Pabrika ng battery nasunog, 22 patay

ni Angela Fernando @Overseas News | June 25, 2024

Isang planta ng lithium battery sa South Korea ang nasunog matapos ang sunud-sunod na pagsabog ng mga baterya nu'ng Lunes, na ikinasawi ng 22 manggagawa, karamihan sa kanila ay mga Chinese nationals.

Kinumpirma ito ng mga opisyal ng mga bumbero sa nasabing bansa na 18 manggagawang Chinese, dalawang South Korean, at isang Laotian ang kabilang sa mga nasawi.

Kumalat ang sunud-sunod na sunog at pagsabog sa battery factory na pinapatakbo ng Aricell manufacturer sa Hwaseong, na matatagpuan sa southwest ng Seoul.

Ayon sa mga opisyal, ang mga biktima ay malamang na nalason ng gas sa loob lamang ng ilang segundo matapos kumalat ang sunog. Hindi pa naman malinaw kung ano ang sanhi ng mga pagsabog at ng sunog na naapula sa loob ng 6 oras.

12-anyos na survivor sa Cabuyao incident, nakakita ng lalaking nagyoyosi bago ang pagsabog

ni Angela Fernando - Trainee @News | February 4, 2024

Nakita ng isang menor-de-edad na nakaligtas sa pagsabog sa Cabuyao, Laguna ang hindi kilalang lalaki na nagyoyosi malapit sa pabrika ng paputok bago ang insidente.

Nakita sa CCTV footage ang 12-taong gulang na kinilalang si John "Denden" Pastrana na nagtatapon ng mga galon ng tubig at tumatakbo patungo sa loob ng isang kalapit na lugar bago nangyari ang pagsabog.

"Binaba ko po yung galon tapos tumakbo po ako dun sa pagkuhaan ko ng bike. Umusok po. Sumabog. Dumapa po ako tapos gumapang po ako papunta rito. Mabagal lang po..." ani Denden.

Pagbabahagi ng ama ng bata na si Leonito Pastrana, nakasalubong niya ang anak na tinatawag siya kaya sinigawan niya ito pabalik at nagpasalamat sa Diyos na hindi sila nito pinabayaan.

Bago pa ang pagsabog, kwinento rin ni Denden na nakita niya ang isang lalaki na nagyoyosi malapit sa bodega.

Saad niya, "Nagsisigarilyo po. Nakatayo po siya, nakaharap tapos nakikipagusap po sa construction worker."

Kasalukuyan namang iniimbestigahan ng kapulisan ng Cabuyao ang bawat anggulo sa nangyaring insidente.

3-anyos, dedo sa sunog

ni Angela Fernando - Trainee @News | January 24, 2024

Patay ang tatlong gulang na batang lalaki dahil sa naganap na sunog sa Nagcarlan, Laguna nitong Martes.

Nangyari sa isang bahay sa F. Urra St. sa Poblacion 1 bandang 4 p.m. ng hapon.

Iniimbestigahan na ng Bureau of Fire Protection - Nagcarlan Fire Station ang naging sanhi ng sunog.

Kasama namang rumesponde ang Municipal Disaster Risk Reduction and Management Office (MDRRMO) sa nangyaring insidente.

Kasalukuyang nakikipag-ugnayan ang Municipal Social Welfare and Development Office at MDRRMO ng Pamahalaang Bayan ng Nagcarlan sa apektadong pamilya para agarang mabigyan ng tulong ng lokal na pamahalaan.