Tiger, pinakamahirap intindihin sa lahat ng animal signs

ni Maestro Honorio Ong - @Forecast | February 16, 2021

Ipagpatuloy natin ang pag-aanalisa sa pangunahing ugali at magiging kapalaran ng animal sign na Tigre o Tiger ngayong Year of the Metal Ox.

Kung ikaw ay isinilang noong 1926, 1938, 1950, 1962, 1974, 1986, 1998 at 2010, ikaw ay naiimpluwensiyahan ng animal sign na Tigre o Tiger.

Sinasabing bagama’t maraming magagandang pangyayari at suwerteng karanasan ang darating sa isang Tigre ngayong 2021, hindi naman mawawala na kasabay ng magagandang karanasang ito ay may manaka-nakang pagsubok at problemang darating. Ngunit ang mga pagsubok na ito ay madali namang malulunasan at masosolusyunan agad ng isang Tigre, basta ang mahalaga ay manalig siya sa taglay niyang galing at kakayahan.

Kapag dumarating ang mga biglaang pagsubok, dapat ding manalig siya na kasabay ng mga pagsubok na ito ay ang mga biglaang suwerte, kaya kailangang ang isang Tigre, anuman ang mangyari ay manatiling matatag, positibo ang isipan at buo ang loob.

Ang Tigre ay sinasabi ring kilala sa pagiging matulungin at may mababang loob, kumbaga, dahil sila ay madaling maawa, nagiging palabigay sila at matulungin, lalo na sa mga inaapi, mahihirap at biktima ng kalamidad, kung saan bagama’t hindi nila isinasapubliko ang pagtulong na kanilang ginagawa, bukal naman sa loob nila ang nasabing mga pagtulong nang lihim sa mga taong kinaawaan nila. Dahil sa pagiging matulungin na ito at may mababang loob, ang Tigre ay tunay namang palaging pinagpapala ng nasa itaas, kaya malimit siyang padalhan ng langit ng iba’t ibang uri ng surpresa sa kanyang buhay, lalo na ang mga bagay na may kaugnayan sa materyal na bagay at pagpapalago ng kabuhayan.

Sa pakikipagrelasyon at pakikipag-ugnayan sa kapwa, kailangang-kailangan ng Tigre ng simpatya at mga taong maniniwala, uunawa at daramay sa kanya. Sapagkat sa totoo lang, sa 12 animal signs, Tigre ang isa sa pinakamahirap maunawaan, kaya naman madalas, ang hinahanap niya sa isang babae o lalaki ay ang makakasapol ng malalim niyang kalungkutan at pagkatao. Tunay ngang malalim ang kalungkutan at pagkatao ng isang Tigre dahil ipinanganak siyang tila palagi niyang nadaramang kakaiba siya at nag-iisa. Kaya sa pakikipagkaibigan, matagal magtiwala ang Tigre dahil ang iniisip agad niya ay hindi naman tapat at totoo ang mga taong nakakatagpo at nakakaharap niya.

Gustung-gusto ng Tigre na pinapayuhan o binibigyan siya ng advice, kahit ang totoo ay hindi naman siya naniniwala sa mga ipinapayo at kahit ano pa ang ipayo mo sa kanya, malabo naman niya itong gawin dahil may unique at kakaibang pagkatao ang Tigre, na sadya namang mahirap mong mahuli ang kanyang kiliti.

Bukod sa mahirap mahuli ang kiliti ng Tigre, kadalasan ay siya rin ang may matigas na paninindigan, kaya anuman ang kanyang tinayuan na paniniwala, maaaring napakahirap mo na itong ipabago pa sa kanya, kahit alam na alam niyang mali ang isang posisyon o paniniwala na tinayuan niya.

Ganundin sa pag-ibig at pakikipagrelasyon, basta ito ay ginusto niya— mali man o tama at kumontra man ang lahat — walang makapipigil sa Tigre sa panahong siya ay in love na in love dahil para sa kanya, isa lang ang tama at mahalaga at ito ay ang magmahal nang lubusan.

Itutuloy

Year of the Tiger, mahirap intindihin pero kayang magtaboy ng iba’t ibang trahedya

ni Maestro Honorio Ong - @Forecast | February 11, 2021

Sa nakaraang isyu, tinalakay natin ang pangunahing ugali at sadlakang kapalaran ng animal sign na Ox ngayong 2021.

Sa pagkakataong ito, ang pangunahing ugali at kapalaran naman ng animal sign na Tigre o Tiger ang ating pag-uusapan. Kung ikaw ay isinilang noong 1926, 1938, 1950, 1962, 1974, 1986, 1998 at 2010, ikaw ay naiimpluwensiyahan ng animal sign na Tigre o Tiger.

Sinasabing ang Tigre ay siya ring Aquarius sa Western Astrology, na nagtataglay ng ruling planet na Uranus.

Ang mga Tigre ay natural na papalarin mula alas-3:00 hanggang sa alas-5:00 ng madaling-araw, kaya mas mainam na agahan nila ang gising, manalangin, mag-ehersisyo, maligo at simulan agad ang kanilang pang-araw-araw na gawain. Sa ganitong paraan, ‘pag inunahan nila sa paggising ang Haring Araw, higit silang magiging maligaya at mas maraming biyaya at suwerte ang ibubuhos sa kanila ng langit.

Dagdag pa rito, mapalad din ang mga Tigre sa direksiyong silangan, hilagang-silangan (east at northeast) at dahil wood o kahoy ang kanilang elemento, sinasabing magiging mapalad sila sa mga pandispley na nililok o niyari mula sa mga matitibay at de-kalidad na kahoy at ito rin ang magsisilbi nilang lihim na talisman o anting-anting.

Sa Ancient Chinese Elemental Astrology, pinaniniwalaang isa sa pinakamapalad na animal sign ang Tigre kung saan bagama’t minsan ay mahirap silang intindihin at unawain, pero ayon sa paniniwala ng mga sinaunang matatandang Chinese, may tatlong pangunahing trahedya ang naitataboy ng Tigre at ito ay ang sunog, pagnanakaw at masasamang espiritu. Ibig sabihin, kapag kasama mo sa bahay ang Tigre, makakaiwas ang inyong pamilya sa sunog, magnanakaw at masasamang espiritu tulad ng multo, maligno at iba pang uri ng laman-lupa.

Bagama’t kilala sa pagiging walang ingat at padalos-dalos na pagpapasya, kasabay naman nito ang maraming hindi inaasahan at biglaang mga suwerte ang kadalasang dumarating sa isang Tigre, higit lalo kung ito ay mangyayari ngayong Year of the Metal Ox.

Sinasabi ring dahil sa pagiging likas na maawain at matulungin, ibig sabihin, may likas na mabuting puso na tinataglay ang Tigre, kaya palagi siyang pinagpapala ng langit at kabilang sa mga pagpapala na natatamo ng Tigre ay ang hindi nawawalan ng suwerte. Ibig sabihin, anumang pagsubok ang kanilang kaharapin, tiyak na iaahon sila ng langit upang ang mga pagsubok na ito ay kanilang malagpasan.

Ang ikinaganda pa nito, matapos malagpasan ng Tigre ang nasabing mga problema at pagsubok ng buhay, higit na malalaki at magagandang kapalaran ang kanilang matatanggap dahil sa sobrang laki talaga at dami ng nasabing mga biyaya mula sa langit ay halos hindi nila ito mapaniniwalaan kung paano sila sinuwerte nang bonggang-bongga at hindi naman talaga nila akalaing mangyayari ito sa kanilang buhay.

Ang malalaking suwerteng ito na hindi inaasahan na ikagugulat talaga ng Tigre ay kadasalang nagaganap at natatanggap nila habang sila ay pumapasok sa edad na 49.

Itutuloy

Isinilang sa Year of the Ox, mapapalaban sa mga intriga pero sure win dahil kakampi ang langit

ni Maestro Honorio Ong - @Forecast | February 9, 2021

Ipagpatuloy natin ang pagtalakay sa magiging kapalaran ng animal sign na Ox o Baka ngayong Year of the Metal Ox.

Sinasabing sa pagpasok pa lang ng buwan ng Pebrero, marami nang kakaibang surpresa at hindi inaasahang magagandang kapalaran ang magaganap sa iyong buhay. Iba’t ibang uri ng oportunidad ang parating, kaya dapat magpakatalino ka sa pagsunggab upang ang mga pagkakataong ito ay mai-convert mo sa pagkakaperahan at dagdag pang pagkamal ng mga materyal na bagay. At sa taong ito, tandaan ding ang tapang at lakas ng loob na may kasamang talino ang lalo pang magpapaunlad at magdadala sa iyo sa isang wagas at tunay na kaligayahan.

Sa career at hanapbuhay, maraming mga intriga, paninira at lihim na naiingit sa iyo ang lulutang nang paisa-isa sa unang hati o 1st quarter ng 2021. Ngunit ‘wag kang mabahala, kung ang iba ay nagkakampihan sa laban, sa iyo ay may iisang matitirang kakampi at ito ay ang langit. Sino ba naman ang makagagabi sa isang tao na ang kakampi ay langit?

Kaya sa buong 2021, anumang sagabal at pagsubok ang iyong kaharapin, partikular sa career at hanapbuhay, sigurado na ang iyong pagtatagumpay.

Gayunman, kahit masigurado ang tagumpay sa career, hindi mo naman dapat pairalin ang sobrang tiwala sa sarili at kayabangan dahil sinasabi ring ngayong Year of the Metal Ox, habang nagpapakumbaba ka at hindi mo ipinakikitang ikaw ay pinakamahusay at pinakamagaling, lalo kang pagpapalain ng nasa itaas.

Dagdag pa rito, ang mahusay, diplomasya at kunwaring pakiusap, sa halip na pagtataas ng boses at pagiging dominante ay higit na mabisa. Kaya sinuman ang kakausapin mo, lalo na ang mga taong nakatataas sa iyo, kaunting diplomasya at pakiusap ang dapat. Sa ganyang paraan, tulad ng nasabi na, tuluy-tuloy kang aani ng pag-unlad at kasaganaan sa larangan ng career, negosyo, pangangalakal at hanapbuhay, na magdudulot sa iyo ng tuluy-tuloy na pagtaas ng kita at paglago ng kabuhayan.

Sa aspeto ng pakikipagkapwa-tao at pamilya, maraming mga balakin ang maaantala, lalo na sa mga gawaing may kaugnayan sa kaibigan at pamilya, ngunit ang pagkaantalang ito ay pansamantala lamang. Hindi ka dapat ma-stress o mainis sa nasabing mga pangyayari dahil wala ka namang magagawa sa mga ito dahil tiyak na ganu’n ang magaganap. Sa halip, asahan mo na ito upang hindi ka gaanong ma-stress. Gayunman, ang ibang mga bagay na inaasahan mong mangyayari na maaantala ay mas mainam na balewalain mo na lang kaysa ma-stress ka pa dahil may pangako naman ang langit na sa taong ito, sa aspetong pangkaibigan, panlipunan at pampamilya, hindi man mangyari ang inaasahan, higit pa rito ang magaganap at mas maganda o bongga pa ang magiging kaganapan.

Sa pag-ibig at pakikipagrelasyon, habang in love ka, kasama ang iyong kasuyo, siya ang magiging suwerte mo sa larangan ng salapi ang pagkakaperahan ngayong 2021, lalo na sa buwan ng Nobyembre hanggang Disyembre. Sa madaling salita, ang aktuwal na mangyayari sa iyo ay may pera na, may bonus pang masarap na romansa.

Samantala, kung ikaw naman ay single o wala pang asawa, mapapansin mong lalakas nang husto ang iyong pang-akit at karisma. Dahil sa lumulutang at humahalimuyak mong kakaibang ganda at pang-akit, walang duda na kung ikaw ay lalaki, ikaw ay magkaka-girlfriend na at kung ikaw naman ay babae, bigla kang magkaka-boyfriend kahit nagdadalawang-isip at aayaw-ayaw ka pa.

Samantalahin mo ang pagkakataong ito dahil minsan lang ngingiti sa iyong puso at kapalaran ang totoong pag-ibig, kaya kapag dumating ito ngayong 2021, wala kang dapat gawin kundi sumunggab agad. Sa ganyang paraan, may pangako ng maligaya at panghabambuhay na pag-aasawa.

Itutuloy