U-16 Boy's Football Team babawi sa AFF 2nd Game

ni Anthony E. Servinio @Sports | June 24, 2024

Laro ngayong Lunes – Manahan Stadium

7:30 PM Pilipinas vs. Indonesia 

Susubukan ng Philippine Men’s Football National Team na bumawi sa ikalawang laro nila sa 2024 ASEAN Football Federation (AFF) Under-16 Boys’ Championship ngayong Lunes kontra sa host at defending champion Indonesia sa Manahan Stadium ng Surakarta simula 7:30 ng gabi. Galing ang mga Pinoy sa mapait  na 0-3 talo sa Laos noong Biyernes sa parehong palaruan.

Binuksan ng mga Laos ang laro sa goal ni Kamkasomphou Daophahad sa ika-39 minuto. Nadoble ang agwat sa sipa ni Xaisongkham Sikanda sa ika-50 at tinuldukan ng isa pa kay Soulinbanh Vongdeuan bago itinigil ng reperi ang laro.

Pareho rin ang 3-0 iskor ng Indonesia laban sa Singapore para sumosyo sa liderato ng Grupo A. Hinatid nina Mierza Firjatullah (39’), Evandra Florasta (59’) at Alberto Hengga (86’) ang mga goal at tiyak sila ang mamarkahan ngayon ng depensang Pinoy. 

Samantala, inihayag ng negosyanteng si Jefferson Cheng ang kanyang pagbitiw bilang Team Manager ng Women’s National Team. Sa tulong ni Cheng, umabot ang Filipinas sa 2023 FIFA Women’s World Cup at maraming iba pang mga makasaysayang karangalan. 

Nagpaalam na si Cheng kay PFF Director For National Teams Freddy Gonzalez na tumatayo rin bilang Team Manager ng mga kalalakihan. Sinubukang magtugma ng layunin ang parehong panig sa nakalipas na ilang buwan subalit umabot sa punto na hindi ito mangyayari kung titingnan ang mga umiiral na kondisyon.   

Walang nakatakdang malaking torneo ang Filipinas sa mga nalalabing buwan ng taon. Sa 2025 pa gaganapin ang Southeast Asian Games at hindi pa tiyak kung kailan ang depensa nila sa AFF Women’s Championship na napagwagian nila noong 2022 sa Rizal Memorial.  

PH Football U16 sisipa sa Boy's C'ship sa Indonesia

ni Anthony E. Servinio @Sports | June 21, 2024

Laro ngayong Biyernes – Manahan Stadium

3:00 PM Pilipinas vs. Laos

Sasabak ang Philippine Men’s Football National Team sa 2024 ASEAN Football Federation (AFF) Under-16 Boys Championship ngayong Hunyo 21 hanggang Hulyo 4 sa Surakarta, Indonesia. Nagpakilala ang Philippine Football Federation ng 23 kabataan na produkto ng masinsinang pagtuklas sa buong bansa at ilang galing ibayong-dagat. 

Kabuuang mahigit 1,100 ang nagbakasakali sa Metro Manila, Pampanga, Cavite, Cebu, Bacolod, San Carlos, Iloilo, Agusan del Sur, Davao, Koronadal at Dipolog.  Ang huling 33 kandidato ay dumaan sa isang buwang kampo bago napili ang 23. 

Ang koponan ay binubuo nina Rogelio Brizuela III, Rossen Comla, Zachary Dalman, Anthony Elorde, Jimm Fabela, Leonardo Garcia, Alexander Lomibao, Aarran Long, Michael Maniti, Mabien Manuel, Matteo Mercado, Peter Mirasol, Joshua Moleje, Edvard Omitade, Jimuel Panganiban, Tobias Paulino, Francis Poticano, Elijah Sarana, Matthew Steen, Filbert Tacardon at mga goalkeeper Austin Dilodilo, Enrique Sunico at Mateo Veloso. Ang head coach ay si Yuki Matsuda. 

Nabunot ang mga Pinoy sa Grupo A at una nilang haharapin ang Laos ngayong Biyernes sa Manahan Stadium simula 3:00 ng hapon. Ang iba pa nilang asignatura ay kontra defending champion at host Indonesia (Hunyo 24) at Singapore (Hunyo 27). 

Ang Grupo B ay binubuo ng Vietnam, Myanmar, Cambodia at Brunei habang ang Grupo C ay Thailand, Malaysia, Timor Leste at Australia. Ang mga numero uno sa tatlong grupo at ang may pinakamataas na kartada sa mga magtatapos ng pangalawa ay tutuloy sa knockout semifinals at finals sa Hulyo 1 at 4. 

Puntirya ng Pilipinas na makapasok sa semifinals ng torneo sa unang pagkakataon.  Noong 2022, naitala nila ang nag-iisang panalo sa Singapore subalit yumuko sa host Indonesia at Vietnam.  

Phl Men's Booters palaban pa rin para sa World Cup

ni Anthony E. Servinio @Sports | June 7, 2024

Laro ngayong Martes – Gelora Bung Karno, Jakarta

8:30 p.m. Pilipinas vs. Indonesia 

Nanatiling palaban ang Philippine Men’s Football National Team at Coach Tom Saintfiet papasok sa kanilang 2026 FIFA World Cup qualifier kontra sa host Indonesia ngayong araw sa Gelora Bung Karno Stadium sa Jakarta. Kahit wala nang pag-asa tumuloy sa susunod na yugto, gagawin ng pambansang koponan ang lahat na wakasan ang kampanya ng positibo.

Naglaho ang lahat ng pag-asa ng bansa sa huling laro, ang makabasag-puso na 3-2 talo sa Vietnam noong Huwebes sa Hanoi. Kailangan ng hindi bababa sa tagumpay, lumamang agad ang mga Pinoy sa goal ni Patrick Reichelt subalit nawalan ito ng bisa at naitakas ng Vietnamese ang tagumpay na kailangan rin nila upang manatiling buhay sa torneo. 

Sa kanilang ika-anim at huling laro, gagawin ng mga Pinoy Booters ang lahat upang makauwi ng magandang pasalubong para sa kanilang mga tagahanga. Matatandaan na ang nag-iisang puntos ng bansa ay galing sa 1-1 tabla sa mga Indones noong Nobyembre sa harap ng mahigit 10,000 sa Rizal Memorial Stadium. 

Samantala, nanatili sa defending champion Kaya FC Iloilo ang liderato ng 2024 Philippines Football League (PFL) sa huling laro ng ika-10 linggo ng liga noong Linggo ng gabi sa Rizal Memorial. Binugbog ng Kaya ang Mendiola FC 1991, 9-1, kahit wala ang kanilang mga pambansang manlalaro Jarvey Gayoso at Mark Swainston. 

Sa ibang mga laro, tinakasan ng United City FC ang Tuloy FC, 1-0, at nagtabla ang Maharlika Taguig FC at Loyola FC, 2-2. Sa Cebu, nanaig ang Dynamic Herb Cebu FC sa bisitang Davao Aguilas, 1-0, sa isang mainit at pisikal na laro.