Gobyerno, galaw-galaw sa pinupuslit na imported na gulay

@Editorial | October 05, 2021

Kahon-kahon ng mga imported na carrots, broccoli, at iba pang gulay tulad ng bawang, sibuyas, at luya ang nasabat ng Bureau of Customs.

Pawang mga imported, walang permit at ibinebenta sa mga palengke.

Aabot umano sa P4.7 milyon ang halaga ng mga nakumpiskang imported na gulay.

Sobra-sobrang importasyon ng mga gulay ang pumapatay sa kabuhay ng mga lokal na maggugulay.

Kaya dapat lang na ituloy ang imbestigasyon at operasyon laban sa mga nagpupuslit ng imported na gulay. Malinaw na sila lang ang nakikinabang at harap-harapan ang kanilang pananabotahe sa ating ekonomiya.

Bumabaha ng imported na gulay, habang nabubulok naman ang mga lokal. Tone-tonelada ang itinatapon na lang, ibinenta nang palugi o ibinalik na lang sa kanilang mga taniman dahil sa hindi man lang ito binibigyang-pansin.

Sana, sa madaling panahon ay matukoy na kung sino ang mga importer at ang mga taga-gobyerno na sangkot sa pananamantalang ito. Tiyak na meron, dahil hindi naman maglalakas-loob na gumawa ng kalokohan ang mga ito kung hindi protektado ng mga bulok sa gobyerno.

Halos barya na lang ang kinikita ng ating mga magsasaka, susulutin pa.

Nasa gitna tayo ng pandemya at pilit lumalaban ang mga local farmers para sa pamilya, huwag sanang hayaan na tuluyan silang mawalan ng pag-asa.

Marami sa kanila ang baon na sa utang at halos wala ng maituturing na pag-aari dahil ubos na sa pang-araw-araw na gastusin.

Anumang gawain na ilegal at nakaaapekto sa kapakanan ng taumbayan, dapat ginagawan agad ng aksiyon.

Ito ang hamon sa mga nasa gobyerno, lalo na sa mga ahensiyang may hawak sa usaping ito, galaw-galaw, ‘wag patulug-tulog sa pansitan.

Mga bagets, i-ready na sa bakuna

@Editorial | October 04, 2021

Kinumpirma ng Department of Health (DOH) na nakatakda nang bakunahan ng COVID-19 vaccine ang mga menor-de-edad na edad 12 hanggang 17.

Gayunman, nilinaw ng ahensiya na ang mga batang may comorbidities ang uunahin.

Napag-alamang nasa 10% ng kabuuang minors nationwide ang prayoridad sa susunod na dalawa o tatlong buwan habang mino-monitor ang adverse effects ng bakuna sa mga bata.

Matapos bakunahan ang mga batang may comorbidities at yung nasa mga ospital sa Metro Manila, isusunod na ang iba pang mga bata sa buong bansa.

Nagpahayag na rin ang ilang ospital na sila ay tutulong sa pagbabakuna sa mga bata.

Bago ilarga ang pagbabakuna, umaasa tayo na naipaliwanag na nang maayos ang gagawing pagbabakuna. Sa pamamagitan nito ay maiiwasan ang takot at kalituhan.

Mula sa mga kinauukulan na maghahatid ng impormasyon sa mga magulang, tayo naman ang magpapaunawa sa ating mga anak ng kahalagahan ng bakuna.

Anumang alalahanin o duda ay dapat bigyang-pansin agad ng mga awtoridad bago pa unahan ng mga walang magawa sa buhay kundi ang magpakalat ng fake news.

Panahon na para maibalik ang 'buhay' na ninakaw ng pandemya. Sapat na ang mga panahon na tayo'y binalot ng takot. Sikapin nating makapamuhay nang maayos ang ating mga kabataan. Gawan natin ng paraan na maranasan nila ang biyaya ng buhay.

Laban sa ilegal na droga, dapat tuloy lang kahit busy sa pulitika

@Editorial | October 03, 2021

Sa nagpapatuloy na paghahain ng kandidatura para sa susunod na halalan, kapansin-pansin naman ang paglaganap ng ilegal na droga.

Bagama’t abala sa pulitika, nakikita nating tuloy naman ang paglaban ng mga awtoridad sa ilegal na gawain tulad nitong pagpapakalat ng drugs.

Halos sunud-sunod ang buy-bust at hindi biro ang nasasabat na halaga ng droga. Umaabot nang bilyon na kung iisipin, ilang buhay na naman kaya ang malalagay sa panganib?!

Napag-uusapan ang droga, kilala ang administrasyong ito sa war on drugs, at kahapon, inanunsiyo naman ni Pangulong Rodrigo Duterte ang kanyang pagreretiro sa pulitika.

Bagama’t kontrobersiyal, may mga umaasang magpapatuloy ang pagdurog sa mga sangkot sa illegal drugs, kasabay ang maingat na paglulunsad.

Sobrang kawawa ang kabataan kung puro problema ang kanilang hinaharap.

Paano nila pagsasabayin ang pagbangon mula sa pandemya at paglaban sa mga masasamang loob?

Kaya umaasa tayong itong mga nag-aambisyon sa puwesto ay talagang gustong maglingkod sa bayan. ‘Yung may sapat na talino, kakayahan at konsensiya na kakatawan sa bawat mamamayan. ‘Yung kayang tumindig sa karapatan at kaligtasan ng bawat isa. Hindi natatakot at walang ibang hangad kundi ang kabutihan ng sambayanang Pilipino.

Kaya, galingan din natin ang pagkilatis sa mga susunod na lider.