Doble-ingat sa 12 scams ngayong Christmas

by Info @Editorial | November 20, 2025

Doble-kayod na naman ang mga scammer, kaya dapat tripleng ingat naman ang publiko.Ayon sa Cybercrime Investigation and Coordinating Center (CICC), “peak season” ng scammers ang panahon ng Kapaskuhan dahil target ng mga ito ang mga namimili ng mga regalo online.

Kaya ang kadalasang istayl ng mga ito ay umiikot sa shopping at fake delivery scams, kung saan, gumagamit sila ng mga pekeng promo o text links para makapagnakaw ng pera at mga sensitibong impormasyon.

Samantala, ang tinutukoy umanong “12 Scams of Christmas” na dapat bantayan para maging “merry” ang darating na Pasko ay ang online shopping scam, fake delivery, call scam, task/job scam, investment scam, love scam, loan scam, impersonation scam, travel scam, charity scam, middleman scam at, online gambling scam.

Sa gitna ng kasiyahan ng Kapaskuhan, ang pagiging alerto at maingat ay mahalaga ring regalo para sa ating sarili at mga mahal sa buhay. 

Ang pag-iwas sa scam ay hindi lamang para sa sariling proteksyon, kundi bahagi rin ng pagiging responsableng mamamayan. 

Ipagdiwang natin ang Pasko nang may saya, kapayapaan, at higit sa lahat — kaligtasan.  

Laban kontra-korupsiyon, huwag bitiwan

by Info @Editorial | November 19, 2025

Paulit-ulit ang pangakong pagbabago, subalit pabigat nang pabigat pa rin ang pasanin ng taumbayan dahil sa korupsiyon. Ito ang ugat ng kahinaan ng ating gobyerno.

Sa bawat pisong ninanakaw, may pamilyang hindi nabigyan ng maayos na serbisyo-publiko.

Sa bawat opisyal na hindi napapanagot, batas ang nabababoy. Ito ang pinakamapanganib — kapag ang kultura ng pagsasantabi at pagwawalambahala ay nagiging normal na.Ang hamon ngayon ay manatiling mulat, mapanuri, at matatag. Ang laban kontra-korupsiyon ay hindi lamang responsibilidad ng mga nasa kapangyarihan; tungkulin din ito ng bawat mamamayan. 

Hindi madaling daan ang pagtindig laban sa mali. Marami ang matatakot, manghihina. Kung hahayaan natin itong manaig, tuluyang mamamayagpag ang korupsiyon at mas titindi ang kahirapan.

Maunawaan sana natin na ang tunay na pagbabago ay bunga ng patuloy at sabayang pagkilos. Hindi ito matatapos sa isang administrasyon, isang iskandalo, o isang imbestigasyon. Ito ay pangmatagalang pakikibaka para sa mas maayos, mas makatarungan, at mas maunlad na Pilipinas.

Ang laban kontra-korupsiyon ay laban para sa kinabukasan. At ito’y laban na hindi dapat bitawan.

Dagdag-pasahe, tiyaking sinuri nang mabuti

by Info @Editorial | November 18, 2025

Hindi maikakaila ang hirap na kinakaharap ng sektor ng transportasyon.

Halos non-stop ang pagtaas ng presyo ng langis, maintenance at operating costs, toll fees, at mga isyu tulad ng route overlaps, colorum vehicles, at kompetisyon.

Kaugnay nito, una nang inanunsyo ng Land Transportation Franchising and Regulatory Board (LTFRB) ang kanilang paghahain ng rekomendasyon sa Department of Transportation (DOTr) para sa hirit na dagdag-pasahe sa Public Utility Vehicles (PUVs).

Nakabatay umano ang rekomendasyon sa masusing pagsusuri ng datos, socio-economic impacts, at mga suhestiyong inilatag ng mga transport group at operator sa isinagawang public consultation.

Samantala, sa kabilang panig ay naroon naman ang milyun-milyong pasahero — mga estudyante, manggagawa, at iba pa na namamasahe araw-araw. Para sa kanila, ang kahit pisong dagdag ay hindi basta maliit na halaga. Sa panahon ng taas-presyo ng bilihin at bumibigay na ekonomiya, ang anumang dagdag ay may domino effect sa pang-araw-araw na gastusin.

Kaya’t mahalaga ang papel ng LTFRB at DOTr. Ang kanilang desisyon ay hindi dapat nakabatay lamang sa hinaing ng isang sektor, kundi sa kabuuang larawan ng ekonomiya at kapakanan ng publiko.