Senyales na pakakasalan ni klasmeyt

ni Estrellia de Luna @Panaginip gabay ng buhay | Ika-16 Araw ng Abril, 2024

Analisahin natin ang panaginip na ipinadala ni Lerma ng Makati.

Dear Maestra,

Napanaginipan ko na niligawan ako ng dati kong klasmeyt noong hayskul. May dala siyang necklace, nakangiti siya habang papalapit sa akin at siya na rin mismo ang nagsuot ng necklace na bigay niya. May kasama rin pala itong bracelet, at siya na rin ang nagsuot sa akin. Subalit, kesa na maging masaya, nalungkot at naiyak pa ako.

Ano ang ibig sabihin ng panaginip ko?

Naghihintay,

Lerma

Sa iyo, Lerma,

Ang ibig sabihin ng panaginip mo na niligawan ka ng dati mong klasmeyt, binigyan ka ng necklace ay susuwertehin ka sa pag-ibig. Magkikita muli kayo ng dati mong klasmeyt, at pakakasalan ka niya. Magiging masaya kayo at pagpapalain ang inyong pagsasama.

Ang nakangiti siya ay nagpapahiwatig na tunay ang pag-ibig niya sa iyo, at mahal na mahal ka niya.

Ang may dala rin siyang bracelet ay nangangahulugan na ikaw lang talaga ang mahal niya, at hindi ka na niya pakakawalan pa. Hindi na siya iibig pa sa iba maliban sa iyo, dahil ikaw lang ang mamahalin niya habambuhay.

Samantala, malungkot ka pa rin sa kabila nang ginawa niya at naiyak ka pa ay kabaligtaran ang ipinahihiwatig. Mapupuspos ng kaligayahan ang puso mo, magiging masaya ka sa darating na mga araw, dahil matutupad na rin ang iyong pinakamimithi.

Matapat na sumasaiyo,

Maestra Estrellia De Luna

Nakipagkuwentuhan sa ina, pahiwatig na susuwertehin sa negosyo

ni Estrellia de Luna @Panaginip gabay ng buhay | Ika-15 Araw ng Abril, 2024

Analisahin natin ang panaginip na ipinadala ni Norma ng Quezon Province.

Dear Maestra,

Matagal na kaming hindi nagkikita ng tatay at nanay ko. Mula nang mag-asawa ako, hindi na ako nakauwi sa pamilya ko, dahil sumama ako sa probinsya ng asawa ko. 

Napanaginipan ko na pumunta rito sa bahay namin ang nanay ko. May dala siyang basket na puno ng mga prutas, at nagkuwentuhan kami. 

Noong nakaraang gabi naman, napanaginipan ko ‘yung tatay ko. Kinausap niya ako at pinayuhan kung paano magiging masaya ang pagsasama namin ng asawa ko. 

Ano ang ibig sabihin ng panaginip ko ?

Naghihintay,

Norma

Sa iyo, Norma,

Ang ibig sabihin ng panaginip mo na dinalaw ka ng nanay mo riyan sa bahay n’yo, may dala siyang basket na puno ng prutas ay kasaganahan at kaligayahan sa buhay. Magiging masaya ka na sa piling ng iyong asawa. Sasagana na rin ang pamumuhay n’yo. 

Ang nakipagkuwentuhan ka sa nanay mo ay nagpapahiwatig na magiging masuwerte ka sa negosyo. Kikita ng malaki ang negosyong gusto mong pasukin. Simulan mo na ito agad, huwag na mag-alinlangan pa. 

Samantala, ang dinalaw ka ng tatay mo at pinayuhan ka niya kung paano magiging masaya ang pagsasama n’yo ay babala na may kakaharapin kayong problema sa susunod na araw. Subalit, hindi rin ito magtatagal dahil makakaisip ka rin naman ng paraan para masolusyunan ito.

Matapat na sumasaiyo,

Maestra Estrellia de Luna

Kahulugan ng baku-bakong daan at nadapa

ni Estrellia de Luna @Panaginip gabay ng buhay | Ika-14 Araw ng Abril, 2024

Analisahin natin ang panaginip na ipinadala ni James ng Davao.

Dear Maestra, 

Napanaginipan ko na naglalakad ako sa baku-bakong daan. Madilim ang paligid kaya ‘di ko nakita ‘yung bato, at nadapa ako.

Gayunman, tumayo at nagpatuloy ako sa paglalakad. Mabuti na lang, may nabanaagan akong liwanag sa dako pa roon. 

Ano ang ibig sabihin ng panaginip ko?

Naghihintay,

James

Sa iyo, James,

Ang ibig sabihin ng panaginip mo na naglalakad ka sa baku-bakong daan, madilim ang paligid, at nadapa ka ay makakaranas ka ng mga sagabal sa mga plano mo sa buhay.

Malaki ang magiging problema mo na halos ‘di mo malaman kung paano ito sosolusyunan. Dahil dyan, matatagalan pa bago mo makamit ang tagumpay. 

Samantala, ang nagpatuloy ka sa paglakad hanggang sa may nabanaagan kang liwanag ay nagpapahiwatig na kung hindi ka mawawalan ng pag-asa, patuloy na makikibaka sa mundo, at buong tapang na haharapin ang mga problema, sa dakong huli ay makakaraos ka rin. Uunlad ang iyong buhay at isa ka sa magiging pinakamayaman sa lugar n’yo.

Matapat na sumasaiyo,

Maestra Estrellia de Luna