Single policy sa pagpapalabas sa mga bata at matatanda, iwas-gulo

@Editorial | October 18, 2021

Kasunod ng pagbaba sa Alert Level 3 ng National Capital Region (NCR), may mga alkalde na nag-aalangan.

Kaugnay nito, una nang nagpahayag ang ilang lungsod na hindi ipatutupad ang general policy na pinapayagan nang lumabas ang lahat ng edad.

Una nang lumabas sa ulat na pinagbabawalan pa ring makalabas ang mga bata, senior citizens at maging ang mga mayroong comorbidities sa Valenzuela, Quezon City, Pateros, San Juan at Parañaque.

Bagama't sa sa San Juan ay pinapayagan naman ang mga bata na lumabas pero para lamang sa essential activities.

Kung hindi magkakaroon ng single policy, posibleng malito at magkagulo ang mga residente ganundin ang mga tagapagpatupad ng batas.

Kaya tama na magpulong muna ang mga alkalde at subukang magkaroon ng iisang panuntunan.

Mahirap na may kani-kanyang polisiya ang mga local government units (LGUs).

Tila nagkaroon pa ng isyu sa ginawang pagbababa sa Alert Level 3 sa NCR, nang sabihing hindi umano kinonsulta ang mga alkalde sa nasabing desisyon, kaya marahil umaapela ang iba sa kanila.

Sana ay maging maayos na ang lahat, maiwasan na sana ang malabong usapan. Kung tayong mga nasa posisyon ay 'di nagkakaintindihan, paano natin pangungunahan ang ating nasasakupan?

Para naman sa mga bata at matatanda na naglabasan na, huwag pasaway at laging sundin ang mga protocols laban sa COVID-19.

Huwag magpabaya, hinay-hinay sa gala at laging mag-ingat.

Ekonomiya unti-unti nang babawi, ‘wag nang pasaway

@Editorial | October 13, 2021

Nagkasundo ang alkalde na iksihan na ang curfew hours sa Metro Manila.

Simula ngayong araw, Oktubre 13, ipatutupad ang curfew hour mula alas-12:00 ng hatinggabi hanggang alas-4:00 ng madaling-araw.

Sa kasalukuyan, nagsisimula ang curfew nang alas-10:00 ng gabi hanggang alas-4:00 ng madaling-araw.

Binago umano ang curfew hours dahil bumababa na ang kaso ng COVID-19 sa Metro Manila.

Kaugnay nito, mas maraming establisimyento na ang magbubukas, mae-extend ang operasyon at unti-unti nang mabubuhay ang ekonomiya na pinadapa dahil sa pandemya.

Ang palagi pa ring pakiusap, huwag magpakampante, palaging sundin ang mga health protocols.

Maiwasan sana nating sumablay ang unti-unting pagluluwag para tuluyan na tayong makausad.

Samantala, panawagan naman sa mga magulang, bantayan ang ating mga anak na pagala-gala. Tila balewala sa kanila ang ipinatutupad na curfew. Meron pa ring nakatambay sa labas, pumupuslit ng tagay at ang masaklap may ilan na nagagamit pa sa ilegal na gawain.

Ang curfew ay ipinatutupad para malimitahan ang tao sa labas, lalo na kung wala namang mahalagang pupuntahan.

Bukod sa iniiwasan natin ang pagkakaroon ng COVID-19 at iba pang sakit, gusto rin nating makalayo sa anumang uri ng krimen.

Gamitin natin ang mga pagkakataon na tayo’y higit na nakakakilos sa mabubuting gawain o may pakinabangan at hindi para magpasaway.

Gov’t employees na walang ‘K’, out!

@Editorial | October 12, 2021

Bago pa tayo magpalit ng mga lider, mainam na ipagpatuloy at mas patindihin pa ang paglilinis sa gobyerno laban sa mga kurakot.

Napag-alamang simula noong Enero hanggang Setyembre, umabot na sa 567 kawani ng Bureau of Customs (BOC) ang nasapul sa anti-corruption campaign. Sa naturang bilang, tatlo ang tinanggal sa serbisyo, may 12 na sinuspinde, anim ang napagsabihan, anim ang naalis sa puwesto, bukod sa 543 na na-reshuffle dahil sa mga ilegal na aktibidad.

Bukod pa rin dito, 126 kawani ang inimbestigahan na nagresulta sa paghahain ng mga kasong administratibo.

May 57 kaso naman ang ipinadala na sa NBI at may isa na isinumite sa Ombudsman.

May 516 show-caused orders din ang inisyu sa mga kawani simula noong Enero.

At hindi lang sa BOC may mga pasaway, halos sa lahat ng ahensiya ng gobyerno ay hindi nawawala ang mga korup.

‘Yung iba, halos inabot na lang ng pagreretiro, paggawa pa rin ng kalokohan ang inaatupag.

Masyadong nasisilaw sa pera at kapangyarihan.

Hindi nila nauunawaan ang tunay na kahulugan ng pagtatrabaho sa pamahalan. Kayo ay tinanggap o itinalaga sa inyong posisyon bilang mga public servant.

Ngayong mag-e-eleksiyon na naman, magpapalit ng mga opisyal, tiyak na may mga mananatili at meron ding mga papasok na bago. Riyan pa lang, duda na tayo na sila’y maglilingkod sa taumbayan.

Dapat talagang baguhin at higpitan ang pagkuha ng mga empleyado sa gobyerno. Hindi puwede ang palakasan at wala namang alam.

Maraming mas may ‘K’ na maglingkod sa taumbayan kung nabibigyan lang sana sila ng patas na pagkakataon.