2nd dose ng AstraZeneca, ‘di na ituturok sa Australia

ni Mary Gutierrez Almirañez | April 12, 2021

Nilinaw ng Food and Drug Administration (FDA) na wala pang naiulat na nakaranas ng blood clot sa bansa matapos mabakunahan ng AstraZeneca kontra COVID-19, ayon sa panayam kay FDA Director General Eric Domingo ngayong Lunes nang umaga, Abril 12.

Aniya, "So far po, ang ating National Adverse Events Following Immunization Committee, sumulat kahapon na wala naman daw na any cases reported ng blood clotting na connected sa bakuna dito sa atin."

Samantala, inianunsiyo naman ng Prime Minister ng Australia na si Scott Morrison sa kanyang Facebook post na hindi na nila ituturok ang second dose ng AstraZeneca sa mga una nitong nabakunahan dahil sa banta ng blood clot, bagkus ay inirerekomendang gamitin na lamang ang gawa ng Pfizer.

Ayon kay PM Morrison, “The Government has also not set, nor has any plans to set any new targets for completing first doses. While we would like to see these doses completed before the end of the year, it is not possible to set such targets given the many uncertainties involved.”

Batay din sa orihinal na plano ng Australia, tinatarget nilang mabakunahan ang buong populasyon ng bansa sa katapusan ng Oktubre, kaya dinoble nila ang pag-order sa bakunang Pfizer.

“At the end of this past week, it’s also important to note that more than 142,000 doses have been administered to our aged care residents, in more than 1,000 facilities, with over 46,000 of these now being second dose in over 500 facilities,” sabi pa ni PM Morrison.

Sa ngayon ay wala pa ring suplay ng AstraZeneca na dumarating sa ‘Pinas, gayunman patuloy pa ring binabakunahan ang mga senior citizens gamit ang Sinovac kontra COVID-19.

Paliwanag pa ni FDA Director Domingo, "Hindi naman natin itinigil sa senior citizen. Sabi lang natin, 'yung 59 and below, tingnan muna natin ang datos para lang may complete information ang magbabakuna at babakunahan."

Gamot sa COVID, wala raw side effects… Enrile at buong pamilya, uminom ng Ivermectin

ni Mary Gutierrez Almirañez | April 11, 2021

Inirekomenda ni dating Senator Juan Ponce Enrile sa Food and Drug Administration (FDA) at Department of Health (DOH) ang Ivermectin bilang gamot kontra COVID-19, matapos niyang gumaling sa naturang virus dahil umano sa pag-inom nito.

Ayon sa panayam sa kanya, “Pati ‘yung asawa ko, pati ako, mga apo ako, pati lahat ng mga tauhan ko, pinainom ko. Walang naging side effect. Basahin ninyo ang literature niyan, walang namatay pa na recorded.”

Paliwanag ni Enrile, walang doktor na nag-prescribe sa kanya ng Ivermectin, sa halip ay sinubukan niya lamang iyon sa sarili upang malaman kung magiging epektibo sa sakit niyang COVID, gayundin sa ibang miyembro ng pamilya niyang nahawahan ng virus.

Giit pa niya, nagtataka siya kung paano sila nagpositibo sa sakit, gayung hindi naman sila lumalabas ng bahay at wala naman sa kanilang na-exposed sa COVID-19.

Aniya, malaking ginhawa para sa mga mahihirap kung maaaprubahan ng gobyerno ang Ivermectin sapagkat mura lamang ang halaga nito.

Sabi pa niya, “Ako ay nagtataka kung bakit hindi nila sinusubukan, eh, wala naman silang mairekomendang gamot, lalo na sa mga mahihirap. Hindi nila kaya ‘yung gamot na sumasalba sa buhay ng mga may kaya sapagkat mahal, P23,000 per injection yata, eh.”

Mensahe pa ni Enrile sa FDA at DOH, “Kung ako sa kanila, subukan nila. Take a chance. Try it. Anyway, wala namang namamatay... Walang side effect, eh. Wala. Kung may side effect ‘yan, I would be foolish to expose my family to it… I’m not advocating others to follow, in spite of the fact na umiinom kami n’yan, we still wear mask even in the house.”

Matatandaang pinayagan na ng FDA ang ‘compassionate use permit’ sa isang ospital upang gamitin ang Ivermectin sa pasyenteng may COVID-19. Gayunman, hindi rin nila ginagarantiya ang safety at efficacy nito laban sa sakit.

'Di raw epektib na panlaban sa COVID… Ivermectin, may masamang epekto sa utak

ni Mary Gutierrez Almirañez | April 9, 2021

Nilinaw ng mga eksperto na hindi epektibong gamot sa COVID-19 ang veterinary product na Ivermectin, batay sa naging panayam sa miyembro ng Technical Advisory Group (TAG) na si Dr. Edsel Salvana ngayong araw, Abril 9.

Aniya, "The data studies that are coming out really don't show that it's working. Early data showed that maybe it works in a Petri dish, maybe it works in certain subsets of patients, but when they did the big clinical trials with proper controls for any kind of bias, it turns out it doesn't work."

Paliwanag pa niya, "The supposed anti-viral dose of Ivermectin is about 5 times or higher than. So, I'm really concerned as a doctor if there will be toxic side effects because we do know that there are neurologic side effects of Ivermectin if taken at higher dose or even in usual doses.”

Matatandaang pinayagan na ng Food and Drug Administration (FDA) ang ‘compassionate use permit’ sa isang ospital upang gamitin ang Ivermectin sa pasyenteng may COVID-19. Gayunman, hindi rin ginagarantiya ng FDA ang safety at efficacy nito laban sa sakit.

"Unfortunately, we also have, aside from a viral pandemic, we have a pandemic of misinformation where everybody thinks they can read journals, read the science when they're not properly trained to do so. This is something we called epistemic trespassing where experts in some field feel that they can competently talk about something that's not in their field and that's really dangerous," sabi pa ni Dr. Salvana.