Gobyerno, magpakita ng konkretong aksyon sa epekto ng oil price hike

by Info @Editorial | March 28, 2026

Sa harap ng sunud-sunod na pagtaas ng presyo ng langis sa pandaigdigang merkado, hindi na nakakagulat ang kasunod na epekto nito sa ekonomiya ng bansa. 

Ang oil price hike ay hindi lamang usapin ng gasolina at diesel—ito ay may domino effect sa presyo ng mga pangunahing bilihin at serbisyo. 

Kaya naman, nararapat lamang na ang gobyerno ay maging mas maagap at handa sa pagharap sa ganitong sitwasyon.

Sa bawat pagtaas ng presyo ng langis, ang pinakamalaking tinatamaan ay ang karaniwang mamamayan—lalo na ang mga manggagawa at pamilyang may mababang kita. 

Hindi sapat ang panandaliang ayuda o subsidiya. Bagama't mahalaga ito bilang agarang tugon, kailangan ng mas pangmatagalang solusyon. Dapat pagtuunan ng pansin ng gobyerno ang pagpapalakas ng lokal na produksyon, pagpapabuti ng mass transportation system, at paghahanap ng alternatibong pinagkukunan ng enerhiya. Sa ganitong paraan, mababawasan ang pagdepende ng bansa sa imported na langis na ugat ng pabagu-bagong presyo.

Ang hamon ng oil price hike ay hindi bago—ngunit ang kahandaan ng gobyerno ang patuloy na sinusubok. Panahon na upang patunayan na kaya nitong pangunahan ang bansa sa gitna ng krisis, hindi lamang sa salita kundi sa konkretong aksyon na tunay na mararamdaman ng mamamayan.

Mga pulitikong sagkot sa vote-buying papanagutin

by Info @Editorial | Apr. 26, 2025

Sa bawat eleksyon, muling sumusulpot ang matagal nang suliranin ng vote-buying — isang lantad na anyo ng katiwalian na sumisira sa integridad ng demokrasya sa bansa. 

Sa kabila ng paulit-ulit na babala ng Commission on Elections (Comelec), tila nananatiling inutil ang mga kampanya laban dito, habang patuloy na ginagamit ng ilang kandidato ang salapi upang bilhin ang boto ng mamamayan.

Ngayong mas mulat na ang taumbayan, lalong tumitindi ang panawagan: panagutin ang lahat ng sangkot — hindi lamang ang mga mamimili, kundi lalo’t higit ang mga nagbibigay. Hindi sapat ang pagkumpiska ng perang ipinamimigay o ang pagkakaso sa ilang maliliit na tauhan. Kailangang maabot ang mga nasa itaas — ang mga opisyal at kandidatong ginagamit ang yaman para makakuha ng kapangyarihan.

Hamon ito sa Comelec, huwag manatili sa mga babala. Gumamit ng teknolohiya, paigtingin ang ugnayan sa mga law enforcement agencies, at higit sa lahat, gawing mas mabilis at tiyak ang pagpataw ng parusa. Dapat ipakita na ang batas ay gumagana.

Hindi matatapos ang vote-buying kung patuloy na magbubulag-bulagan ang mga institusyon sa halip na tuluyang panagutin ang mga tunay na nasa likod nito. 

Dagdag-trabaho, solusyon sa kahirapan

by Info @Editorial | Dec. 8, 2024

Ayon sa Philippine Statistics Authority (PSA), tumaas ang unemployment at underemployment rate nitong Oktubre. 

Kabilang umano sa dahilan ng pagtaas ng bilang ng mga walang trabaho ay ang magkakasunod na bagyong tumama sa bansa. 

Oktubre, nasa 3.9% ang jobless rate sa bansa na mas mataas sa 3.7% noong Setyembre. Katumbas ito ng 1.97 milyong Pinoy na walang trabaho. 

Ang underemployment rate naman, tumaas sa 12.6% noong Oktubre mula sa 11.9% noong Setyembre. Katumbas ito ng 6.08 milyong manggagawang Pinoy na underemployed. Mataas ito nang bahagya kumpara sa 5.94 milyong underemployed noong Setyembre. 

Ang paglobo ng mga walang trabaho ay isang patunay na may mga kailangang baguhin at pagtuunan sa ating sistema. 

Isa sa mga pangunahing dahilan ng mataas na unemployment rate ay ang kakulangan ng mga pagkakataon para sa mga manggagawa, lalo na sa mga kabataang naghahanap ng trabaho. 

Ang mismatch ng mga kasanayan at ang pangangailangan sa merkado ay isa ring hadlang sa paghahanap ng trabaho. 

Bukod dito, may mga sektor ng ekonomiya na patuloy na nalulugmok, tulad ng agrikultura at ilang bahagi ng industriya. Sa mga ganitong kalagayan, nawawala ang mga trabaho na dati ay umaasa ang maraming tao. 

Kailangang pagtuunan ng pansin ang pagpapalakas ng mga kasanayan ng mga manggagawa at pagbibigay ng makabagong edukasyon at pagsasanay. 

Dapat ding bigyan ng insentibo ang mga industriya na magbigay ng mga trabaho at magkaroon ng inclusive na pag-unlad, kung saan ang bawat sektor ay may pagkakataong umangat.