Kahulugan ng naglaro ng billiard at natalo

ni Estrellia de Luna @Panaginip gabay ng buhay | Ika-20 Araw ng Abril, 2024

Analisahin natin ang panaginip na ipinadala ni Francis ng Batangas.

Dear Maestra,

Napanaginipan ko na naglalaro kami ng billiard ng best friend ko. Natalo ko siya, pero ako ‘yung sinisisi niya sa pagkatalo niya. Sinuntok niya ako sa bibig at agad naman itong dumugo. 

Ano ang ibig sabihin ng panaginip ko?

Naghihintay,

Francis

Sa iyo, Francis,

Ang ibig sabihin ng naglaro kayo ng billiard ng best friend mo ay babala na masasangkot ka sa gulo dahil sa kapabayaan at hindi mo pagiging maingat. 

Ang sinisi ka ng best friend mo dahil natalo siya ay nagpapahiwatig na mananalo ka laban sa mga kaaway mo at makikita mo ang unti-unti nilang pagbagsak. Hindi sila magtatagumpay sa masama nilang binabalak sa iyo.

Samantala, ang sinuntok ka ng best friend mo sa bibig at nagdugo ito ay senyales na mabibigo ka sa gusto mong gawin. May mga sagabal ka pang kakaharapin bago ka magtagumpay sa iyong ninanais.

Matapat na sumasaiyo,

Maestra Estrellia de Luna

Kahulugan ng namasyal sa park at biglang umulan

ni Estrellia de Luna @Panaginip gabay ng buhay | Ika-19 Araw ng Abril, 2024

Analisahin natin ang panaginip na ipinadala ni Siony ng Mandaluyong.

Dear Maestra,

Napanaginipan ko na masaya kaming namamasyal ng mga kaibigan ko sa park nang biglang umambon. Mabuti na lang ay ambon lang. Subalit, ilang minuto lang ang lumipas ay bigla namang bumuhos ang malakas na ulan. Dumilim ang buong paligid at halos wala na kaming makita. 

Ano ang ibig sabihin ng panaginip ko?

Naghihintay,

Siony

Sa iyo, Siony,

Ang ibig sabihin ng panaginip mo na masaya kayong namamasyal ng kaibigan mo sa park ay maaasahan mo sila sa sandali ng kagipitan, at handa ka nilang damayan. 

Ang umambon habang namamasyal kayo ay simbolo ng kasaganahan at kaligayahan.

Sasagana at liligaya na ang buhay mo. Ang isa pang magandang balita ay matatapos na rin sa wakas ang kalbaryong kinakaharap mo sa kasalukuyan.

Samantala, ang biglang bumuhos ang malakas na ulan, dumilim ang buong paligid ay senyales na bago mo makamit ang kaginhawaan, makakaranas ka muna ng mga pagsubok sa buhay na aakalain mong wala ng kalutasan. Subalit, sa tulong ng mga kaibigan mo, malalampasan mo rin ito. Alalahanin mo na lang na lahat ng problema ay may solusyon. Huwag ka agad panghinaan ng loob, dahil may magandang bukas pa na naghihintay sa iyo kung hindi ka mawawalan ng pag-asa.

Matapat na sumasaiyo,

Maestra Estrellia de Luna

Kahulugan ng na-late ang bf

ni Estrellia de Luna @Panaginip gabay ng buhay | Ika-17 Araw ng Abril, 2024

Analisahin natin ang panaginip na ipinadala ni Erlinda ng Roxas City.

Dear Maestra,

Napanaginipan ko na may usapan kami ng dyowa ko na magkikita sa park. Na-late siya ng dating, dahil sa sobrang traffic. Okey lang naman ‘yun sa akin hanggang sa nagkuwentuhan na kami, tawa ako nang tawa dahil sobrang nakakatawa ‘yung kuwento niya. Nang bigla siyang kumuha siya ng candy, binigay niya sa akin, at agad ko naman itong kinain. Ngunit, hindi ko ito nagustuhan dahil ang pait ng lasa nito. 

Ano ang ibig sabihin ng panaginip ko ?

Naghihintay,

Erlinda

Sa iyo, Erlinda,

Ang ibig sabihin ng panaginip mo na may usapan kayo ng dyowa mo na magkikita kayo sa park, ngunit na-late siya ng dating ay nagpapahiwatig na hindi gaanong romantiko ang bf mo. Hindi siya magaling sa kama gaya ng iniisip mo. Hindi malawak ang pang-unawa niya, at hindi rin siya maingat sa mga gawaing kanyang ginagawa. 

Ang tumawa ka nang tumawa dahil sa kuwentuhan n’yo ay babala ng kabiguan.

Mabibigo ka sa mga pinaplano mo sa hinaharap. Maaari ka ring lumuha kapag kayo ang nagkatuluyan. Samantala, ang binigyan ka niya ng candy, kinain mo ito agad ngunit ‘di mo nagustuhan ang lasa nito ay senyales na masasangkot ka sa gulo. Umiwas sa argumento para ‘di ka masangkot anumang kaguluhan. 

Matapat na sumasaiyo,

Maestra Estrellia de Luna