Pinas bronze sa Kings Cup Football sa Thailand

ni Anthony E. Servinio @Sports | Oct. 15, 2024

Photo: PH vs Tajikistan - Kings Cup 2024 - Philippine Men's National Football Team

Nauwi ng Philippine Men’s Football National Team ang medalyang tanso sa ika-50 King’s Cup! Ibinaon ng mga Pinoy Booters ang Tajikistan, 3-0, sa punong Tinsunalon Stadium sa Songkhla, Thailand. Nagtapos ang unang 45 minuto na walang goal.

Ibang klaseng koponan ang bumalik para sa pangalawang half at bumuhos na ang mga goal nina Gerrit Holtmann (47’), Jefferson Tabinas (58’) at Zico Bailey (62’). Ito ang unang tagumpay ng Pilipinas mula noong tinalo ang Afghanistan, 2-1, sa FIFA Friendly sa Rizal Memorial Stadium noong Setyembre 12, 2023.

Sinundan ito ng 10 laro na talo o tabla. Nakabawi ang mga Pinoy sa mga Tajik na naging kalaro nila para sa ikatlong puwesto sa Merdeka Tournament sa Malaysia noong Setyembre 8. Nagtapos ang 90 minuto sa 0-0 kaya kinailangan ng penalty shootout na nagtapos sa 4-3 at mapunta ang medalya sa Tajikistan.

Nakatala rin ng kanyang unang panalo ang bagong head coach Albert Capellas. Una niyang inihayag na babaguhin niya ang estilo ng paglalaro ng mga Pinoy na mas tututok sa paglikha ng maraming goal at napatunayan niya ito.

Nagkampeon ang host Thailand at dinaig ang Syria, 2-1. Winasak ni Chanathip Songkrasin ang 1-1 tabla sa ika-91 minuto. Tinalo ng mga Thai ang Pilipinas sa semifinals noong Biyernes, 3-1, kung saan inihatid ni Bjorn Kristensen ang nag-iisang goal.

Nanaig ang mga Syrian sa Tajikistan, 1-0. Sunod para sa pambansang koponan ang FIFA Friendly kontra Hong Kong sa Nobyembre. Ang ultimong pinaghahandaan nila ay ang AFF Mitsubishi Electric Cup sa Disyembre.

Phl Azkals balik laro sa Asia 7's Championship

ni Anthony E. Servinio @Sports | August 29, 2024

Photo: The Azkals - Press conference

Magbabalik ang Azkals sa Philippine Football!  Isang koponan na pangungunahan nina Stephan Schrock at Misagh Bahadoran ang magdadala ng tinitingalang pangalan sa Asia 7’s Championships ngayong Oktubre 9 hanggang 13 sa EV Arena Elmina sa Kuala Lumpur. 

Haharapin ng Azkals ang mga kinatawan ng defending champion Japan,Tsina, Brunei, India, Hong Kong, Indonesia, Singapore at host Malaysia. Hahatiin sa dalawang grupo ang mga kalahok na maglalaro ng single round at ang dalawang may pinakamataas na kartada sa bawat grupo ay maghaharap para sa kampeonato. 

Itinalagang head coach si Hamed Hajimehdi habang team manager si Patrick Ace Bright. Magkakaroon ng mga try-out sa Setyembre 7 at 8 sa McKinley Hill para makabuo ng 18 manlalaro kabilang ang dalawang goalkeeper. 

Oras na mabuo ang koponan ay may inihahandang laro kontra sa mga artista at iba pang celebrity sa Oktubre 6 na magsisilbi rin bilang kanilang despedida. Inilalatag ang plano para maipalabas ang mga laro sa Pilipinas sa pamamagitan ng telebisyon o social media. 

Kung siya ang masusunod, gusto ni Bahadoran na makasama muli ang kanyang mga naging kasabayan tulad nina Aly Borromeo at Daisuke Sato. Kahit sariwa pa ang kanyang paghayag ng pag-retiro sa professional Football, ipinaliwanag ni Schrock na bukas pa rin siya na sumubok ng ibang anyo ng Football tulad ng 7’s. 

Nilinaw na ang paggamit ng palayaw ay may basbas nina Philippine Football Federation (PFF) Presidente John Anthony Gutierrez at Direktor para sa mga pambansang koponan Freddy Gonzalez. Kamakailan ay nagpasya ang PFF na hindi muna gamitin ang Azkals. 

Tatayong Commissioner ng Asia 7’s si Anton del Rosario at tuloy ang kanyang paniniwala na magiging mabenta ang laro sa mga Pinoy dahil ito ay mabilis at maraming goal. Umaasa siya na ang natamasang tagumpay ng 7’s sa Pilipinas ay kumalat sa buong Asya. 

Kaya FC Iloilo kampeon pa rin sa PFL vs. Davao

ni Anthony E. Servinio @Sports | July 9, 2024

Laro ngayong Miyerkules – Rizal Memorial

4 p.m. One Taguig vs. Manila Digger 

Matagumpay na nanatili sa Kaya FC Iloilo ang kampeonato ng 2024 Philippines Football League (PFL) matapos ang pinaghirapang 1-0 panalo sa Davao Aguilas Linggo ng gabi sa Rizal Memorial Stadium. Inihatid ni Jarvey Gayoso ang nag-iisang goal para sa ikalawang sunod na kampeonato ng koponan sa pambansang liga. 

Pinatawan ng penalty si Reynald Villareal ng Aguilas matapos ang labis na foul kay Gayoso malapit sa goal at walang-kabang ipinasok niya ang penalty kick sa ika-18 minuto – ang kanyang ika-23 ng torneo at lalong nagpatibay ng kanyang liderato para sa Golden Boot o pinakamaraming goal. Naging bayani rin si goalkeeper Walid Birrou na sinuntok palayo ang magpapatabla sana na penalty kick ni Ibrahima Ndour sa ika-83 at mula doon ay kumapit ng husto ang Kaya upang masigurado ang resulta. 

Umakyat ang Kaya sa 37 puntos mula 12 panalo at isang tabla. Hindi na ito mahahabol ng pumapangalawang Dynamic Herb Cebu na may 33 galing 11 panalo at dalawang talo. Nakatanggap ang Kaya ng “tulong” mula sa malupit na karibal Stallion Laguna FC na ginulat ang mga Cebuano noong Sabado, 2-1, sa Borromeo Sports Complex. Bumira ng mga goal sina Magson Dourado (57’) at Griffin McDaniel (61’) bago ang konsuwelo ni Rintaro Hama (90’). 

Ayon kay PFL Commissioner Mikhael Torre, pormal na igagawad ang korona sa Kaya matapos ang laro nila sa Loyola. Magkakaroon ng bihirang laro ng PFL ngayong Miyerkules sa pagitan ng One Taguig FC at Manila Digger sa Rizal Memorial simula 4 p.m. ang laro na gaganapin dapat noong Hunyo 8.