Roque: DDS o hindi, babakunahan

ni Mary Gutierrez Almirañez | May 27, 2021

Nilinaw ni Presidential Spokesperson Harry Roque na walang political discrimination o pamumulitika sa vaccination rollout ng COVID-19 sa ilalim ng administrasyon ni Pangulong Rodrigo Duterte, kaugnay sa isyung prayoridad lamang nito ang mga kapartido.

Aniya, "Scientifically, you can’t discriminate because you’re defeating the purpose of a mass vaccination. No one is safe until we are all safe. It does not make sense if you give priority to areas just because they are political supporters and ignore other areas because the nature of the virus is it does not discriminate against or for political allies or opponents."

Matatandaan namang mahigit 1,600 empleyado ng House of Representatives (HoR) na ang nabakunahan kontra COVID-19 at ilang pulitiko na rin mula sa iba’t ibang local government units (LGU) na nasa high-risk area ng COVID-19 ang napasama sa priority list.

Kabilang din sa isinusulong ng mga opisyal ay ang mas mabilis na vaccination rollout, kung saan inirerekomendang bakunahan na rin ang publiko kahit hindi pa prayoridad sa listahan.

Sa ngayon ay 4,495,375 indibidwal na ang nabakunahan kontra COVID-19. Kabilang dito ang mga healthcare workers, senior citizens at may comorbidities o nasa A1 hanggang A3 priority list.

Inaasahan namang susunod na ang rollout sa ilalim ng A4 at A5, kung saan kabilang ang economic frontliners at mga mahihirap.

Samantala, pinag-aaralan na ng Food and Drug Administration (FDA) ang isinumiteng application para sa emergency use authorization ng Pfizer COVID-19 vaccines upang iturok sa edad 12 hanggang 15-anyos.

"Ang ating mga experts, in-evaluate. In fact, early this evening, I already got the recommendations of our experts and it's very favorable… Within the week, we will issue an amendment and we will be able to use it in children of 12 to 15 years old," sabi pa ni FDA Director General Eric Domingo.

Trial ng 2 magkaibang brands ng bakuna, start na

ni Mary Gutierrez Almirañez | May 24, 2021

Sisimulan na ng Department of Science and Technology (DOST) ang clinical trial hinggil sa paghahalo ng magkaibang brand ng COVID-19 vaccines, batay sa panayam kay DOST Secretary Fortunato dela Peña ngayong umaga, May 24.

Aniya, "Ito po ay magkaibang bakuna sa 2 doses. Meron po tayong 7 bakuna na approved with an EUA (emergency use authorization) pero ‘di po natin masiguro kung darating sa tamang petsa ‘yung kailangang second dose kaya mangangailangan tayo na magkaroon ng kombinasyon ng bakuna."

Nilinaw niyang magpo-focus ang trial sa Sinovac COVID-19 vaccines at ilang candidate na bakuna para i-combine rito.

Dagdag pa niya, "Gagamitin po 'yan para magkaroon tayo ng basis kung alin ang magandang ipag-mix. Puwede naman lahat ‘yan, kaya lang titingnan kung ano ang mas magandang kombinasyon."

Iginiit din ni Peña na tatagal nang mahigit 18 months ang pag-aaral ng DOST, kung saan 1,200 participants mula sa Manila, Rizal, Pasig, Makati, Pasay, Muntinlupa, Cebu at Davao ang nakahandang sumalang.

Sa ngayon ay hinihintay na lamang nila ang approval ng Food and Drug Administration (FDA) at Health Research Ethics Board (HREB) para masimulan ang trial sa Hunyo.

Pfizer COVID-19 vaccines, mas dinumog kesa sa ibang brand

ni Mary Gutierrez Almirañez | May 19, 2021

Pinaaalalahanan ang publiko ng Metro Manila Center for Health Development na magparehistro muna bago pumunta sa COVID-19 vaccination site upang maiwasan ang mahabang pila at patuloy na maipatupad ang social distancing, ayon kay Director Gloria Balboa ngayong araw, May 19.

Kaugnay ito sa nangyaring pila sa ilang vaccination sites sa Metro Manila, kung saan karamihan sa mga pumunta ay nag-walk-in o pumila kahit hindi naka-schedule, kaya may ilang senior citizens at persons with comorbidity ang umuwi na lamang.

Sabi pa ni Balboa, "'Wag po silang pumunta kung hindi pa sila naka-schedule kasi bawat vaccination center, mayroong limit na puwedeng bakunahan for that day... Alam naman natin 'pag pila at ‘di ma-maintain ang social distancing, malaki ang risk na naman na kakalat ang sakit."

Matatandaang dinagsa kamakailan ang rollout ng Pfizer COVID-19 vaccines at ngayo’y ubos na ang suplay sa ilang lungsod.

Bagama’t limitado ang suplay ay kapansin-pansing mas dinumog ang bakunang gawa ng America, kumpara sa ibang brand na inaaloka sa katabing vaccination site, sapagkat hindi ganu’n kahaba ang pila roon nu’ng araw na ‘yun.

Gayunman, tiniyak ni Balboa na ligtas gamitin ang kahit anong brand ng COVID-19 vaccines.

Sa ngayon ay hinihikayat din niya ang publiko na tanggapin ang anumang available na bakuna laban sa virus dahil lahat iyon ay epektibo at aprubado ng Food and Drug Administration (FDA).