Mapayapa at malinis na Undas

by Info @Editorial | November 2, 2025

Tuwing Undas, dagsa ang mga tao sa mga sementeryo upang alalahanin ang mga yumaong mahal sa buhay. 

Isa itong magandang tradisyon na nagpapakita ng ating pagmamahal, paggalang, at pagpapahalaga sa pamilya. 

Gayunman sa kabila ng diwang ito, kadalasan ay nag-iiwan tayo ng isang malungkot na tanawin pagkatapos ng paggunita — mga tambak ng basura sa loob at labas ng mga sementeryo.Ang kalinisan ay hindi lamang usapin ng kaayusan, kundi isang repleksyon ng ating disiplina at paggalang — hindi lamang sa mga patay kundi pati na rin sa mga buhay. 

Sa bawat kandilang tinatanggal, sa bawat plastik na bote o lalagyan ng pagkain na iniiwan, tayo ay nag-aambag sa polusyon at panganib sa kalusugan. Ang mga basurang ito ay maaaring pagmulan ng sakit, magbara sa mga kanal, at makasira sa kapaligiran.Kaya naman, dapat maging responsable ang bawat isa. 

Kailangang paigtingin ng mga lokal na pamahalaan at pamunuan ng sementeryo ang pagpapatupad ng mga patakaran sa kalinisan, maglagay ng sapat na basurahan, at magtalaga ng mga tauhang magpapanatili ng kaayusan.

Flood control projects, suriing mabuti para wala nang palpak

by Info @Editorial | November 1, 2025

Kung may ‘multo’ na kinatatakutan at kinamumuhian ngayon, ‘yan ay ang mga flood control project na kung hindi palpak ay ‘di naman nakikita pero nakamamatay.

Kaya tama ang hakbang ng Department of Public Works and Highways (DPWH) sa pagbuo ng Technical Working Group (TWG) na susuri sa mga flood control project bago pa man itayo. 

Layunin din ng TWG na maiwasan ang proyektong walang maayos na engineering plan.

Sa pamamagitan ng pagsusuri bago simulan ang proyekto, masisiguro na ang bawat gagawin ay makatutulong talaga sa mga residente at hindi basta-basta lang para magamit ang pondo. 

Isa rin itong paraan upang mapanatili ang transparency at pananagutan sa paggamit ng pera ng bayan.Gayunman, kailangang tiyakin ng ahensya na ang grupo ay tapat, mahusay, at walang pinapanigan. Dapat ding makilahok ang mga lokal na pamahalaan at mamamayan sa pagmo-monitor ng mga proyekto.Kung magiging maayos ang pagpapatupad nito, malaking tulong ito sa pag-iwas sa baha at sa pagsasaayos ng tiwala ng publiko. 

Sa tamang pagsusuri at tapat na pamumuno, masisiguro na ang bawat flood control project ay tunay na para sa tao, hindi para sa bulsa ng iilan.

Regular at mas mahigpit na random drug testing dapat sa mga PUV driver

by Info @Editorial | October 31, 2025

Maraming buhay ang nakasalalay sa bawat biyahe ng pampasaherong sasakyan. 

Kaya’t nararapat lamang na maging regular at mahigpit ang pagpapatupad ng random drug testing sa mga PUV driver. 

Hindi ito simpleng patakaran, kundi isang kinakailangang hakbang upang matiyak na ang mga nagmamaneho ay nasa maayos na kondisyon sa pag-iisip at katawan.Hindi na bago ang mga ulat ng aksidente na dulot ng mga drayber na gumagamit ng ilegal na droga. 

Ang paggamit ng drugs upang manatiling gising o alerto ay isang maling paraan na nagdudulot ng kapahamakan sa mga pasahero at sa ibang motorista. 

Kung may regular na random drug testing sa mga drayber, mababawasan ang tukso na gumamit ng bawal na gamot dahil alam nilang anumang oras ay maaari silang mahuli.Kaya dapat tiyakin ng mga ahensya ng gobyerno na ang mga pagsusuri ay ginagawa nang patas, mabilis, at may respeto sa karapatan ng mga tsuper. 

Ang layunin ay hindi upang parusahan, kundi upang mapanatili ang tiwala ng publiko at protektahan ang kanilang kaligtasan.

Sa dulo, malinaw ang mensahe, ang kaligtasan ng bawat pasahero ay nakasalalay sa disiplina ng drayber.