Kapayapaan sa gitna ng tensyon

by Info @Editorial | Mar. 13, 2025

Ang pag-aresto kay dating Pangulong Rodrigo Duterte ay nagdulot ng matinding reaksyon mula sa magkabilang panig ng ating lipunan. Ang mga tagasuporta ni Duterte, na itinutring bayani ng ilan dahil sa mga hakbang na ginawa niya laban sa krimen at droga, ay nag-aalala at nagagalit sa kanyang pagkakaaresto, na tinitingnan nila bilang isang pambansang dagok at isang paraan ng pamumulitika. 

Sa kabilang banda, ang mga kritiko ni Duterte, na naniniwala na siya’y dapat panagutin sa mga alegasyon ng paglabag sa karapatang pantao at mga pag-abuso sa kapangyarihan, ay tumitingin sa kanyang pagkakaaresto bilang hakbang tungo sa katarungan at pananagutan. Sa kabila ng magkaibang pananaw, isang bagay ang malinaw, ang kapayapaan ay isang bagay na kailangan nating pangalagaan sa gitna ng lahat ng tensyon. 

Ang mga pro at anti-Duterte ay parehong may karapatan na ipahayag ang saloobin at opinyon, ngunit ang pagiging bukas sa pag-unawa at respeto sa pagkakaiba-iba ng pananaw ay napakahalaga sa pagbuo ng isang maayos at matatag na lipunan. 

Sa panahon ng kaguluhan, ang pinakamahalaga ay hindi ang pag-aaway o paghahati, kundi ang pagtutok sa kung paano natin maisusulong ang isang mas makatarungan at maayos na lipunan. 

Sa pagtanggap sa ating mga pagkakaiba, mas mapapalakas natin ang ating demokratikong sistema at magiging mas maayos ang ating pagharap sa mga hamon ng ating bansa. 

Ang mga kaganapan ngayon ay hindi tungkol sa pagkatalo o pagkapanalo ng isang panig, kundi ang pagiging makatarungan at ang pagpapahalaga sa dignidad ng bawat isa.

Mga epekto ng kaliwa’t kanang sugal online, dapat bantayan

by Info @Editorial | Mar. 12, 2025

Sa nakalipas na mga taon, patuloy na lumalawak ang industriya ng online gambling sa Pilipinas. 

Kasabay ng mga makabagong teknolohiya at mas madaling access sa internet, ang mga online gaming platforms ay nagsilbing libangan at oportunidad para sa mga tao, ngunit sa likod ng mga benepisyong ito ay may nakatago ring panganib na hindi maikakaila. 

Ang isyu ng online gambling ay nararapat lamang na masusing pag-aralan, hindi lamang para sa kaligtasan ng mga manlalaro, kundi pati na rin sa pangangalaga ng ekonomiya at moralidad ng bansa. 

Ayon sa mga eksperto, ang pagkakaroon ng madaling access sa online gambling ay nagdudulot ng mas maraming kaso ng adiksyon sa pagsusugal. 

Dahil ang mga laro ay available 24/7, maraming tao ang nagiging lubos na dependent dito, na nagiging sanhi ng personal na problema, pagkawala ng pera, at pagkasira ng relasyon sa pamilya at kaibigan. 

Sa kabilang banda, may mga nagsasabi na ang online gambling ay may ambag din sa ekonomiya at gobyerno sa pamamagitan ng trabaho at buwis.

Gayunman, kailangang patuloy na magpatupad ng mahigpit na regulasyon upang matiyak na ang industriya ay hindi magiging sanhi ng mas maraming problema sa lipunan. Dapat ding magsagawa ng mga programang pang-edukasyon upang turuan ang publiko, lalo na ang mga kabataan, ukol sa mga negatibong epekto ng pagsusugal at kung paano maiiwasan na maadik dito. 

Ang pagbabalanse ng mga benepisyo at panganib ay isang mahalagang hakbang upang matiyak na ang pagsusugal, sa kahit anong paraan, ay hindi magiging sagabal sa ating pag-unlad at moralidad bilang isang bansa.

Proyekto ng gobyerno, ‘wag gamitin sa kampanya

by Info @Editorial | Mar. 11, 2025

Sa bawat halalan, sadyang may mga incumbent official na sinasamantala ang pagkakataon na gamitin ang kanilang posisyon upang mapalakas ang kanilang kampanya bilang kandidato.

Karaniwan itong nakikita sa mga poster, tarpaulin, at iba pang materyales pampubliko kung saan ipinapakita ang kanilang mukha, kasabay ng pagpapakilala ng mga proyekto at programang ipinagkaloob ng gobyerno. 

Sa unang tingin, ang ganitong istayl ay mukhang isang natural na bahagi ng kampanya, ngunit may mga seryosong isyu na dapat isaalang-alang. 

Ang mga proyekto ng gobyerno ay hindi dapat maging entablado para sa personal na ambisyon ng mga opisyal. Ang bawat proyekto o programa ay may layunin na makapaglingkod at magbigay ng benepisyo sa taumbayan, hindi para magbigay ng pagkilala o papuri sa isang tao. 

Kapag ang mukha ng isang incumbent official ay ipinapakita sa mga poster ng mga proyekto, maaaring magmukhang ito ay isang uri ng “personal branding” na nagiging sanhi ng kalituhan sa publiko. 

Ang ganitong gawain ay isang anyo ng maling paggamit ng pera ng bayan. 

Bilang botante, supalpalin ang mga epal at abusadong opisyal. Kailangang kilatising maigi ang mga lider na ihahalal.

Tandaan natin, ang mga proyekto at programa ng gobyerno ay hindi para sa pagpapabango ng imahe ng pulitiko kundi para sa kapakanan ng buong bayan.