Kahulugan ng riles, Daga at Ahas

ni Estrellia de Luna @Panaginip gabay ng buhay | Marso 17, 2024

Analisahin natin ang panaginip na ipinadala ni Jorge ng Pateros.

Dear Maestra,

Napanaginipan ko na naglalakad ako malapit sa riles ng tren nang biglang may lumitaw na mga daga. May mga ahas din akong nakita papalapit sa akin, naiwasan ko ‘yung isa pero nakagat pa rin ako ng isa.

Ano ang ibig sabihin ng panaginip ko?

Naghihintay,

Jorge

Sa iyo, Jorge,

Ang ibig sabihin ng panaginip mo na naglalakad ka malapit sa riles ng tren ay makakapamasyal ka sa ‘Pinas, ngunit malayo sa lugar na tinitirhan mo sa kasalukuyan, ito rin ay nangangahulugan na darating na ang pinakamamahal mo na matagal ding nawalay sa iyo.

May biglang lumitaw na mga daga ay nagpapahiwatig ng gulo. Masasangkot ka sa gulo dahil sa kagagawan ng isang kaibigan mo na akala mo ay tunay, ‘yun pala ay balak guluhin ang iyong tahimik na buhay.

Kung may asawa ka na, ito ay babala na may magtatangkang wasakin ang pagsasama n’yo.

Samantala, ang mga ahas na nakita mo ay sumisimbolo ng mga kaaway. Ang naiwasan mo ang isa ay tanda na matatalo mo ang iyong kaaway, hindi siya magwawagi sa masama niyang binabalak sa iyo. Magagapi mo siya, subalit ang sabi mo ay nakagat ka ng isa ay dapat kang mag-ingat dahil nand’yan lang sa paligid mo ang iyong mga kaaway at naghihintay lang na umatake sa iyong likuran.

Matapat na sumasaiyo,

Maestra Estrellia de Luna

Pahiwatig na makakapag-asawa na may mataas na posisyon

ni Estrellia de Luna @Panaginip gabay ng buhay | Marso 16, 2024

Analisahin natin ang panaginip na ipinadala ni Norma ng Tanay, Rizal. 

Dear  Maestra,

Napanaginipan ko na nasa palasyo ako. Ang ganda, tahimik, at nakaka-relax, nang bigla akong pinatawag ng reyna, hindi ko alam kung ano ang sasabihin niya hanggang sa nagising na ako.

Ano ang ibig sabihin ng panaginip ko?

Naghihintay,

Norma

Sa iyo, Norma,

Ang ibig sabihin ng panaginip mo na nasa palasyo ka, pinatawag ka ng reyna ay pag-asenso sa buhay. Magulat ka dahil bigla kang makakahawak ng malaking halaga.

Kung wala ka pang karelasyon, makikilala mo na ngayon ang iyong destiny. Ang lalaking iyon ay may mataas na posisyon sa gobyerno at siya na rin ang mapapangasawa mo. 

Samantala, ang ganda, tahimik at nakaka-relax na paligid ay senyales na matatapos na ang mga problema mo. Hindi ka na malulungkot, magiging payapa at panatag na ang iyong buhay. Ngayon na rin bubuhos ang grasya sa darating na mga araw.

Matapat na sumasaiyo,

Maestra Estrellia de Luna

Sign na magtatagumpay sa buhay

ni Estrellia de Luna @Panaginip gabay ng buhay | Marso 13, 2024

Analisahin natin ang panaginip na ipinadala ni Dante ng Bulacan.

Dear Maestra,

Magsasaka ang tatay ko at may kubo kami sa bukid. Madalas kong mapanaginipan ang bukid, pero hindi ang bukid namin. 

Ano kaya ang ibig ipahiwatig ng panaginip ko?

Naghihintay,

Dante

Sa iyo, Dante,

Kung sa panaginip mo ay naglalakad ka sa bukid na may magandang tanim, berde at malago ang mga dahon, ito ay nangangahulugan na matutupad mo na ang mga wish mo. Magtatagumpay ka sa iyong mga pangarap sa buhay. 

Kung sa panaginip mo ay bagong araro pa lang ang bukid, ito ay nagpapahiwatig na makakamit mo ang tagumpay kung patuloy kang magsusumikap sa buhay. Subalit kung tatamad-tamad ka, maaaring gumuho ang iyong mga pangarap. Mabibigo ka sa mga gusto mong marating. 

Samantala, kung sa panaginip mo kampante kang namamahinga sa bahay kubo n’yo, ito ay senyales na magkakaroon ka ng mga bagong kaibigan na maaasahan, matulungin, at masayang kasama.

Matapat na sumasaiyo,

Maestra Estrellia de Luna