Iskul sa Malabon, nasunog

ni Mary Gutierrez Almirañez | March 27, 2021

Itinaas sa unang alarma ang sunog sa Tonsuya Elementary School sa Malabon City kaninang umaga, Marso 27.

Ayon sa Malabon Bureau of Fire Protection (MBFP), nagsimula ang apoy sa loob ng silid-aralan na nasa ikatlong palapag, kung saan natupok ang mga modules para sa online learning.

Pasado 10:45 ng umaga nang ideklarang kontrolado na ang sunog. Wala namang iniulat na nasugatan o nasawi sa insidente.

Sa ngayon ay iniimbestigahan pa ng MBFP ang dahilan ng sunog, gayundin ang kabuuang halaga ng mga napinsala.

5 patay sa sunog sa Corinthian Gardens, QC

ni Ronalyn Seminiano Reonico | March 20, 2021

Patay ang limang katao matapos masunog ang isang bahay sa Corinthian Gardens, Barangay Ugong Norte, Quezon City ngayong Sabado.

Ayon sa ulat, ang mga nasawi ay miyembro ng pamilyang nasunugan ng bahay at dalawa rin ang naitalang sugatan sa insidente.

Umabot sa second alarm ang sunog na nagsimula sa ikalawang palapag ng bahay, ayon sa Bureau of Fire Protection.

Ayon kay BFP-QC chief of operations Fire Chief Inspector Joseph Del Mundo, nahirapan ang mga bumbero sa pag-apula ng apoy dahil sa secured grills at makakapal na bintana ng bahay. Madilim din diumano at walang emergency light.

Bandang alas-5:25 AM nang naapula ang apoy at tinatayang aabot sa P50 million ang naiwang pinsala ng insidente. Samantala, patuloy pa ring nagsasagawa ng imbestigasyon ang awtoridad.

20 bahay natupok sa sunog, 40 pamilya, apektado

ni Mary Gutierrez Almirañez | March 11, 2021

Dalawampung bahay at 40 pamilya ang apektado sa naganap na sunog sa Dagupan Extension Bgy. 155 Zone 14, Tondo, Maynila kaninang alas-4 nang madaling-araw, Marso 11, ayon sa Bureau of Fire Protection (BFP).

Batay sa ulat, napabayaang kandila mula sa bahay ng pamilya Liwanag ang pinagmulan umano ng sunog. Kaagad kumalat ang apoy sa katabing junkshop hanggang sa tuluyan na ring nadamay ang mga magkakadikit na bahay na yari lamang sa kahoy.

Sa ngayon ay apulado na ang sunog, kung saan tinatayang P100,000 na halaga ng mga ari-arian ang natupok. Samantala, ang mga residente ay nagsimula na ring bumalik sa kanilang bahay para maghanap ng mga kagamitan na puwede pang mapakinabangan.

Wala namang iniulat na nasugatan sa insidente. Iyon nga lang, kapansin-pansing hindi na nasusunod ang social distancing at iba pang health protocols laban sa COVID-19.