Gobyerno, dapat ready sa tigil-pasada

@Editorial | March 1, 2023

Isang linggong tigil-pasada, mula Marso 6 hanggang 12, ang ikinasa ng iba't ibang transport group.

Ito ay bilang pagtutol sa nakaambang phaseout sa mga traditional jeepney, UV Express at multicab na bigong sumanib sa mga kooperatiba para sa Public Utility Vehicle Modernization Program (PUVM) ng gobyerno.

Aabot sa 40,000 units ng traditional jeepneys at UV Express ang inisyal na magtitigil-pasada oras na hindi bawiin ng Land Transportation Franchising and Regulatory (LTFRB) ang Memorandum Circular 2023-013 ukol sa PUV Modernization.

Humihingi naman sila ng paumanhin sa mga pasaherong maaapektuhan ng kanilang tigil-pasada.

Nauunawaan natin ang hinaing ng mga operator at driver na hirap talagang makatugon sa bagong programa gayunman, hindi maiiwasan na maaapektuhan din talaga ang publiko kapag natuloy ang kanilang protesta. Mahaba-mahaba ang isang linggo, tiyak na naiisip na ng mga komyuter ang mala-kalbaryong sitwasyon. Apektado ang trabaho at negosyo. Napakahalaga ng transportasyon, kaya nitong patigilin ang ekonomiya.

Kaya dapat tutukan ng kinauukulan ang usapin sa PUV Modernization, baka sakaling may paraan pa upang hindi matuloy ang malawakang tigil-pasada.

Naniniwala tayo na magiging maayos din ang lahat kung mapag-uusapan. Kailangan lang ng magandang plano, pakikinig at pagkakasundo.

"Anti-flood master plan” sa M. Mla., kumusta ba?

@Editorial | August 26, 2022

Mula noon hanggang ngayon, problema pa rin ang baha.

Ang masaklap, mukhang patindi nang patindi ang sitwasyon, partikular sa Metro Manila.

Kaya nais paimbestigahan sa Kamara ang estado at kakayahan ng “anti-flood master plan” para sa Kalakhang Maynila at mga kalapit na lugar. Ito ay para matiyak ang “cost-effective” na paggastos para sa naturang plano.

Layon ding makahanap ng mga solusyon sa lumalalang pagbaha.

Batid naman natin na isa ang Pilipinas sa mga bansang madalas tamaan ng kalamidad na mayroong average na 20 bagyo kada taon.

Napag-alamang mayroong P350 billion Metro Manila Flood Management Master Plan, na roadmap ng pamahalaan at naka-programa mula 2012 hanggang 2035. Kumusta kaya ang proyekto?

Samantala, bukod sa pagkakaroon ng epektibong proyekto kontra baha, napakahalaga na lahat ay nakikibahagi sa paglutas sa problema.

Kung lahat ay disiplinado, kahit paano ay mapipigilan ang grabeng baha. Matagal nang sinasabi na kontrolin ang basura, itapon nang maayos, pero marami pa rin ang pasaway.

Huwag nating hintaying mas lumala ang sitwasyon na bigla na lang tayong lumubog sa baha. Walang ibang panahon kundi ngayon.

Alamin at makiisa sa mga programa at proyekto para makaiwas sa pagbaha. Huwag nang pasaway, plis lang!

Fake news sa halalan, bantayan!

@Editorial | February 13, 2022

Nagbigay ng katiyakan ang Commission on Elections (Comelec) sa publiko na sapat ang suplay ng kuryente at walang mararansang power interruption sa araw mismo ng halalan sa Mayo.

Ayon sa tagapagsalita ng Comelec, sa ngayon ay tuluy-tuloy ang kanilang pakikipag-ugnayan sa mga major power supplies at electric cooperatives sa buong bansa para matugunan ang isyu sa power supply pagdating ng halalan.

Mayroon na umano silang binuong working group na tututok dito na siyang makikipag-ugnayan sa iba’t ibang power producers sa bansa.

Kung magsasagawa ang mga electric companies ng schedule power interruptions tulad ng maintenance breaks ay kailangan nila itong malaman para maiwasan ang critical moments.

Napag-alamang sa mga nakaraang eleksiyon, mayroon namang naka-standby na power generator ang Comelec kung sakaling magkaroon ng power interruption, lalo na’t automated na ang halaan.

Ang mga ganitong isyu ang isa sa mga dapat mabigyang-linaw agad ng kinauukulan upang hindi magdulot ng pangamba o duda sa taumbayan.

Bagama’t ilang buwan pa bago ang eleksiyon, mas mainam na handa at nasa maayos ang lahat.

Babala naman sa mga walang magawa sa buhay kundi ang magpakalat ng fake news kaugnay sa eleksyon, manahimik na kayo, utang na loob.