Pagtugon sa gutom dahil sa El Niño, ipagpatuloy

@Editorial | April 22, 2024

Umabot na sa 1.7 milyong katao ang apektado ng mainit na panahon dulot ng El Niño phenomenon.

Partikular na tinukoy ay sa Regions 2, 3, Mimaropa, 5, 6, 7, 9, 12 at Cordillera Administrative Region.

Ayon sa Department of Social Welfare and Development (DSWD), patuloy naman ang kanilang pagsubaybay at pagbabantay sa mga pamilyang apektado ng tag-init at mapaglaanan ng tulong ang mga ito kung kinakailangan.

Nagkakaloob na rin umano sila ng family food packs at financial assistance sa mga pamilya na apektado ng El Niño.

Batid naman natin na ang mga magsasaka ang matinding naapektuhan dahil sa hindi

magandang ani na resulta ng mainit na panahon gayundin ang mga mangingisda na hindi gaanong makapaglayag dahil sa tindi ng init. Kaya sila ang masasabing higit na nangangailangan ng tulong.

Umaasa tayo na ipagpapatuloy ng gobyerno ang pagtugon sa gutom at paggawa ng paraan kung paano sila higit na matutulungan sa kanilang kabuhayan.

Kailangang mabigyan ang mga magsasaka at mangingisda ng alternatibong hanapbuhay. Sa pamamagitan nito, walang mapipilitang magbuwis-buhay sa matinding init para may pantustos sa pangangailangan.

Mga taga-gobyerno na astang hari sa daan, tuluyan

@Editorial | Abril 13, 2024

Bukod sa malalang trapik at sira-sirang kalsada, isa sa nakakapag-init pa ng ulo ay ang mga astang hari sa lansangan.

Sila ‘yung mga kapalmuks na taga-gobyerno na ayaw na naiipit sa trapik kaya gumagamit ng sirena, blinkers at iba pang signaling o flashing devices.

Ang nakalulungkot, tila walang magawa ang mga otoridad partikular ang mga traffic enforcers. Sa halip na harangin at hulihin, may pagkakataon na sila pa ang humahawi sa ibang motorista para magbigay ng daan sa mga VIP kuno.

Pero, ngayong ipinagbawal na sa lahat ng mga opisyal at empleyado ng gobyerno na gumamit ng wang-wang, blinkers at ibang katulad na devices, tingnan natin kung may matigas pa rin ang ulo na susuway.

Batay sa Administrative Order No.18, ang hindi otorisado at pagkalat ng wang-wang at iba pang devices ay nagdudulot ng pagkaantala ng trapiko at hindi ligtas na mga kalsada at kapaligiran.

Samantala, hindi naman sakop ng direktiba ang Armed Forces of the Philippines (AFP), National Bureau of Investigation (NBI), Philippine National Police (PNP), fire trucks, hospital ambulances at iba pang emergency vehicles.

Kasunod nito, magsasagawa umano ng crackdown ang PNP laban sa mga motorista na patuloy na gumagamit ng sirena at blinkers.

Paalala, hindi lang mga taga-gobyerno ang bantay-sarado kundi lahat ng nasa kalsada.

Sa ilalim ng PD 96 walang penalty sa mga first offense subalit, kukumpiskahin ang mga blinkers habang may criminal liability na sa ikalawang offense at pagkakakulong ng hanggang anim na buwan. Hindi rin ligtas ang mga nagbebenta ng wang-wang at blinkers.

Apela sa ating mga lider at kinatawan sa gobyerno, bilang tayo ang nagpapatupad ng batas, magsilbi sana tayong ehemplo at hindi 'yung pasimuno pa ng pagpapasaway. 

Presyo ng bigas, imbes bumaba, lalo pang tumaas

@Editorial | November 29, 2023

Maramina ang umaaray sa patuloy na pagtaas ng presyo ng bigas. Taliwas sa mga ulat na pababa na ang presyo matapos bumaba ng 2% ang presyo ng regular milled rice nitong Oktubre sa P42.21 per kilo mula sa P43.05 noong Setyembre.

Bumaba rin umano ang presyo ng well milled rice ng 2.1% sa P45.76 per kilo mula sa P46.75 noong Setyembre.

Iginiit din na maraming suplay ng bigas sa bansa at hindi lamang ito nailabas nang tama, bagay na sana'y inaayos na ng gobyerno, mula sa pagtatanim, processing hanggang sa distribusyon at retail para maramdaman naman ang mas pinahusay na produksyon sa sektor ng agrikultura.

Ang problema, nagbabanta na namang tumaas pa ang presyo ng bigas ngayong Kapaskuhan.

Nananatili raw na mataas ang farmgate price ng palay ngayong patapos na ang anihan.

Nagbabala na rin ang isang grupo na posibleng pumalo sa 60 pesos kada kilo ng bigas sa mga susunod na linggo kung magpapatuloy ito.

Sa ganitong sitwasyon, sana'y malaman agad ng pamahalaan kung bakit iba ang nangyayari sa tila ibinibida? Ang sinasabing pagbaba ng bigas, bakit naging pataas?

Dapat ding mas paigtingin ang inspeksyon sa mga bodega ng bigas dahil baka may mga nakakalusot na naman.

Napakahalaga ng bigas, halos ito na lang ang pumupuno sa sikmura, kahit wala ng ulam, mabusog lang.