Botante, ‘wag pabudol sa halalan maging wais

by Info @Editorial | Mar. 19, 2025

Tuwing halalan, ang ating bansa ay nababalot ng kaliwa't kanang isyu sa pulitika na tumatalakay sa iba't ibang aspeto ng pamumuhay ng mamamayan. 

Ang mga isyung ito ay karaniwang nagsisilbing pangunahing tema sa mga kampanya ng mga kandidato. Mula sa mga isyu ng kahirapan, edukasyon, kalusugan, at pambansang seguridad, hanggang sa mga personal na atake, disinformation at mga akusasyon ng katiwalian. 

Kaya ang mga botante ay nahaharap sa isang mahirap na desisyon kung sino ang karapat-dapat na mamuno sa ating bansa. 

Sa kabila ng lahat ng ito, ang publiko, bilang mga botante, ay may tungkuling maging mas wais at mapanuri sa pagpili ng mga lider na iluluklok sa gobyerno. 

Dapat nating tandaan na ang isang masusing pagsusuri sa bawat kandidato, sa kanilang mga plataporma, track record, at kredibilidad, ay higit na mahalaga kaysa sa mga emosyonal na reaksyon o sandali ng kasikatan na kadalasang nakakapag-impluwensya sa ating desisyon.

Marami sa ating mga kababayan ang madaling matukso sa mga pahayag at pangako ng mga kandidato, lalo na kung ito ay may kasamang mga dramatikong anunsyo o magagandang pangako na tila mabilis matupad. 

Sa halip na maging biktima o mabudol ng mga taktika ng mga pulitiko, ang publiko ay dapat magpakita ng mas mataas na antas ng pananagutan sa pagboto. 

Magsikap tayo na maging mapanuri, huwag basta magpadala sa mga emosyon at propaganda, at piliin ang mga lider na tunay na may malasakit at kakayahang maglingkod para sa ikabubuti ng nakararami.

Mga Pinoy na ginagawang scammer abroad, saklolohan

by Info @Editorial | Mar. 18, 2025

Ang mga Pilipino ay kilala sa buong mundo hindi lamang sa sipag at dedikasyon sa trabaho kundi pati na rin sa pagiging matulungin at mapagkakatiwalaan. 

Gayunman, isang nakakabahalang isyu ang kasalukuyang lumalaganap na nagdudulot ng masamang imahe sa ating mga kababayan sa ibang bansa, ito ang pagkakasangkot ng mga Pilipino sa mga call center scam hub.

Tulad sa Cambodia, dumarami ang mga Pilipinong nagiging biktima o sangkot sa ilegal na operasyon. 

Ang mga call center scam hub ay isang uri ng ilegal na negosyo kung saan ang mga tauhan, kabilang na ang mga Pinoy, ay gumagamit ng pekeng pagkakakilanlan, maling impormasyon, at mga pangako ng malaking kita upang mang-scam ng mga tao. 

Sa mga operasyon na ito, inaakit nila ang mga biktima na mag-invest sa mga pekeng online businesses o makilahok sa mga fraudulent financial schemes. 

Maraming mga kababayan natin ang napapasok sa ganitong sitwasyon nang hindi alam ang buong saklaw ng kanilang gagawin, at sa kalaunan ay nagiging bahagi na sila ng krimen.

Dapat ay magsanib-puwersa ang mga embahada, ahensya ng gobyerno at mga organisasyon upang masugpo ang ganitong mga operasyon at maprotektahan ang mga Pilipino laban sa mga mapanlinlang na gawain. Pangunahing hakbang ay ang pagpapalawak ng mga kampanya ng impormasyon at edukasyon sa mga nais magtrabaho abroad. 

Ang proteksyon at edukasyon ng bawat overseas Filipino worker (OFW) ay isang hakbang tungo sa mas ligtas at mas makatarungang mundo para sa ating mga kababayan.

Bentahan ng droga, palala nang palala

by Info @Editorial | Mar. 17, 2025

Ang tila walang kahirap-hirap na pagbebenta ng droga ay isang malupit na reyalidad na patuloy na nagpapahirap sa ating lipunan. 

Kamakailan, apat na suspek ang arestado kaugnay sa pagtutulak ng drugs gamit ang courier services. Ang diskarte, ang droga ay nasa parcel, idedeliber ng na-book na rider na para lang nagpapadala ng simpleng produkto sa buyer.

Madalas, ang mga ito ay nakararating sa mga kabataan. 

May mga lugar din na tila normal na lang ang presensya ng mga tulak. 

Ang pagbebenta ng droga ay parang isang tahimik na salot na kumakalat, na hindi lamang nagiging sanhi ng pagkawasak ng buhay ng biktima kundi pati na rin ng komunidad. 

Ang mga batang gumagamit ng droga ay nawawalan ng mga pangarap at nagiging biktima ng isang paikut-ikot na siklo ng pagkatalo. 

Habang ang mga sindikatong bumubuo ng mga network ng pagbebenta ng droga ay patuloy na kumikita, ang mga komunidad ay nananatiling biktima ng ganitong aktibidad. 

Kailangan ang isang mas matibay na hakbang upang sugpuin ang walang kahirap-hirap na pagbebenta ng droga. Dapat na mapatawan ng mas mabigat na parusa ang mga sangkot dito.

Mahalaga rin na mas mapalawak ang edukasyon at kaalaman tungkol sa mga epekto ng droga sa katawan at buhay ng tao.

Dapat ding palakasin ang mga programang pangkabuhayan at pagbibigay ng mga oportunidad upang makaiwas sa mga ganitong uri ng kalakaran. 

Hindi rin sapat ang mga simpleng operasyon ng pulisya, kailangan ng mas matinding koordinasyon ng mga ahensya ng gobyerno, pati na rin ng mga lokal na pamahalaan at mga organisasyon. 

Sa pamamagitan ng pagpapalakas ng mga programa laban sa droga, paglikha ng mga trabaho at pagbibigay ng tamang paggabay sa mga kabataan, maaaring matulungan silang makalayo sa mga masasamang bisyo.