Puwedeng magtalo pero ‘wag mag-aaway

@Editorial | October 10, 2021

Grabe ang mga post at palitan ng komento sa social media ngayon.

Lalong tumindi nang makapaghain na ng kani-kanilang certificate of candidacy ang mga gustong kumandidato sa Halalan 2022.

Kaliwa’t kanan ang batikos, ungkatan ng nakaraan, hanapan ng ambag pati ninakaw.

Kung nakamamatay lang ang mga post, marami nang nawala.

Okay lang sana kung ang mga nagbabasagan, eh, sila-silang mga trolls o bayaran ng mga pulitiko, wala namang silang paki basta sumusuweldo.

Ang problema, may mga netizens na totoong tao — magkakapamilya, magkakaanak, magkakaibigan, magkakapitbahay, magkakatrabaho — na hindi rin nagpapatalo sa kung sino ang sinusuportahan. Sa isang post, maraming komento, nagsasanga ng magkakaibang paniniwala, hanggang sa nauuwi na sa ‘di pagkakaintindihan. ‘Yung isyu sa pulitika, nagiging personal na.

Ang tanong, habang kayong mga supporters ay nag-aaway-away, ano naman kaya ang iniisip ng inyong mga sinusuportahan? Nagkaparinigan na sa mga post, na-block na ang mga friends, family, etc., nagkapalitan na ng masasakit na salita, silang mga pulitiko, may paki ba sa inyo?

‘Ika nga, okay lang magtalo pero ‘wag mag-aaway.

Magkakaiba tayo ng pananaw, karanasan at pinaniniwalaan sa pulitika, wala tayong karapatan na pilitin ang sinuman na sumang-ayon sa atin. Kung gusto mong makahikayat ng kakampi, galingan mo sa pagpapakilala sa iyong kandidato at hindi sa paninira ng iba.

Mahaba-haba ang panahon bago ang eleksyon, marami pang puwedeng magbago, pero sana, matapos ang lahat nang bati-bati pa rin tayo.

Bago o lumang kandidato, basta may konsensiya, pasok!

@Editorial | October 09, 2021

Mahaba-haba ang listahan ng mga gustong kumandidatong pangulo, bise-presidente, senador at partylist representatives.

Bagama’t kahapon ang itinakdang huling araw ng paghahain ng certificate of candidacy (CoC), wala pa umanong maituturing na opisyal na listahan na sasabak sa Halalan 2022.

Ayon sa Commission on Elections (Comelec), hanggang Nobyembre 15 pa magkakaalaman, dahil may pagkakataon pa para sa substitution o pagpapalit ng kandidato.

Pagkatapos ng Nobyembre 15, hindi na papayagan ang substitution maliban na lamang kung namatay o naging incapacitated ang kakandidato o ang tinatawag na involuntary substitution.

Ang pupuwede lamang na pumalit ay ka-apelyido ng namatay o incapacitated ang ipapalit dahil nakaimprenta na sa balota.

Ang tanong, sa dami ng mga nag-aambisyon, ilan kaya o sino kaya sa kanila ang karapat-dapat sa tiwala ng taumbayan?

Kapansin-pansin ang mga bagong mukha pero tila mas marami pa rin ang luma. Silang mga dati nang nahalal o kaya’y itinalaga sa gobyerno.

May mga masasabing subok na sa paglilingkod at meron ding baguhan talaga at wala pang karanasan sa serbisyo-publiko.

Ang unang dalawang tanong, ano ang mga nagawa nila habang nasa puwesto? Ano kaya ang magagawa nila ‘pag nanalo?

Ang mga susunod na tanong, kung wala silang nagawang mabuti noon, bakit pa nangangarap ngayon? Kung walang alam pero nakikipagsapalaran, ano’ng mangyayari sa gobyerno?

Bakit ba laging nasa taumbayan ang bigat ng pagpili?

Hindi ba puwedeng kayo mismong mga kandidato ang sumuri sa inyong mga sarili kung kayo ba ay talagang karapat-dapat na maging lider at kinatawan ng mamamayan?

Alam n’yo sa inyong sarili kung ano ang inyong kakayahan at tunay na layunin sa pagpasok ng pulitika. Isang bagay lang ang inyong kailangan — konsensiya.

Matatamis na salita ng mga kandidato, makabusog sana sa mahihirap

@Editorial | October 08, 2021

Nagpasaklolo na ang mga jeepney drivers sa non-stop na dagdag-presyo sa petrolyo.

Naiisip na ng ilan sa kanila na maitaas sa P12 ang minimum na pasahe mula sa P9.

Anila, ang P9 pasahe sa ngayon ay uubra lamang kung ang presyo ng diesel ay nasa P40 lamang kada litro pero, umaabot na sa P46 ang halaga ng bawat litro ngayon.

Bagama’t hirap na, hindi pa umano nila itutulak ang dagdag-pasahe dahil nauunawaan naman nila ang hirap din na pinagdaraanan ng mga commuters.

Ang nais sana ay mabigyan sila ng gobyerno ng subsidiya sa langis para ‘di mapilitang mag-fare hike. Ganundin ang mapakiusapan umano sana ng gobyerno ang mga kumpanya ng langis na magbigay ng diskuwento dahil ito umano ang pinakamabilis na paraan sa ngayon.

Ayon naman sa Department of Energy, pinag-aaralan na makapagbigay nga ng subsidiya sa sektor ng pampublikong transportasyon. Batid umano ng ahensiya na talagang hataw ang presyo ng langis.

Kaya kailangan talaga natin ng matinding diskarte kung paano haharapin ang araw-araw na pamumuhay sa gitna ng pandemya.

Sa ngayon, sobrang abala na ang marami para sa Halalan 2022. Naririnig na naman natin ang matatamis na salita na sana naman ay nakakabusog din. Ganundin ang mga pangako na ‘wag naman sanang mapako.

Nakakapagod na rin ang pulitika na makulay pero, tila nababahiran ng kasamaan ‘pag mga pulitikong ‘di karapat-dapat ang napupuwesto.

Kaya sa mga botante, galingan ang pagkilatis, huwag magpadala sa anumang pangako o kung anu-anong inaabot. Gamitan natin ng talino at konsensiya an gating pagboto.