Kahulugan ng isla at mabangong bulaklak

ni Estrellia de Luna @Panaginip gabay ng buhay | January 22, 2024

Analisahin natin ang panaginip na ipinadala ni Flora ng Batangas.

Dear Maestra,

Napanaginipan ko na nasa isang isla ako. Ang ganda ng mga halaman, berdeng-berde ang mga dahon, sariwa at ang bango ng mga bulaklak. Nang biglang dumating ‘yung dyowa ko, hinalikan niya ako sa pisngi at labi, samantalang tuwang-tuwa naman ako sa ginagawa niya, at nag-uumapaw sa galak ang puso ko. 

Ano ang ibig sabihin ng panaginip ko?

Naghihintay,

Flora

Sa iyo, Flora,

Ang ibig sabihin ng panaginip mo na nasa isang isla ka, ang ganda-ganda ng mga halaman, berdeng-berde ang mga dahon, sariwa at mabangong bulaklak ay nagpapahiwatig na pabagu-bago ang isip ng karelasyon mo, may posibilidad na hindi kayo ang magkatuluyan. Gayunman, may makikilala ka namang mas higit sa kanya at mas ka-compatible mo, magiging masaya ka sa kanya at maaaring mauwi sa kasalan ang inyong relasyon. 

Samantala, ang biglang dumating ang dyowa mo, hinalikan ka niya sa pisngi at labi ay nangangahulugang mahal na mahal ka niya, tapat siya sa iyo at handa ka niyang pakasalan. Ang tuwang-tuwa ka, nag-uumapaw sa galak ang puso mo ay senyales na magiging maganda ang iyong kalusugan. Ito rin ay tanda na may mamanahin kang malaking pera mula sa yumao mong kamag-anak. Magugulat ka dahil hindi mo inaasahan na kasama ka pala sa tagapagmana niya.

Matapat na sumasaiyo,

Maestra Estrellia de Luna

Kahulugan ng zoo

ni Estrellia de Luna @Panaginip gabay ng buhay | January 21, 2024

Analisahin natin ang panaginip na ipinadala ni Bert ng Ilocos Sur.

Dear Maestra,

Isa akong animal lover, kaya siguro madalas kong mapanaginipan ang iba’t ibang uri ng hayop. 

Napanaginipan ko na pumunta ako sa zoo, ang una kong nakita ay ang giraffe, sumunod ang donkey at panghuli ay goat. 

Ano ang ibig sabihin ng panaginip ko?

Naghihintay,

Bert

Sa iyo, Bert,

Ang ibig sabihin ng panaginip mo na pumunta ka sa zoo at ang una mong nakita ay ang giraffe. Ito ay sumisimbolo ng mabuting kapalaran, magtatagumpay ka sa iyong mga plano sa buhay. Ang donkey ay nagpapahiwatig na may kaibigan ka na hindi tapat sa iyo. Mabait sila sa iyong harapan, ngunit sinisiraan ka naman nila sa iyong likuran.

Hindi totoo ang ipinapakita niyang kabutihan sa iyo, at may binabalak siyang hindi maganda laban sa iyo. 

Samantala, ang goat naman ay nagpapahiwatig na may lihim kang kaaway. Balak niyang sirain ang iyong reputasyon. Kung ipapakita mo na hindi ka maaring gapiin, agad itong aatras. Matatalo mo sila, at ikaw ang magwawagi.

Matapat na sumasaiyo,

Maestra Estrellia de Luna

Kahulugan ng bago at lumang sapatos

ni Estrellia de Luna @Panaginip gabay ng buhay | January 20, 2024

Analisahin natin ang panaginip na ipinadala ni Rudolf ng Quezon City.

Dear Maestra,

Napanaginipan ko na sumasayaw kami ng girlfriend ko. Ako ay nakapaa lang habang ang dyowa ko naman ay papalit-palit ng sapatos, minsan ay luma, at kadalasan naman ay bago. Ang daming lalaking nakatingin sa dyowa ko habang siya’y sumasayaw, kung kaya’t nagselos ako. Ngunit, siya rin pala ay nagseselos na dahil may mga babae ring humahanga sa style ng pagsayaw ko. 

Ano ang ibig sabihin ng panaginip ko?

Naghihintay,

Rudolf

Sa iyo, Rudolf,

Ang ibig sabihin ng panaginip mo na sumasayaw kayo ng dyowa mo ay magiging masuwerte ka sa darating na mga araw. Ang nakapaa ka habang sumasayaw ay nangangahulugan na masyadong mataas ang mga pangarap mo sa buhay, kaya ang ilan sa mga ito ay nahihirapan kang abutin. Huwag mong pagsabay-sabayin, kumbaga, one at a time lang para mapagtagumpayan mo ang iyong minimithi. 

Ang bagong sapatos na suot ng dyowa mo habang siya’y sumasayaw ay nagpapahiwatig ng paglalakbay sa ibang bansa, at tiyak na magkapag-a-abroad siya, habang ang lumang sapatos naman ay tanda na hindi siya susuwertehin doon. Mahihirapan siyang abutin ang kanyang mga pangarap sa bansang pupuntahan niya. 

Samantala, ang nagselos ka dahil maraming nakatingin na mga lalaki sa dyowa mo habang kayo’y sumasayaw ay senyales ng magulong isipan, maaaring magkaroon ng pagbabago sa takbo ng inyong negosyo, at may hindi inaasahang pangyayari ang darating na siyang magiging dahilan ng pagkalugi n’yo sa kasalukuyan n’yong negosyo.

Ang nagselos din ang dyowa mo dahil may mga babaeng nakatingin at humahanga sa style ng pagsayaw mo ay babala na hindi kayo magkakaunawaan. Magbabago siya ng pakikitungo sa iyo, subalit ang pagbabagong naturan ay ikaw din naman ang maaaring makinabang dahil papabor sa iyo ang mga pangyayari.

Matapat na sumasaiyo,

Maestra Estrellia de Luna