Party drugs, pigilan sa pagkalat

by Info @Editorial | October 2, 2025

Isang resort ang sinalakay kamakailan. Halos 30 ang naaresto, at may mga party drugs na nasamsam. 

Isa na namang insidente na nagpapakitang ang droga ay hindi na lamang problema ng lansangan — kundi ng mga lugar na dapat ay para sa pahinga at ligtas na kasiyahan.

Ang masaklap? Parang normal na lang ito, marahil dahil walang sapat na pananagutan. Kadalasan, ang nahuhuli ay ang maliliit. Pero ang mga tunay na utak, organizers at suppliers ay nananatiling ligtas.Hindi sapat ang operasyon kung walang follow-up.

Kailangan ng malalimang imbestigasyon, monitoring, at matinding pananagutan sa lahat ng sangkot.At para sa kabataan: huwag gawing uso ang kapahamakan. Walang “saya” sa party drugs.

May ending ito — at hindi iyon masaya.Kung patuloy na ino-normalize ang ganitong pangyayari, tayo rin ang talo. Panahon na para maging seryoso. 

Ang droga, kahit saan mo ilagay, sa resort man o eskinita ay mananatiling panganib.

2026 budget, busisiing maigi kontra-korupsiyon

by Info @Editorial | October 1, 2025

Kasalukuyang binubusisi sa Senado at Kamara ang panukalang P6.793 trilyong national budget para sa 2026. 

Dito pa lang, dapat nang maging malinaw: hindi ito ordinaryong usapin. Ito ang magtatakda kung saan mapupunta ang pera ng taumbayan.Sa dami ng isyu ng korupsiyon, hindi na puwedeng ipikit ng mga mambabatas ang kanilang mga mata. 

Kailangang suriing mabuti ang bawat item, bawat ahensya, at bawat sentimo.Hindi ito panahon ng palakasan o padulas. Panahon ito ng masusing pagtatanong at paninindigan. Kung may alokasyong hindi malinaw ang layunin o mukhang sobra-sobra, alisin. 

Kung may ahensyang paulit-ulit nang nasasangkot sa anomalya, bawasan ang pondo at imbestigahan.Huwag na sanang maulit ang mga dating pagkakamali — kung kailan aprubado na ang badyet, naibayad na’t lahat saka naman mabubunyag ang mga iregularidad. 

Matuto na sa kasaysayan. Huwag nang hayaang ang kaban ng bayan ay mapasakamay ng mga mapagsamantala.

Ang taumbayan ay naghihintay ng magandang resulta. Kung talagang para sa bayan ang pondo, dapat may pananagutan at malinaw ang direksyon.

Mas matibay na eskwelahan para may laban sa bagyo

by Info @Editorial | September 30, 2025

Hindi na bago sa Pilipinas ang pananalasa ng malalakas na bagyo.

Daan-daang paaralan ang nasisira — nawawasak ang mga silid-aralan, nalulusaw ang mga gamit, at nawawalan ng ligtas na lugar ang mga bata para matuto. Hindi sapat ang puro pangakong “aayusin agad” kung wala namang konkretong aksyon. 

Sa bawat araw na nade-delay ang pag-aayos ng mga nasirang eskwelahan, nawawalan ng oras sa pag-aaral ang mga bata. 

Hindi puwedeng ipagpaliban ang edukasyon.Dapat ay may mabilis at malinaw na plano ang gobyerno at mga lokal na opisyal para sa agarang rehabilitasyon ng mga paaralan. 

Ilaan agad ang pondo, iprayoridad ang mga lugar na matinding naapektuhan, at siguruhing may transparency sa paggamit ng pondo. Walang dapat mapunta sa bulsa ng mga korup.

Isa pa sa pinakamahalagang mapagtuunan ay ang paggawa ng mas matitibay na eskwelahan, ‘yung ‘di basta bumibigay sa bagyo. Utang na loob, tigilan na ang paggawa ng mga palpak na proyekto. Maawa kayo sa buhay ng mga bata na puwedeng malagay sa panganib.