Mapalad na araw at buwan para sa mga Year of the Ox, alamin!

ni Maestro Honorio Ong - @Forecast | February 6, 2021

Ang tatalakayin natin ngayon ay ang magiging kapalaran ngayong taon ng mga Year of the Metal Ox o silang mga isinilang noong 1949, 1961, 1973, 1985, 1997, 2009 at 2021.

Totoo ba na kapag “year mo” ang “year ngayon”, tulad ng taon ng Ox at Ox din ang animal sign mo ay susuwertehin ka?

Ganito 'yan, dahil ang taon ngayon ay “taon mo”, mas malamang na magiging paborable sa iyo ang mga kaganapan, higit lalo kung ang katulad mong Ox na nagtataglay ng natural at likas na elementong lupa ay palaging makikisama sa mga animal signs na ka-tugma o ka-compatible upang maganap ang “balance at harmony” sa iyong buhay.

Tulad ng tinalakay natin noong mga nakaraang araw, ang ka-compatible ng Ox ay ang water type animal na tulad ng Pig o silang mga isinilang noong 1935, 1947, 1959, 1971, 1983, 1995, 2007 at 2019. Bukod sa Pig, ang water type sign na Rat o silang mga isinilang noong 1936, 1948, 1960, 1972, 1984, 1996, 2008 at 2020 ay sadyang ka-compatible rin ng Ox o Baka.

Ngunit ang pinaka-perfect na ka-compatible ng Ox ay ang tinatawag na “triangle of compatibility” kung saan ang magkakasama sa tatsulok na ito ay ang Ox, Snake (silang mga isinilang noong 1917, 1929, 1941, 1953, 1965, 1977, 1989, 2001, 2013 at 2025); at Rooster, (silang isinilang noong 1933, 1945, 1957, 1969, 1981, 1993, 2005 at 2017).

Kaya naman kung ikaw ay isinilang sa animal sign na Ox o Baka at ang palagi mong kasama ay ang animal na ka-compatible mo tulad Snake at Rooster, tiyak ang magaganap, makakaranas ka ng isang matagumpay, maunlad at maligayang karanasan sa buong 2021.

Gayunman, kung ikaw ay Ox, 'yun ang unang diskarte o teknik upang ikaw ay suwertehin ngayong 2021, muli, ang palagi lang makisama sa mga animal signs na ka-compatible mo.

Habang ang pangalawang paraan o teknik upang suwertehin ay palagi kang gumamit ng iyong lucky color na dilaw, partikular ang ochre yellow o dilaw na hinango sa kulay ng lupa at ang kulay ng water o tubig na black.

Palagi ka ring magdispley ng mga bagay na yari sa metal (dahil ang 2021 ay year of metal) at mga bagay na yari o hinugis mula sa putik at lupa (dahil ang lupa ang likas na elementng Ox) sa inyong tahanan, opisina o business site, upang mas madali mong maakit ang suwerte at magagandang kapalaran na may kaugnayan sa materyal na bagay sa buong 2021.

Dagdag pa rito, ikaw din ay lubhang magiging mapalad sa buwan ng Abril hanggang Mayo, ganundin sa buwan ng Oktubre hanggang Disyembre, lalo na sa mga araw ng Sabado, Lunes at Linggo, sa mga piling petsang 5, 14, 23, 4, 13, 22, 31, 8, 17 at 26.

Itutuloy

Ugali at kapalaran ng Ox pagdating sa love life

ni Maestro Honorio Ong - @Forecast | February 4, 2021

Ipagpatuloy natin ang pagtalakay sa pangunahing katangian at magiging kapalaran ng animal sign na Ox o silang mga isinilang noong 1949, 1961, 1973, 1985, 1997, 2009 at 2021 ngayong Year of the Metal Ox.

Sa pag-ibig at pakikipagrelasyon, bagama’t may pagkapihikan at bihirang makaranas ng tinatawag na love at first sight, mali namang isiping hindi sila romantiko at hindi rin totoong hindi sila na-in love nang todo at seryosohan.

Tunay ngang bagama’t may pagka-naive o halos walang gaanong pakiramdam, masasabing umiibig pa rin at totoong nai-in love ang isang Ox. Ang problema lamang ay mabagal siyang kumilos at umibig, kaya ang akala ng marami ay hindi gaanong masarap magmahal ang Ox, pero ang totoo, praktikal lang siya talaga at may pagkatuso.

Ang magara sa isang Ox, kahit medyo mabagal siyang umibig at magmahal, kapag naman na-in love siya ay talaga namang totohanan at seryoso at hindi siya papayag na hindi niya mabigyan ng magandang buhay at masaganang kinabukasan ang kanyang iibigin at pakakasalan.

Gayunman, may mga sandali na ang Ox ay madali ring mag-init ang ulo o magalit, at kapag nagalit mo siya, ito ay matagal niyang kikimkimin. Kaya sinasabing, mabagal siyang magmahal at umibig, at mabagal niya ring napagagaling ang kanyang hinanakit at sama ng loob.

Dagdag pa rito, tulad ng nasabi na sa itaas, bagama’t mabagal ma-in love ang isang Ox o Baka, kapag siya ay na-in love, bukod sa seryoso at totoo, nagiging tapat siya sa babae o lalaking kanyang napapangasawa, kaya naman sila ay nakakabuo rin ng maligaya, maunlad at panghabambuhay na pakikipagrelasyon, lalo na sa mga animal sign na ka-compatible ng Ox, tulad ng Rooster at Snake.

Sa sandaling nagkaroon ng relasyon ang Ox at Rooster, agad silang magkakasundo at magkakaunawaan nang todo dahil sila ay kapwa masipag, praktikal at dedikado sa kanilang mga gawain. Kapag ang Rooster at Ox ay nagkatuluyan, tiyak na sila ay yayaman at uunlad nang uunlad ang kanilang kabuhayan.

Habang ang relasyon Ox at Snake ay magiging mapalad din dahil aalagaan at palaging kakarinyohin ng Ahas ang Ox sa panahong siya ay nahahapo at napapagod. Ang mahiwagang haplos ng isang Ahas, ang siya lalo pang magpapasigla at bubuhay sa imahinasyon at pagnanasa ng Baka.

Ang Rat at Ox ay sinasabing compatible rin dahil ang Rat, tulad ng Snake ay tunay ngang maaruga at mapagkalinga, na gustung-gusto namang maranasan ng isang Baka o Ox.

Ang nasabing mga relasyon, Ox at Rooster, Ox at Snake at ganundin ang Ox at Rat, tulad ng naipaliwanag na ay sadyang magiging mapalad at maligaya, higit lalo kung ito ay mabubuo ngayong 2021, sa panahong umiiral ang Year of the Metal Ox, na patuloy na maghahatid ng suwerte at kasaganaan sa buhay ng nasabing mga animal signs.

Itutuloy

Isinilang sa Year of the Ox, napakahusay humawak ng pera at magaling humusga

ni Maestro Honorio Ong - @Forecast | February 2, 2021

Ipagpatuloy natin ang pagtalakay sa pangunahing katangian at magiging kapalaran ng animal sign na Ox o silang mga isinilang noong 1949, 1961, 1973, 1985, 1997, 2009 at 2021 ngayong Year of the Metal Ox.

Bukod sa pagiging materyalismo at praktikal, ang Ox o Baka ay nakagagawa ng legacy. Kung ang ibang tao ay itinatayo ang kanilang mga pangarap sa buhangin tulad ng animal sign na Rabbit o Kuneho, ang Ox ay nakapagtatayo ng kanilang mga pangarap at ambisyon sa buhay sa totoong mga gusali sa matibay na moog, kaya naman ito ay nananatili habambuhay. Karaniwang kanilang emperyo ng kayamanan na naipundar ay namamana pa ng kanilang mga mahal sa buhay at naililipat naman ito sa susunod pang henerasyon ng kanilang saling lahi.

Ganu’n kagaling ang mga Ox kapag ang pinag-uusapan ay mga tangible things o nahahawakan ng mga kamay. Kaya kung ikaw ay isang Ox, ngayong 2021, habang umaangat ulit ang graph ng ekonomiya, samantalahin mo ito at buksan ang mga dati mong negosyo at maaari ka pang magdagdag upang tuluy-tuloy na umunlad at lalo pang lumago ang inyong kabuhayan.

Samantala, dagdag pa rito, sinasabi ring ang Baka ay tunay namang magtatagumpay sa mga gawain at propesyong ganito: Sa military dahil sa taglay niyang katatagan at tapang sa kabila ng mga kritikal at nakapanindig-balahibong pakikipagsapalaran na madali naman nilang nalulusutan at naliligtasan. Sa pagbabangko, pagkomersiyo, insurance at ganundin sa pagpapautang at kalakalan, dahil ang mga Ox ay mapagkakatiwalaan pagdating sa paghawak at papapaikot ng puhunan.

Uunlad at magtatagumpay din ang Baka sa propesyong may kaugnayan sa batas at pagpapairal ng katarungan sa mahihirap at inaapi tulad ng judge, jury at iba pang propesyon o katungkulan na ang nature ay humahatol dahil sa taglay na talas ng kanilang isipan upang makaisip ng mahirap na solusyon at humatol nang pantay at nararapat sa magkabilang panig.

Walang iniwan sa kuwento na matatagpuan sa Bible, sa 1 Hari, 3:16-18, kung saan ipinamalas ni Haring Solomon ang napakatalinong desisyon at paghatol. Ganito ang istorya: May dalawang babae na magkasama sa iisang bahay ang nagsadya sa harap ni Haring Solomon dahil kapwa sila nanganak ng halos magkasabay na parehong lalaking sanggol.

“Namatay ang anak ng ikalawang babae dahil nadaganan niya ito habang siya ay natutulog,” ang paratang ng unang babae. Idinagdag pa niya, “Habang ako po ay natutulog, kinuha niya ang anak ko at dinala sa kanyang higaan at ‘yung patay niyang anak ang itinabi sa akin. Kinaumagahan, nagising ako upang padedehin ang aking anak at natagpuan ko na lang itong patay. Ngunit nang pinagmasdan kong mabuti, nakilala ko na hindi ‘yun ang tunay kong anak.”

Tumutol naman ang ikalawang babae at ang sabi, “Hindi po totoo ‘yan! Anak ko ang buhay at kanya ang patay!” At lalo namang iginiit ng unang babae na, “Mahal na hari, ang anak niya po ang patay at sa akin ang buhay!”

Kaya sinabi ni Solomon sa isa, “Sinasabi mong iyo ang buhay na bata at kanya ang patay,” at sa ikalawa, “Ang sabi mo nama’y iyo ang buhay at kanya ang patay.” Kaya nagpakuha ang hari ng isang tabak at dinala sa kanya ang isang matalas na tabak. Sinabi ng hari, “Hatiin ang batang buhay at ibigay ang kalahati sa bawat isa.”

Nabagbag ang puso ng tunay na ina ng batang buhay at napasigaw, “Huwag po, Kamahalan! Ibigay n’yo na po sa kanya ang bata, huwag lamang n’yong patayin.”

Sabi naman nu’ng isa, “Sige, hatiin n’yo ang bata upang walang makinabang kahit sino sa amin!”

Kaya sinabi ni Solomon, “Huwag n’yong patayin ang bata. Ibigay n’yo sa una dahil siya ang tunay na ina.”

Ganu’n kagaling humatol ang mga taong isinilang sa animal sign na Ox, kaya naman dahil sa taglay nilang mala-Haring Solomon na judgment, sa larangan ng pagpapatupad ng batas at makatarungang pagpapasya sa kanilang nasasakupan, ang Baka ay tiyak na kikilalanin, magtatagumpay at labis na mamahalin ng mga taong kanyang pinamamahalaan.

Itutuloy