Sign na matatagpuan na ang dream girl

ni Estrellia de Luna @Panaginip gabay ng buhay | Pebrero 4, 2024

Analisahin natin ang panaginip na ipinadala ni Manolito ng Baguio.

Dear Maestra,

Napanaginipan ko na nakatayo ako sa ilalim ng oak tree. May peacock akong nakita, at humanga ako sa ganda ng mga pakpak nito. Dahil sa kalibangan, hindi na ako umuwi sa bahay namin. 

Ano ang ibig sabihin ng panaginip ko?

Naghihintay,

Manolito

Sa iyo, Manolito,

Ang panaginip mo na nakatayo ka sa ilalim ng oak tree ay depende kung ang oak tree ay mayabong maganda, matatag, matibay, malago at may sariwang dahon, ito ay nangangahulugan na uunlad ang iyong negosyo. Ito rin ay nagpapahiwatig na magiging maligaya ka sa piling ng iyong pamilya. Dadami ang iyong kaibigan na kasing dami ng mga berdeng dahon ng oak tree.

Ngunit, kung ang oak tree ay matanda, hindi na malago at tuyot na ang mga dahon, ito ay babala ng kalungkutan. May mga sagabal ka pang haharapin, at madami ka pang pagsubok na daranasin. 

Samantala, ang peacock na may magandang pakpak ay nangangahulugan na magiging matatag ang iyong kabuhayan. Igagalang at titingalain ka sa lipunang iyong ginagalawan. 

Kung bata at wala ka pang asawa, ito naman ay senyales na matatagpuan mo na ang iyong dream girl. Kabilang siya sa mayayamang angkan. Ngunit, alam mo kung ano pa ang nakagugulat? Magkaibigan na kayo sa kasalukuyan at natitiyak kong mauuwi sa kasalan ang iyong relasyon. Hahangaan at titingalain kayo sa lugar n’yo.

Matapat na sumasaiyo,

Maestra Estrellia de Luna

Iba’t ibang kahulugan ng pineapple

ni Estrellia de Luna @Panaginip gabay ng buhay | Pebrero 2, 2024

Analisahin natin ang panaginip na ipinadala ni Dexter ng Malabon.

Dear Maestra,

Napanaginipan ko na may nakita akong pineapple. Sa tuwa ko, binaril ko ng pistol ang mga bunga nito. Ano ang ibig sabihin ng panaginip ko?

Naghihintay,

Dexter

Sa iyo, Dexter,

Ang pineapple ay may kaugnayan sa pag-aasawa. Kung wala ka pang asawa, makikilala mo na ang magiging kabiyak ng puso mo. Pakakasalan mo siya at magsasama kayo habambuhay.

Ngunit, kung may asawa ka na, ito naman ay nagpapahiwatig na makatatanggap ka ng wedding invitation. Magiging masaya, magkakaroon ka rin du’n ng bagong kaibigan at doon mo rin makikita ang matagal mo ng kaibigan.

Samantala, ang natuwa ka dahil binaril mo ang mga bunga ng pineapple ay senyales na magiging maunlad ang kabuhayan mo. Ito rin ay nangangahulugan na magkakaroon kayo ng asawa mo ng mga anak na magbibigay sa inyo ng karangalan. Kikilalanin at magtatagumpay sila sa buhay.

Matapat na sumasaiyo,

Maestra Estrellia de Luna

Kahulugan ng halik sa pisngi at labi

ni Estrellia de Luna @Panaginip gabay ng buhay | Pebrero 1, 2024

Analisahin natin ang panaginip na ipinadala ni Dory ng Calamba, Laguna.

Dear Maestra,

Napanaginipan ko na niregaluhan ako ng dyowa ko ng pabango, singsing, kuwintas at hikaw na may palamuti na perlas. Natuwa naman ang dyowa ko habang isinusuot ko ito, at bigla na lamang niya akong hinalikan sa pisngi at labi. 

Ano ang ibig sabihin ng panaginip ko?

Naghihintay,

Dory

Sa iyo, Dory,

Ang napanaginipan mo na niregaluhan ka ng dyowa mo ng pabango, ito ay pahiwatig na magtatagumpay ka sa lahat ng mga pangarap mo. 

Ang singsing, kuwintas at hikaw na may palamuti na perlas ay senyales ng kaligayahan, tagumpay at karangalan. Liligaya ka sa susunod na mga araw dahil sa malaking tagumpay na nakamit mo. Pararangalan at kikilalanin ka sa pinapasukan mong trabaho. 

Samantala, ang sinuot mo agad ang mga binigay niya sa iyo ay tanda na magpapakasal na kayo ng dyowa mo. Ang natuwa siya at bigla ka niyang hinalikan sa pisngi at labi ay simbolo ng tunay at tapat niyang pag-ibig para sa iyo. Tapat ang pagmamahal na ibinibigay niya para sa iyo at wala siyang tanging iibigin kundi ikaw lamang habambuhay.

Matapat na sumasaiyo,

Maestra Estrellia de Luna