Respeto sa lahat kahit magkakaiba ang paniniwala

by Info @Editorial | Mar. 16, 2025

Sa tuluyang pagharap ni dating Pangulong Rodrigo Duterte sa International Criminal Court (ICC) kaugnay sa “war on drugs” na nangyari sa ilalim ng kanyang administrasyon, mas lalo namang naging mainit ang “word war” sa pagitan ng mga pro at anti-Duterte.

Madalas ang mga isyu sa pulitika ay nagiging sanhi ng matinding hidwaan, lalo na sa mga pahayag na puno ng emosyon at galit. 

Sa isang demokratikong lipunan, ang pagkakaroon ng magkakaibang paniniwala sa pulitika ay isang bagay na likas at hindi maiiwasan. 

Sa kabila ng mga pagkakaibang ito, isang mahalagang papel na dapat itaguyod ng bawat isa ay ang respeto sa mga magkakaibang paniniwala sa pulitika. 

Ang respeto ay hindi nangangahulugang pagsang-ayon sa opinyon ng iba, kundi isang pagpapakita ng malasakit at paggalang sa kanilang karapatang magkaroon ng sariling pananaw. 

Sa halip na magtulungan tayo sa pagpapalaganap ng poot o pagkakawatak-watak, ang tunay na diwa ng demokrasya ay ang pagkakaroon ng malaman na pag-uusap, pagpapalitan ng opinyon at ang pagpapakita ng pagiging bukas sa mga ideya ng iba. 

Ang mga debate ay bahagi ng demokratikong proseso, ngunit ito ay magiging makulay

at produktibo lamang kung ito ay gagawin nang may malasakit sa kapwa. 

Habang ang pagkakaiba ng opinyon ay hindi maiiwasan, ang pagiging magalang at mahinahon sa pagpapahayag ng ating mga saloobin ay isang susi upang maiwasan ang karahasan. 

Tandaan, hindi lahat ng tao ay may parehong karanasan o pananaw, kaya’t may mga pagkakataon na ang kanilang opinyon ay binuo mula sa ibang konteksto. 

Sana sa kabila ng ating pagkakaiba, ang ating layunin ay pareho: ang mapabuti ang ating bansa at ang buhay ng bawat isa.

Publiko, mas iinit sa back-to-back taas-singil sa kuryente at tubig

by Info @Editorial | Mar. 15, 2025

Kasabay ng init ng panahon, tiyak na mas iinit ang ulo ng mamamayan dahil sa inaasahang taas-singil sa kuryente at tubig.

Ngayon pa lang ay inabisuhan na ng Independent Electricity Market Operator of the Philippines Inc. – Wholesale Electricity Spot Market ang publiko hinggil sa posibleng pagpapatupad ng taas-singil sa kuryente sa Mayo.

Nabatid na ang Electricity Market Operator of the Philippines Inc. – Wholesale Electricity Spot Market ang pinagkukunan ng supply ng kuryente ng Meralco na siya namang nagbebenta ng kuryente sa buong Metro Manila at mga kalapit na lalawigan.

Posible umabong umabot sa anim na piso ang itataas sa singil sa kuryente sa Mayo, panahon na peak ang demand sa kuryente dahil na rin sa nararanasang init ng panahon.

Samantala, bago ang dagdag-singil sa kuryente, mauuna munang magtaas ang singil sa tubig sa Abril, para sa mga regular customer ng Manila Water sa Metro Manila at karatig lalawigan.

Ang taas-singil sa tubig ay ipatutupad matapos aprubahan ang Foreign Currency Deposit Adjustments (FCDA) o tariff adjustment sa Manila Water Company Inc.

Bagama’t ang mga kumpanya ng kuryente at tubig ay may mga dahilan sa likod ng kanilang hakbang, nananatili ang tanong: saan na patungo ang ating mga mamamayan kung ang mga basic na serbisyo ay patuloy na nagiging hindi abot-kaya? 

Ang gobyerno ay may malaking papel upang tiyakin na ang mga pagtaas ng singil ay may makatarungang basehan at hindi magdudulot ng labis na pagdurusa sa mga mamamayan. 

Sa huli, ang back-to-back na taas-singil sa kuryente at tubig ay isang malinaw na senyales na ang mga mamamayan ay patuloy na nakikipaglaban sa mga hamon ng buhay. 

Triple-ingat vs. fake news

by Info @Editorial | Mar. 14, 2025

Sa panahon ngayon, sa panibagong isyu sa pulitika, masasabing malaking hamon ang paggamit ng social media. 

Mas mabilis kumalat ang balita at mas lantad ang publiko sa maling impormasyon.

Ang social media, na itinuturing na isang makapangyarihang kasangkapan para sa pagpapalaganap ng opinyon at ideya, ay may malaking papel sa paghubog ng pananaw ng mga tao. 

Gayunman, ito rin ang pinakamadaling daluyan ng fake news — ang maling impormasyon na maaaring magdulot ng pagkalito at paglala ng mga isyu, lalo na sa mga mainit na usapin sa pulitika. 

Kailangan ng triple-ingat na ang ibig sabihin ay tatlong antas ng pag-iingat bago tayo magtiwala, magbahagi o magkomento sa anumang balita. 

Una, maging mapanuri. Maglaan ng oras upang tiyakin ang pinagmulan nito. Kung ang impormasyon ay mula sa isang hindi kilalang website, isang social media post, o isang hindi opisyal na source, malaki ang posibilidad na ito ay maling impormasyon.

Maghanap ng mga opisyal na pahayag mula sa mga respetadong media outlets at gobyerno upang tiyakin ang kredibilidad ng balita. 

Pangalawa, i-verify ang mga detalye. Karaniwan sa fake news ang paggamit ng mga eksaheradong pahayag, mga hindi kumpletong detalye, o mga maling larawan upang manipulahin ang reaksyon ng mga tao. Siguraduhin na ang impormasyon ay may kasamang sapat na ebidensya at mula sa mga pinagkakatiwalaang source. 

Pangatlo, iwasan ang pagpapakalat ng ‘di tiyak na impormasyon. Laging tandaan na kapag tayo ay nagbahagi ng balita, tayo ay nagiging parte ng pagpapalaganap ng impormasyon. 

Sana ay maging responsable tayo sa pagbabahagi ng impormasyon sa online, at kung may duda, mas mabuting huwag na lang itong ipakalat hangga’t hindi ito nasusuri nang mabuti. 

Ang ating bansa ay nangangailangan ng matalinong mamamayan na hindi basta-basta tumatanggap ng impormasyon, kundi nagsusuri at kumikilos upang protektahan ang katotohanan.