Awat na sa pamumulitika, parating na naman ang mga bagyo

by Info @Editorial | May 30, 2026

Habang abala ang ilang pulitiko sa mga kontrobersiya, paparating na naman ang panahon ng tag-ulan na muling magdadala ng baha at panganib sa maraming komunidad. 

Sa halip na puro ingay ng pulitika, mas dapat pagtuunan ng pansin ang paghahanda para sa kaligtasan ng mamamayan.

Hindi kailangan ng taumbayan ng paulit-ulit na pangako at siraan. Ang kailangan ay maayos na drainage, malinis na estero, mabilis na rescue operation, at konkretong plano laban sa baha. 

Dito nasusukat ang tunay na serbisyo ng mga opisyal — hindi sa rami ng tarpaulin o lakas ng kampanya.

Sa panahon ng sakuna, hindi propaganda ang magliligtas sa tao kundi maagang aksyon at responsableng pamamahala. Kaya habang papalapit ang tag-ulan, huwag magpadala sa ingay ng pulitika. Mas mahalagang tingnan kung sino ang tunay na kumikilos para sa kapakanan ng mamamayan bago pa dumating ang baha at bagyo.

Panawagan din sa mga opisyal ng gobyerno partikular sa lokal, umpisahan na ang paghahanda bago pa humagupit ang mga bagyo. Huwag nang makisawsaw sa gulo ng pamumulitika. Ang kailangan ngayon ay pagkilos at katapatan sa serbisyo-publiko.

Pamumulitika sa Senado, mas ramdam kaysa serbisyo

by Info @Editorial | May 29, 2026

Marami ang nagtataka sa naging eksena sa Senado kamakailan.

Matatandaang nag-walkout ang mga miyembro ng Minority bloc dahil sa usapin ng online at electronic voting, kahit ilan sa kanila ay dati nang sumuporta sa konsepto ng remote participation. 

Naghain noon sina dating Senador Panfilo “Ping” Lacson at dating Senate President Franklin Drilon ng Proposed Senate Resolution No. 51. Layunin nitong payagan si dating Sen. Leila de Lima, na nasa detention noon, na makadalo sa plenary sessions sa pamamagitan ng teleconferencing. 

Ayon sa resolusyon, ang hindi pagkakaroon ng partisipasyon ng isang halal na senador ay nagkakait sa milyun-milyong Pilipino ng representasyon sa Senado. Binanggit din na nababawasan ang “collective wisdom” ng kapulungan kapag may hindi nakikilahok sa deliberasyon. 

Muli ring isinulong ang remote participation sa Proposed Senate Resolution No. 658 nina Drilon, Senators Risa Hontiveros, Kiko Pangilinan, at dating Sen. Ralph Recto. Mas pinalawak ito dahil sakop na rin ang committee hearings gamit ang online platforms at electronic communications. 

Sa madaling salita, dati ay malinaw ang posisyon nila na maaaring gamitin ang teknolohiya para matiyak ang tuluy-tuloy na representasyon kahit may limitasyon o extraordinary circumstances. Kaya para sa ilan, lumalabas itong isyu ng inconsistency. Dagdag pa rito, pinuna rin ng iba ang pag-walkout imbes na direktang makipagdebate sa isyu.

Sa huli, ang higit na dapat manaig ay ang boses ng mamamayan. Pakinggang mabuti ang bawat hinaing at gawan ng aksyon bilang mga pinagkakatiwalaang lingkod ng bayan.  

Kongreso, nilamon ng drama at pansariling interes

by Info @Editorial | May 28, 2026

Habang lumalala ang mga isyung pampulitika sa bansa—mga bangayan, bardagulan, batuhan ng akusasyon, at walang katapusang intriga—nawawala sa sentro ng atensyon ang tunay na dahilan kung bakit may Kongreso: ang paggawa ng batas.

Ang mga mambabatas ay hindi dapat nagiging pangunahing aktor sa drama ng pulitika. Kapag mas nauuna ang pansariling interes, alyansa, at bangayan kaysa sa paglikha ng solusyon sa mga problema ng bayan, ang talo ay ang mamamayan na umaasa sa konkretong aksyon.

Sa halip na ubusin ang oras sa mga pagtatalo na kadalasan ay nauuwi lamang sa ingay at dibisyon, mas mahalagang ituon ang lakas sa pagbuo ng mga batas na tutugon sa kahirapan, korupsiyon, kakulangan sa serbisyo, at mabagal na pag-unlad. Ang mga problemang ito ay hindi nasosolb ng press conference o social media statement—kundi ng maayos, malinaw, at maipatutupad na lehislasyon.

Kung ang Kongreso ay nagiging entablado ng bangayan imbes na institusyon ng solusyon, nawawala ang tiwala ng publiko sa sistemang dapat sana’y kumakatawan sa kanila.

Ang kailangan ay mga senador at kongresista na babalik sa kanilang pangunahing mandato—ang gumawa ng batas na may saysay, may direksyon, at tunay na pakikinabangan ng sambayanan.