Mabisang gamot para sa kirot at pamamanhid ng mga Diabetic

ni Dr. / Atty. Erwin P. Erfe, M.D. - @Sabi ni Doc | January 20, 2022

Dear Doc Erwin,

Ako ay matagal na ninyong tagasubaybay. Ako ay 35 years old, may Type 2 diabetes at kasalukuyang umiinom ng mga gamot na prescribed ng aking doktor. Isa sa mga gamot na aking iniinom ay ang Alpha Lipoic Acid. Ano ba ito at makatutulong ba ito sa aking diabetes?

Para sa inyong kaalaman, madalas akong makaramdam ng pamamanhid at minsan ay kirot sa aking paa. Bukod sa tumataas ang aking blood sugar, mataas din ang aking lipid profile. – Rommel

Sagot

Maraming salamat Rommel sa iyong pagliham sa Sabi ni Doc at sa pagsubabay sa ating health column.

Ang Alpha Lipoic Acid o ALA ay antioxidant na kilala rin sa tawag na Acetate Replacing Factor. Ito ay isang uri ng fatty acid na ginagawa ng ating katawan at makikita rin sa ating mga pagkain, tulad broccoli, spinach at patatas. Makikita rin ito sa mga karneng laman-loob. May mga herbal health supplements din na naglalaman ng Alpha Lipoic Acid.

Ang Alpha Lipoic Acid, ayon sa Health Encyclopedia ng University of Rochester Medical Center ay ginagamit upang gamutin ang tinatawag na diabetic neuropathy.

Ang diabetic neuropathy ay sakit dahil sa nerve damage na nakikita sa mga taong may diabetes.

Ang kadalasang sintomas nito ay pamamanhid, kirot, cramps o ulcer at infection sa mga paa.

Ang nabanggit mo sa iyong liham na pamamanhid at kirot sa iyong mga paa ay maaaring sintomas na ng diabetic neuropathy. Ito marahil ang dahilan kung bakit ikaw ay pinaiinom ng iyong doktor ng Alpha Lipoic Acid.

Tingnan natin ang mga scientific studies sa Alpha Lipoic Acid at epekto nito sa diabetic neuropathy. Ayon sa isang review study na inilathala noong 2014 sa scientific journal na Expert Opinion in Pharmacotherapy, ang Alpha Lipoic Acid ayon sa maraming clinical trials at meta analysis studies ay mabisa at safe na gamot sa diabetic neuropathy. Base sa pag-aaral, maaari itong gamitin sa mga diabetic na maagang nagpapakita ng mga sintomas ng diabetic neuropathy, kung saan malamang na makita agad ang clinical improvement.

Ayon dito, malaki ang maitutulong sa iyo ng Alpha Lipoic Acid dahil maagang nakita sa ‘yo ang mga senyales ng diabetic neuropathy at base sa pag-aaral sa mga tulad mo makikita ang mabilis na clinical improvement.

Ayon sa pag-aaral na nabanggit, maaari rin gamiting gamot ang Alpha Lipoic Acid sa mga indibidwal na may diabetic neuropathy na may iba pang sakit o co-morbidities, kung saan hindi maaaring gamitan ng ibang analgesics.

Sa meta-analysis study, kung saan ang resulta ay inilathala sa medical journal na Metabolism noong October 2018, nagkaroon ng systematic review ng mga randomized clinical trials tungkol sa epekto ng Alpha Lipoic Acid sa blood sugar level at lipid profile ng indibidwal na may metabolic diseases tulad ng diabetes. Ayon sa mga researchers, dahil sa pag-inom ng Alpha Lipoic Acid supplements ay bumaba ang blood sugar level, insulin level, insulin resistance at hemoglobin A1c, ng mga participants. Bumaba rin ang triglycerides at LDL cholesterol ng mga uminom ng Alpha Lipoic Acid.

Base sa pag-aaral na nabanggit at sa resulta na nakita sa iba’t ibang randomized clinical trials ay makatutulong sa iyong mataas na blood sugar level at lipid profile ang pag inom ng Alpha Lipoic Acid supplement.

May karagdagang tulong na maidudulot pa ang Alpha Lipoic Acid sa mga indibidwal na may Type 2 diabetes na tulad mo. Ayon sa 2013 study na nai-publish sa Journal of Neurodegenerative Diseases ang Alpha Lipoic Acid therapy ay mabisa at nakapagpapabagal ng cognitive decline sa indibidwal na diabetic na may Alzheimer’s Disease at Insulin Resistance.

---

Maraming Salamat sa inyong pagliham sa Sabi ni Doc at nawa’y magpatuloy sa pagbuti ang inyong kalusugan. Kung may mga katanungan pa, mag-email lamang sa Sabi ni Doc sa e-mail address na erwin.erfe@gmail.com o sa doc.bulgar@gmail.com

ALAMIN: Hanggang anong edad posibleng mabuhay ang tao?

ni Dr. / Atty. Erwin P. Erfe, M.D. - @Sabi ni Doc | January 18, 2022

Dear Doc Erwin,

Regular akong nagbabasa ng BULGAR at ng inyong column na Sabi ni Doc. Sa nakaraang dalawang artikulo, nagbigay kayo ng mga makabagong research tungkol sa ageing, longevity at age-related diseases – kung paano mapahahaba ang buhay at ang edad na tayo ay malusog ang pangangatawan, gayundin kung paano makaiiwas na magkaroon ng mga sakit na kadalasan ay mayroon ang matatanda, tulad ng Alzheimer’s Disease at cancer?

Nais ko sanang magtanong kung ano ang opinyon ng mga scientists sa ageing o pagtanda tungkol sa life expectancy sa ating hinaharap, ayon sa kanilang research studies?

Hanggang anong edad posible mabuhay ang tao? - Aurelio

Sagot

Sa nakaraang dalawang artikulo ay napag-usapan natin ang mga Longevity genes at ang mga anti-ageing proteins. Inihayag din nating may mga longevity activators na maaari nating gawin o inumin upang muling mapasigla ang longevity genes at anti-ageing proteins na Sirtuins.

Nabanggit din natin, na ayon sa mga scientists na dalubhasa sa ageing at longevity na sa pamamagitan ng iba’t ibang paraan na nabanggit natin sa mga nakaraang artikulo ay maaaring maiwasan o ma-delay ang magkaroon ng mga sakit na karaniwang nagkakaroon ang mga may edad, tulad ng dementia, cancer at metabolic diseases, tulad ng diabetes.

Sa librong Lifespan, sinabi ni Dr. David Sinclair ng Harvard University, isa sa mga nangungunang scientists sa pag-aaral ageing at longevity at kung paano mapahaba ang buhay ng tao, na kung magpapatuloy ang kasalukuyang medical at technological revolution, kalahati ng dami ng mga bata sa Japan ngayon ay mabubuhay ng mahigit pa sa 107 years old at sa Amerika ay aabot ng 104.

Ayon sa “conservative estimate” ni Dr. David Sinclair, ang magiging life expectancy ng tao sa ating hinaharap ay 113 years old. Ito ay itinuturing niyang conservative na estimate dahil kalauna’y pabilis nang pabilis ang pag-abante ng science of ageing at longevity, at kalauna’y tumataas nang tumataas ang life expectancy ng tao. Itinuturing ni Dr. Sinclair at ibang scientists na 120 years old ang potential na edad na kayang marating ng tao, ayon sa kasalukuyang estado ng science of ageing and longevity.

Ang katanungan sa isip ng maraming tao ay kung ano ang mangyayari sa mundo kung hahaba ang buhay ng tao hanggang sa edad na pinaniniwalaan ng mga scientists at sa kaakibat nitong pag-improve ng human health. Magkaroon kaya ng overpopulation?

Ayon kay Dr. David Sinclair, ang sago ni Bill Gates ay hindi. Sa estimate ng mga demographers ng United Nations, ang total global population ay magpa-plateau sa 11 bilyon sa 2100 at mula roon ay titigil na ang pagtaas ng populasyon ng mundo at ito ay bababa na.

Sana ay nasagot ng ating mga ipinahayag sa itaas ang iyong katanungan.

---

Maraming Salamat sa inyong pagliham sa Sabi ni Doc at nawa’y magpatuloy sa pagbuti ang inyong kalusugan. Kung may mga katanungan pa, mag-email lamang sa Sabi ni Doc sa e-mail address na erwin.erfe@gmail.com o sa doc.bulgar@gmail.com

‘Supervitamins’ at anti-aging proteins na pampahaba ng buhay

ni Dr. / Atty. Erwin P. Erfe, M.D. - @Sabi ni Doc | January 15, 2022

Dear Doc Erwin,

Nabasa ko ang inyong nakaraang artikulo tungkol sa Longevity genes at Sirtuins na tumutulong sa ating katawan upang humaba ang buhay.

May mga paraan ba upang maging aktibo ang Longevity genes at Sirtuins nang sa gayun ay mapahaba ang buhay at maiwasan ang mga karamdamang karaniwan na nararanasan sa pagtanda? – Cecilia

Sagot

Maraming salamat Cecilia sa iyong pagliham sa Sabi ni Doc. Ang iyong katanungan ay iuugnay sa kasalukuyan nating pinag-uusapan kung paano pinahahaba ng Longevity genes at anti-aging proteins o Sirtuins ang ating buhay.

Sa nakaraang artikulo ay nabanggit nating mayroong pitong Longevity genes ang tao at may kinalaman sila sa paggawa ng anti-aging proteins na Sirtuins na tumutulong sa mga cells ng ating katawan upang maka-survive laban sa mga ‘threats’ o ‘metabolic stress’, tulad ng sobrang lamig o init ng kapaligiran, kakulangan ng pagkain at imminent danger.

Dahil sa kakayahan ng mga ‘stressors’ na nabanggit na ma-activate ang Longevity genes at ma-produce ang mga anti-aging proteins na Sirtuins sila ay tinawag na mga ‘longevity activators’.

Ayon sa mga pag-aaral, ang ‘dietary o calorie restriction’ ay mabisang paraan upang humaba ang buhay. Isang halimbawa ay ang tinatawag na intermittent fasting, kung saan kumakain lamang isa o dalawang beses sa isang araw.

Sa mga ‘blue zone’ areas, tulad ng Okinawa sa Japan, Sardinia, Italy, sa Nicoya, Costa Rica, sa Ikaria, Greece at sa Loma Linda, California ay makikita ang mga ‘super centenarians’ – mga tao na mahahaba ang buhay. Isa sa mga itinuturing na dahilan ng mahaba nilang buhay ay ang calorie restriction o pagbawas sa calories o dami ng kinakain. Tandaan, hindi lamang ito ang dahilan ng kanilang mahabang buhay. Kasama sa nakitang mga kadahilanan ng kanilang mahabang buhay ang regular na paglalakad at pagkain ng “blue zone diet” o whole grains (rice o corn), gulay, sweet potatoes (kamote) at beans.

Bukod sa dietary or calorie restriction (tulad ng intermittent fasting), may dalawang paraan pa upang ma-activate natin ang Longevity genes at Sirtuins. Ito ay ang regular na pag-eehersisyo at exposure ng katawan sa matinding init o lamig. Ang regular walking o jogging exercise at occasional ‘hot bath’ o ‘cold bath’ ay nakaka-activate ng release ng Sirtuins.

Sa pag-aaral, nadiskubreng bukod sa mga nabanggit na mga longevity activators, may mga ‘molecules’ na maaaring mag-activate ng Sirtuins. Isa sa mga molecules ay ang Resveratrol, na nakita ng mga scientists sa ilang uri ng red wine at ang Nicotinamide Mononucleotide (NMN).

Ang NMN ay kino-convert ng katawan sa Nicotinamide Adenine Dinucleotide (NAD) na kinakailangan ng Sirtuins at mahigit na 500 enzymes sa ating katawan. Habang tayo ay tumatanda ay nababawasan ang level ng NAD sa ating katawan, dahilan upang humina ang activity ng mga Sirtuins. Ayon sa mga scientists, ito ang dahilan ng ating pagtanda at pagkakaroon ng mga age-related disease katulad ng cancer, diabetes at metabolic at neurodegenerative diseases.

Kaya iminungkahi ang pag-inom ng Resveratrol at NMN upang maging aktibo at panatilihing aktibo ang mga anti-aging proteins na Sirtuins at maiwasan o i-delay ang pagkakaroon ng iba’t ibang sakit na nabanggit. Tinagurian ng marami ang Resveratrol at NMN na ‘supervitamins’ dahil sa mahalagang function nito sa katawan.

---

Maraming Salamat sa inyong pagliham sa Sabi ni Doc at nawa’y magpatuloy sa pagbuti ang inyong kalusugan. Kung may mga katanungan pa, mag-email lamang sa Sabi ni Doc sa e-mail address na erwin.erfe@gmail.com o sa doc.bulgar@gmail.com