilang noong 1933 at 1993, magiging paborable ang iyong kapalaran sa larangan ng pag-ibig. Ang problema lamang, tutubuan ka ng selos, gayundin ang iyong kapareha.

Isa lang ang dapat mong gawin, kung mahal mo ang iyong kasuyo, sawayin mo ang pagseselos na kumukurot sa iyong dibdib dahil hindi ito makabubuti sa inyong relasyon.

Kung hindi mo naman siya gaanong mahal at handa kang makipagkalas sa kanya, bago tuluyang mag-apoy ang damdamin mo sa kakaselos, mas mainam pang maghanap ka na lang ng ibang kasuyo na hindi mo pagseselosan. Sa ganyang paraan, mas madaling magma-mature ang iyong personlidad. Dagdag pa rito, kahit tapos na ang Bagong Taon o New Year, at ngayon ay panahon ng tag-araw o tag-init, para sa iyo, ito ay panahon pa rin upang pagbutihin at pakinisin ang magagaspang mong ugali.

Kapag ganap ka nang bumuti at naging mabait, maraming surpresa at hindi inaasahang suwerte na may kaugnayan sa salapi at pag-ibig o aspetong pandamdamin ang darating, na magbibigay sa iyo ng malalaking pag-unlad at dagdag na ligaya sa buong 2023.

Itutuloy

Darating na suwerte at magagandang kapalaran ng Tandang, mag-uumpisa sa Mayo

ni Maestro Honorio Ong @Forecast | April 4, 2023

Ipagpatuloy natin ang pagtalakay sa mga katangian at magiging kapalaran ng animal sign na Rooster o Tandang ngayong Year of the Water Rabbit.

Ang Tandang o Rooster ay silang mga isinilang noong taong 1921, 1933, 1945, 1957, 1969, 1981, 1993, 2005, 2017, at 2029.

Sa pag-ibig at pakikipagrelasyon, sinasabing sa panahong ito ng iyong buhay, hindi mo na dapat pang balikan ang mga kabiguan at tagumpay. Sa halip, anuman ang bunga o idinulot ng nagdaang mga relasyon, kalimutan mo na ‘yun, at mag-move on ka na, kasabay ng pagkakaroon ng bago at mas makabuluhang relasyon.

Halos ganu’n nga ang nakatakdang mangyari, kung saan, sa Year of Water Rabbit, ang mga Tandang na wala pang kasintahan, hindi pa nagkakaroon ng nobyo o nobya, at mga wala pang-asawa, kusang lalakas ang kanilang magnetismo sa opposite sex. Kaya ang posibleng mangyari, bigla kang makakatagpo ng isang nilalang na magpapaligaya sa iyo sa buong 2023, lalo na kung ang nasabing nilalang ay isinilang sa animal signs na Baka, Dragon at Ahas.

Sa kabilang banda, kung wala pa ring love interest na dumarating sa taong ito, hindi ka dapat malungkot, magmukmok o mawalan ng pag-asa dahil sa bandang huli at sa hindi inaasahang pangyayari, lalabas ang isang babae o lalaking ipinadala sa iyo ng langit na makakasama mo sa pagbuo ng mga pangarap at kaligayahan habambuhay.

Tulad ng nasabi na, magiging kalugud-lugod at maligaya ang pakikipagrelasyon ng Tandang sa kapwa niya Tandang, gayundin sa Baka, Ahas at Dragon.

Maraming suwerte at magagandang kapalarang darating sa Tandang ngayong taong 2023, mula sa ika-5 ng Mayo hanggang sa ika-14 ng Hunyo, mula sa ika-28 ng Agosto hanggang sa ika-28 ng Setyembre at mula sa ika-Disyembre 5 hanggang sa ika-28 ng Enero 2024.

Itutuloy

Pagiging maluho at magastos, dapat pigilan ng isinilang sa Year of the Rooster

ni Maestro Honorio Ong @Forecast | April 01, 2023

Ipagpatuloy natin ang pagtalakay sa mga katangian at magiging kapalaran ng animal sign na Rooster o Tandang ngayong Year of the Water Rabbit.

Ang Tandang o Rooster ay silang mga isinilang noong taong 1992, 1933, 1945, 1957, 1969, 1981, 1993, 2005, 2017, at 2029.

Sa mga dadaluhang pagtitipon, sinasabi ring dagdag na salapi ang mapakikinabangan nila, kung saan may pangako rin ng makabuluhang mga paglalakbay at dobleng tubo o kita sa anumang investment na papasukan ng Tandang. Gayundin, maraming surpresa at hindi inaasahang karangalan ang matatanggap ng Tandang sa buong 2023.

Upang lalong makamit ang mga pagpapala at mabuting kapalaran ngayong Year of the Water Rabbit, dapat mapanatiling kampante at hindi magiging marahas, sa halip ay paiiralin ang diplomansya at kahinahunan upang tulad ng nasabi na, mas marami pang suwerte at magagandang kapalaran ang bubuhos sa karanasan ng Tandang sa buong taon.

Sa negosyo at pagkakakitaan, aangat nang husto ang aspetong pampinansyal at pangkabuhayan ng Tandang sa buong taong ito ng Kuneho. Ang problema lamang, kapag hindi iniwasan ang sobrang luho at wala sa lugar na paggastos, maaaring ang magandang kabuhayan o salaping tatanggapin sa taong ito ng 2023 ay mabilis na mauubos. Kaya dapat na magtipid, magsinop at mag-ipon nang mag-ipon, sa halip na gumastos nang walang habas.

Ibig sabihin, kung ikaw ay Tandang at kumita ka ng malalaking halaga sa taong ito o nakahawak ka ng dambuhalang halaga ng salapi, dapat pa ring pairalin ang pagtitipid at pagsisinop ng kabuhayan upang lubos mong mapakinabangan ang mga biyayang pangmateryal na ipagkakaloob sa iyo ng langit ngayong 2023.

Dagdag pa rito, sinasabi ring maraming magagandang oportunidad ng pagkakakitaan ang darating sa Tandang ngayong Year of the Water Rabbit, kung saan dapat ay hindi siya matakot o mag-alinlangan. Sa halip, tuka lang nang tuka sa bawat butil ng mga biyaya na mahuhulog mula sa langit upang tuluy-tuloy na umunlad at sumagana ang kabuhayan ng Tandang.

Samantala, kung magbebenta o bibili naman ng mga bagay, hindi ito inirerekomenda sa taong ito ng Water Rabbit, bagkus, ang mga ito ay dapat gawin sa susunod na taong 2024.

Dagdag pa rito, hindi rin inirerekomenda na magpalit ng career ang Tandang ngayong Year of the Water Rabbit. Gayunman, mas maganda na magdagdag ng kabuhayan, pagkakaabalahan o investment.

Sa halip, ang pinakapaborable at magandang gawin ng Tandang para sa kanyang career at kabuhayan ay magdagdag ng skills at kaalaman. Sa ganyang paraan, ‘pag pinagsikapan niyang i-develop ang kanyang personality at skills, lalong magniningning ang suwerte at magandang kapalaran ng Tandang ngayong 2023.

Itutuloy