Pahiwatig na kulang sa pagmamahal ng karelasyon

Socrates Magnus

Salaminin natin ang panaginip ni Raquel na ipinadala sa Facebook Messenger.

Dear Professor,

Naliligo ako sa batis, tapos sobrang linaw ng tubig at tahimik doon dahil agos lang ng tubig mula sa itaas ng bundok ang naririnig ko.

Sabi ko sa sarili ko, sana ay malapit lang dito bahay namin ‘yun, pero malabo ‘yun mangyari dahil taga-Makati City ako.

Ano itong panaginip ko?

Naghihintay,

Raquel

Sa iyo Raquel,

Malabong mangyari sa tunay na buhay ang iyong napanaginipan, pero ang kahulugan ng iyong panaginip ay puwedeng magkatotoo.

Sabi ng iyong panaginip, very lonely ang love life mo, na ang unang dahilan ay naghahanap ka ng tunay at wagas na pagmamahal. Kaya ibig ding sabihin, kung sakaling may karelasyon ka ngayon, hindi ka masaya at kulang ka sa tamang pagmamahal na dapat ay magmumula sa iyong karelasyon.

Kung nagkataon na ikaw naman ay may asawa na, ganundin ang kahulugan – ikaw ay hindi masaya sa iyong asawa.

Alam mo, ang tao ay isinilang sa mundo para lumigaya, kaya kapag ang tao ay hindi lumigaya, mahirap mang paniwalaan, pero masasaksihan ng iyong mga mata na iiwanan niya ang kanyang kalungkutan at siya ay pupunta sa lugar kung saan niya aakalaing liligaya siya.

Dahil dito, puwedeng tulad ng nasabi na, makahahanap ka ng kaligayahan dahil na rin ito ang kahulugan ng iyong napanaginipan.

Hanggang sa muli,

Professor Seigusmundo del Mundo

Super-lungkot sa siyudad, dapat kumanta ng “bahay kubo” para sumaya

Socrates Magnus

Salaminin ang natin ang panaginip ni Alicia na ipinadala sa Facebook Messenger.

Dear Professor,

May ibinebenta akong bahay na dati ko nang nabili at ‘yung tatlong bintana ay walang takip, as in, nakabukas lang at natatanaw sa labas ang malawak na bukid. May mga tanim na palay, maliwanag ang langit at berdeng dahon ng mga puno.

May buyer kaming buntis, tapos ‘yung asawa ko ay bumibili ng mga gulay sa mga nakabilao – may talbos ng kalabasa, dahon ng mais na panlaga, malunggay at iba pang mga gulay.

Ano ang ibig sabihin nito?

Naghihintay,

Alicia

Sa iyo Alicia,

Saan ka man naroon, ang sabi ng panaginip mo ay nababagot ka na. Ikaw ay makikitang hindi na masaya sa araw-araw na takbo ng buhay mo. Sa totoo lang, ang sinabi kong “saan ka man naroon” ay malamang nasa siyudad ka at malayo sa probinsiya.

Napanaginipan mo ang senaryo sa probinsya dahil kailangang magbago ang pakiramdam mo. Mahirap paniwalaan, pero ang mga panaginip ay tumutulong sa tao para sa ikagiginhawa ng kanyang kalooban.

Ang panaginip mo ay hindi nalalayo sa awiting bayan na nauso noong araw at ito ay ang Bahay Kubo. Nakaaaliw ang awiting ito kaya lahat ng Pinoy noong panahon ‘yun ay inaawit ito. May isa pang mahirap paniwalaan na kapag inawit ito ay may kakaibang saya ang madarama ng Pinoy.

Bilang katuwaan pero isa ring seryosong bagay, bakit hindi mo subukang awitin ang Bahay Kubo? Subukan mo dahil wala namang mawawala sa iyo kapag inawit ito at baka magulat ka pa dahil may kakaibang saya na mapasasaiyo.

Muli, ang panaginip ay gumagawa ng paraan para maibsan o mabawasan ang kalungkutan ng tao, gayundin, puwede siyang tuluyang sumaya at sumigla.

Hanggang sa muli,

Professor Seigusmundo del Mundo

Malaking isda, simbolo ng kaligtasan

Socrates Magnus

Salaminin natin ang panaginip ni Unay Armel na ipinadala sa Facebook Messenger.

Dear Professor,

Ano ang ibig sabihin ng panaginip na may malaking isda na lumapit sa anak kong nanaginip at gustong magpakuha nu’ng isda na parang malaking balyena?

Naghihintay,

Unay

Sa iyo Unay,

Hindi naman gaanong mahirap mag-interpret ng panaginip. Ang totoo nga, simple lang ito at kahit sino ay puwedeng magsabi ng mga kahulugan ng panaginip. Ito ay para lang sa ating mga Pinoy dahil malapit tayo kay Lord at sinasabing sa buong Asia, tayo ay numero-unong kumikilala sa Banal na Kasulatan. Kaya para sa mga gustong matuto ng dream interpretation, ang payo ay magbasa ng Bible dahil dito makikita ang mga simbolo sa panaginip at kanilang mga kahulugan.

Nasusulat, isang malaking isda na parang malaking balyena ang lumapit kay Jonas. Napansin mo ba ang panaginip ay tugma sa naranasan ni Jonas? Ang sabi sa nasusulat, ang isda ay simbolo ng kaligtasan.

Sa mga tunay na Kristiyano, hindi lang Krus ang unang simbolo ng kaligtasan dahil ang isda, larawan ng isda o bagay na hugis isda ay ginagamit ng mga unang Kristiyano para malaman kung sinu-sino ang kanilang mga kapanalig. Kumbaga, kapag ang tao ay walang larawan o bagay na hugis isda, alam na nila ang taong ‘yun ay espiya kaya mag-iingat sila.

Kaya isda ang simbolong ginamit ng mga Kristiyano sa panahon na kung tawagin ay “great persecution” kung saan ang mga naniniwala kay Kristo ay pinapatay. Dahil dito, ang napanaginipan ng anak mo na isda na inilarawan ng Banal na Kasulatan na lumapit kay Jonas ay nagbabalita na siya ay maliligtas sa Covid-19. Ito ay kanyang napanaginipan dahil na rin sa tagong katotohanan na ang anak mo ay lihim na takot sa Covid-19.

Hanggang sa muli,

Professor Seigusmundo del Mundo