Gobyerno, isip pa more ng mga programang may pakinabang sa taumbayan

ni Ryan Sison @Boses | June 15, 2023

Aprub na ni Pangulong Ferdinand “Bongbong” Marcos, Jr. ang pagsasama sa mga single o solo parent at mga breastfeeding mom sa food stamp program ng pamahalaan.

Ayon kay Palace briefer Daphne Paez, ang pagsasama sa mga solo parent at mga inang nagpapasuso ay magpapalakas sa First 1,000 Days Program ng gobyerno na layong matugunan ang stunting o ‘pagkabansot’ sa pamamagitan ng maternal nutrition at tamang child-feeding practices na kinakailangan.

Inihayag din ni Department of Social Welfare and Development (DSWD) Secretary Rex Gatchalian na ang marching order ng Pangulo ay dapat malabanan ang kagutuman at pagkabansot ng mga bata, at pagsanib-puwersa ng iba pang programa ng gobyerno upang hindi aniya sila maging piece-by-piece ang turing dito.

Inilarawan ni Gatchalian na ang unang 1,000 araw, mula sa pagbubuntis hanggang sa paggagatas o lactation bilang isang “crucial period".

Gayundin aniya, sa mga pag-aaral lumalabas na ang pagkabansot ay nangyayari na sa oras na ang ilang mga bata ay umabot sa daycare.

Ayon naman kay Department of Health (DOH) Secretary Ted Herbosa, humigit-kumulang 1 sa 5 batang Pilipino na may edad 0-23 buwang gulang at 28.7% ng mga batang wala pang 5 taong gulang ay bansot.

Batay sa DSWD, layon ng pilot testing ng food stamp program na sisimulan sa Hulyo ay matulungan ang nasa 1 milyong pinakamahihirap na pamilya. Makatatanggap ang mga target na benepisyaryo ng food credits na nagkakahalaga ng P3,000 para makabili ng piling listahan ng mga pagkain mula sa DSWD-accredited local retailers.

Malaking tulong ang maibibigay ng food stamp program ng gobyerno sa ating mga single parent at mga inang nagpapasuso.

Napakahalaga sa kanila ang pagkakaroon ng tamang nutrisyon na kinakailangan at magandang kalusugan. Matututukan din ang kanilang mga anak na lumalaking malusog at hindi mga bansot.

Sa kinauukulan, lagi sanang may ganitong mga programa na malaking pakinabang sa mga mamamayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Ayuda sa senior, huwag gamitin sa pulitika!

@Editorial | April 2, 2023

Nalalapit na ang Barangay at Sangguniang Kabataan Elections, tiyak gagawa na naman ng eksena para mabahiran ito ng pamumulitika at fake news.

Tulad ng usapin kamakailan na kumukuwestiyon sa ilang local government units (LGUs) na nagbabawal umano na makakuha ng benepisyo ang mga senior citizens na hindi rehistradong botante.

Nilinaw ng Department of the Interior and Local Government (DILG) na hindi kailangang magrehistro ng senior bilang botante para makatanggap ng mga benepisyo mula sa kanilang lokal na pamahalaan.

Sa ilalim ng Republic Act 7432 na inamyendahan ng RA 9257 at 9994, nakasaad na ang mga Pilipino na edad 60 pataas ay entitled na makatanggap ng 20% diskuwento sa mga bilihin at serbisyo mula sa lahat ng mga establisimyento.

Entitled din ang mga senior sa assistance mula sa gobyerno pagdating sa employment, edukasyon, kalusugan, social services, programang pabahay, access sa pampublikong transportasyon, insentibo para sa social care at social pension.

Ginawa ng ahensya ang pahayag kasabay ng inilabas na Memorandum Circular 2023-045 na nagbibigay-diin sa mga benepisyo na dapat matanggap ng mga senior citizen kahit na hindi sila botante.

Kailangan lamang na magsumite ng katibayan na residente sa naturang lokal na pamahalaan, barangay certification, at anumang valid government ID na may nakalagay na address para ma-claim ang mga nabanggit na benepisyo.

Malinaw ‘yan, lahat ng senior citizen, botante man o hindi ay may karapatan sa ayuda mula sa gobyerno.

Sa mga nagpapakalat ng fake news at namumulitika, tigilan n’yo!

Takot sa gastos sa pagpapa-checkup, dahilan ng malalang pagkakasakit

@Editorial | March 3, 2023

Isa sa masasabing nagpapalala sa karamdaman ng tao ay ang hindi pagpapatingin sa doktor.

Marami sa ating mga kababayan ang natatakot magpa-checkup dahil sa gastos.

Kaya dapat itong mabigyan na ng pansin ng kinauukulan.

Sa ngayon, isinusulong na ng ilang mambabatas ang free medical checkup sa bansa sa lahat ng members sa Philippine Health Insurance Corporation o PhilHealth.

Sa pamamagitan nito ay masisiguro na lahat ay may sapat na access na matugunan ang iniindang karamdaman o para malaman kung mayroon mang potential serious health condition ang isang tao.

Sa ilalim ng Universal Health Care Act, lahat ay automatic na member ng PhilHealth, at kailangan umano na kasama na sa benepisyo ng nasabing ahensya ang free medical checkups.

Ang paglalaan ng oras sa free medical checkups ay malaki ang maitutulong sa pagsalba ng buhay ng isang tao.

Sana maging mas seryoso ang gobyerno sa panukalang ito. Kalingain natin ang lahat ng mamamayan, anumang estado sa buhay.

Nakasalalay sa kalusugan ang isang maayos na pamayanan. Gamitin natin ang pondong mayroon tayo para maging maayos ang kalagayan ng bawat isa.

Napakalaking bagay na hindi na pinoproblema ng mag-anak kung saan kukuha ng panggastos.

Ilapit natin sa taumbayan ang serbisyong medikal nang wala nang pagsasakripisyo.