Mga biktima ng bagyo, saklolohan agad

by Info @Editorial | September 26, 2025

Muling sinalanta ng bagyo ang ilang bahagi ng bansa. 

Sa pananalasa ng Bagyong Nando at Opong, libu-libo ang naapektuhan — binaha, nawalan ng tahanan, kabuhayan at ngayo’y pansamantalang nasa mga evacuation center.

Ang mga biktima ay posibleng makaranas ng gutom, pagod, at hindi alam kung kailan sila matutulungan. Kaya hindi ito panahon ng pag-aalangan.

Dapat malinaw ang utos sa bawat ahensya: kumilos agad. Siguruhin ang pagkain, tubig, gamot, at matutuluyan ng mga apektado. Bigyang atensyon ang mga bata, buntis, senior citizen, at may sakit.

At para sa kinauukulan, hindi sapat ang pagbisita sa lugar o pagkuha ng litrato. Ang kailangan ng mamamayan ay tunay na serbisyo.

Palpak na DPWH projects sa Bulacan, suriin

by Info @Editorial | September 25, 2025

Sa nagpapatuloy na imbestigasyon sa flood control scandal, inamin mismo ni dating DPWH Engr. Brice Hernandez na lahat ng kanilang proyekto sa unang distrito ng Bulacan mula 2019 ay palpak. 

Hindi lang isa, hindi lang ilan — lahat. Substandard, walang kalidad at ang mas masahol, may sistematikong “profit-sharing” umano sa pagitan ng ilang opisyal at kontratista.

Hindi na ito tsismis. Isa itong pag-amin mula sa loob mismo ng ahensya.

Nangangahulugan ito na ang kaligtasan ng mga tao ang nakompromiso. Isipin natin ang mga eskwelahan, ospital at tulay na ginawa nila. Mga proyektong pinondohan pero hindi nagamit nang tama. Taumbayan ang talo at delikado ang buhay.

Talagang may sindikato sa loob ng gobyerno.

May organisadong nakawan sa pondo ng bayan. 

Ilang dekada nang ganito ang kalakaran. Pero kung mismong nasa loob na ang umaamin, wala nang dahilan para hindi kumilos ang gobyerno. Ipakulong na ang mga sangkot, at magkaroon na ng reporma sa sistema ng mga ahensya.

Hindi sapat ang pagbibitiw. Hindi sapat ang pag-amin. Nais ng taumbayan ng katarungan.

Mga menor-de-edad, ‘wag hayaang nagagamit sa karahasan

by Info @Editorial | September 24, 2025

Nahuli ang 89 na menor-de-edad na nanggulo sa gitna ng rally kontra-korupsiyon. Imbes na makisigaw laban sa katiwalian, nang-alaska, nanira ng mga gamit, nanakit, at ayon sa ulat, may ilan pang sangkot sa pagnanakaw. 

Tanong ng marami, bakit sila nandoon, at nasaan ang kanilang mga magulang?Hindi normal na makita ang ganito karaming menor-de-edad sa lansangan, walang direksyon, habang ang iba ay seryosong nakikibaka para sa kinabukasan. 

Nakakabahala na tila ginagamit o pinababayaan lang ang mga bata sa ganitong uri ng kaguluhan.Bagama’t may pananagutan ang mga magulang, huwag ding kalimutan na ang gobyerno at lipunan ay may malaking papel sa paghubog sa kanila. Kung ang lider ay kurakot, ang sistema ay bulok, at ang kabataan ay gutom at walang oportunidad, saan pa sila pupulutin?Hindi sapat na hulihin lang sila at pauwiin. Dapat may malinaw

na plano para sa gabay, edukasyon, at disiplina.

Kailangang papanagutin ang mga nasa likod ng gulo, lalo na kung may nanlinlang o gumamit sa mga bata para sa sariling interes.