Mga mabuting benefits ng keto or low-carb diet

ni Dr. / Atty. Erwin P. Erfe, M.D. @Sabi ni Doc | June 26, 2023

Doc Erwin,

Ilang taon na po akong masugid na tagasubaybay ng diyaryong Bulgar at ng kolumn ng Sabi ni Doc. Ako ay 54 years old at may limang taon na ring na-diagnose na maysakit na diabetes at hypertension. Ayon sa resulta ng aking mga laboratory exams, madalas ay mataas din ang aking cholesterol at triglyceride. Ako ay umiinom ng mga gamot upang bumaba ang blood sugar, blood pressure at ang cholesterol.

Dahil sa patuloy na pagtaas ng presyo ng mga gamot at sa aking pagnanais na maihinto na ang pag-inom ng mga gamot ay humingi ako ng payo sa isang nutritionist kung ano ang nararapat na diet upang bumaba ang aking blood sugar, blood pressure, cholesterol at triglyceride. Ayon sa kanya, makakabuti ang low carbohydrate (“low-carb” or “keto”) diet. Nais kong malaman kung ano po ang low-carb diet at kung ang kanyang payo ay makakatulong para bumaba aking blood pressure at maisaayos ang aking lipid profile. -Ben Santos

Maraming salamat po sa inyong pagliham sa Sabi ni Doc at pagtangkilik sa Bulgar newspaper.

Ang ketogenic diet or mas kilala sa tawag na “keto” at “low-carb” diet ay isang pamamaraan na ginagamit ng mga doktor upang bumaba ang timbang at blood sugar level ng mga indibidwal na may obesity at may diabetes.

Ngunit sa mga makabagong scientific studies, mas marami pa ang nagagawa ng keto or low carbohydrate diet bukod sa pagpababa ng timbang at ng blood sugar level.

Sa pag-aaral ng mga siyentipiko na pinangunahan ni Dr. David Unwin, isang pangunahing mananaliksik sa United Kingdom, bumaba ang blood pressure, timbang, at lipid profile ng 154 na mga pasyente na may Type 2 diabetes o mga pasyente na mataas ang blood sugar level. Inilathala ang resulta ng pananaliksik na ito sa International Journal of Environmental Research and Public Health noong August 2019.

Kung susuriin natin ang resulta ng research na ito, makikita natin na bumaba ang systolic at diastolic blood pressure ng mga pasyente. Dahil dito naitigil din o naibaba ang dose ng mga anti-hypertensive medications (gamot sa high blood pressure) na iniinom ng mga pasyente.

Bukod sa epekto ng keto or low-carb diet sa high blood pressure, ay nagkaroon din ng significant improvement sa lipid profile ng mga study participants. Napapababa ng low carbohydrate diet ang cholesterol at triglyceride levels ng mga pasyente. Ang serum triglyceride level ng mga pasyente ay napapababa ng mahigit sa 30 porsyento. Isa itong halimbawa na ang pagbabago sa ating mga kinakain ay malaki ang epekto sa ating kalusugan.

Dahil na rin sa maraming nakaraang mga pananaliksik tungkol sa epekto ng low carbohydrate diet sa timbang ay inasahan na ng mga researchers ang pagbaba ng timbang ng mga study participants.

Bumaba ang timbang ng mga pasyente mula 5 hanggang 13 kilos o average na 9.5 kilos. Ang pagbaba ng timbang ay maaring isa sa mga dahilan ng pagbaba ng blood pressure.

Sa pag-aaral ng grupo ng mga manaliksik mula sa University of Antwerp sa Belgium na pinangunahan ni Dr. Mertens, nakitaan ng pagbaba ng blood pressure ang mga indibidwal na bumaba ang timbang mula 5 hanggang 10 porsyento.

Maaari ring maitigil ang pag-inom ng gamot sa high blood pressure kung maibababa ang timbang. Inilathala ang resulta ng pag-aaral ni Dr. Martens sa scientific journal na Obesity Research noong May 2000.

Kung pagbabasehan natin ang resulta ng mga scientific studies na ito ay maaaring makatulong ang low carbohydrate (low-carb) or ketogenic (keto) diet upang maitigil mo (o maibaba ang dose) ang pag-inom ng mga gamot sa high blood pressure, high blood sugar, cholesterol at triglyceride.

Makabubuti na isangguni sa inyong doktor ang planong ito upang mapangalagaan ang inyong kalusugan.

Maraming Salamat sa inyong patuloy na pagsubaybay sa Sabi ni Doc at nawa’y magpatuloy sa pagbuti ang inyong kalusugan.

---

Maraming Salamat sa inyong pagliham sa Sabi ni Doc at nawa’y magpatuloy sa pagbuti ang inyong kalusugan. Kung may mga katanungan pa, mag-email lamang sa Sabi ni Doc sa e-mail address na erwin.erfe@gmail.com o sa doc.bulgar@gmail.com

Naturopathic na gamot sa sakit ng ulo o migraine

ni Dr. / Atty. Erwin P. Erfe, M.D. @Sabi ni Doc | February 6, 2023

Sa nakaraang dalawang artikulo ng Sabi ni Doc, tinalakay natin ang Naturopathic Medicine at ang iba’t ibang uri ng pamamaraan na ginagamit ng mga Naturopathic doctors sa paggamot ng hypertension o high blood pressure.

Habang tinatalakay natin kung paano ginagamot ng mga naturopathic physicians ang high blood pressure, nakatanggap ang Sabi ni Doc ng e-mail kay Laura, isang masugid na tagasubaybay ng ating kolum.

Nais malaman ni Laura kung may natural na paraan upang magamot ang kanyang migraine o kung paano makakaiwas dito. Gayundin, kung may pamamaraan ba ang mga naturopathic practitioners laban sa migraine? Ayon kay Laura, ang kanyang migraine ay nagaganap tuwing mayroon siyang menstruation. Bagama’t may iniinom siyang mga gamot sa migraine na inireseta ng kanyang doktor, nais niyang pag-aralan ang mga natural na paraan upang maiwasan ang pag-atake ng migraine.

Ayon sa isang pag-aaral, kung saan ang resulta nito ay inilathala noong 1989 sa scientific journal na ang headache ay nakita ng mga researchers na mababa ang level ng magnesium sa utak ng mga individual na may migraine. Ganito rin ang resulta ng isa pang pag-aaral noong 2001 sa mga indibidwal na may migraine at cluster headaches.

Noong 2002, isang artikulo sa neurology medical journal ang nagpakita rin na mababa ang level ng magnesium sa utak ng mga may severe migraine na may kasamang neurological symptoms.

Dahil sa resulta ng mga nabanggit na pananaliksik, nagkaroon ng mga double-blind placebo-controlled study, kung saan pinag-aralan nila ang epekto ng magnesium sa mga indibidwal na may migraine. Ayon sa mga researches na inilathala noong 1991, 1996, 2002 at 2008, dahil sa pag-inom ng magnesium supplement ay nabawasan ang dalas ng pag-atake ng migraine at nabawasan din ang tindi ng sakit ng migraine.

Tandaan lamang na ang kadalasan na side effect ng pag-inom ng magnesium ay diarrhea o pagtatae. Maaari ring magkaroon ng mas matindi pang adverse effect tulad ng muscle weakness at hirap sa paghinga. Kinakailangan na sundin ang suggested dose ng manufacturer ng magnesium supplement at inumin ito ayon sa suggested dose ng manufacturer o ng inyong doktor.

Sa isang systematic review na isinagawa ng Southwestern Oklahoma State University na isinapubliko noong August 2017 sa Journal of Clinical Pharmacy and Therapeutics, nakita sa limang clinical trials kung saan sinaliksik ang epekto ng Vitamin B2 o Riboflavin bilang prophylaxis laban sa migraine na epektibo ang pag-inom ng Vitamin B2 o Riboflavin supplement upang mabawasan ang dalas ng pag-atake ng migraine.

Sa isang pag-aaral na isinagawa sa Humboldt University sa Berlin, Germany, nabawasan ang dalas, tagal at tindi ng sakit ng migraine headache ng mga research participants matapos uminom ng 400 milligrams of Vitamin B2 o Riboflavin araw-araw sa loob ng tatlo hanggang anim na buwan. Nabawasan din ang dalas ng pag-inom ng mga gamot laban sa migraine dahil sa pag-inom ng Vitamin B2 supplements. Ang resulta ng research na ito ay inilathala sa European Journal of Neurology noong July 2004.

Ang isa pang supplement na ginagamit ng mga naturopathic physicians ay ang ubiquinone o Coenzyme Q10 (CoQ10). Ang CoQ10 ay natural substance na ginagamit ng mga cells sa ating katawan upang gumawa ng enerhiya para gamitin nito.

Sa isang open label controlled trial study, kung saan sinaliksik ang effectiveness ng CoQ10 bilang prophylaxis sa migraine, ang pag-inom ng 100 milligrams ng Coenzyme Q10 supplement araw-araw ay nakabawas ng dalas (frequency) at tagal (duration) ng pag-atake ng migraine. Nabawasan din ang tindi (severity) ng sakit ng migraine.

Inilathala ang resulta ng pag-aaral na ito sa scientific journal na Acta Neurologica Belgica noong March 2017.

Sana ay nasagot ng Sabi ni Doc ang mga katanungan ni Laura sa kanyang e-mail.

---

Maraming Salamat sa inyong pagliham sa Sabi ni Doc at nawa’y magpatuloy sa pagbuti ang inyong kalusugan. Kung may mga katanungan pa, mag-email lamang sa Sabi ni Doc sa e-mail address na erwin.erfe@gmail.com o sa doc.bulgar@gmail.com

Natural at alternatibong paraan laban sa high blood

ni Dr. / Atty. Erwin P. Erfe, M.D. @Sabi ni Doc | January 24, 2023

Sa nakaraang artikulo ng Sabi ni Doc ay tinalakay natin ang Naturopathic Medicine at ang iba’t ibang uri ng pamamaraan na ginagamit ng mga Naturopathic doctors sa paggamot ng hypertension o high blood pressure. Sa ating pangkaraniwang lenggwahe ang sakit ay tinatawag na “altapresyon”.

Dahil sa paniniwala ng Naturopathy na may kakayahan ang ating katawan na pagalingin ang sarili, gumagamit ang mga naturopathic doctors ng mga bagaybna galing sa kalikasan, tulad ng mga halaman upang pagalingin ang mga sakit.

Sa nakaraang artikulo ay tinalakay natin ang paggamit ng mga halamang gamot (herbal medicine) sa pagpapagaling ng altapresyon, tulad ng Hawthorn, Serpentina at bawang. Base sa maraming pag-aaral, epektibo ang mga ito upang mapababa ang systolic at diastolic blood pressure.

Bukod sa mga halamang gamot, gumagamit din ng mga nutrients, tulad ng amino acids, vitamins at minerals galing sa iba’t ibang uri ng pagkain ang mga naturopathic practitioners upang pababain ang blood pressure.

Isang halimbawa ay ang L-Arginine, isang uri ng amino acid na pinanggagalingan ng Nitric Oxide na nagpapa-relax ng ating mga ugat upang maluwag na dumaloy ang ating dugo. Ayon sa scientific article mula sa American Journal of Hypertension na inilathala noong May 2000, ang L-Arginine ay epektibong magpababa ng blood pressure sa may altapresyon at epektibo rin na mapanatiling mababa ang blood pressure sa indibidwal na normal ang blood pressure. Sa nabanggit na pag-aaral ang dose na 10 grams ng Arginine araw-araw ay nakitang epektibo, galing man ang Arginine sa pagkain o kaya ay bilang supplement.

Ang isa pang amino acid na epektibo na magpababa ng blood pressure ay ang Taurine. Sa randomized double-blind at placebo-controlled study na inilathala noong January 2016 sa scientific journal na Hypertension, ang pag-inom ng Taurine supplement sa dose na 1,600 milligrams araw-araw ay epektibo na magpababa ng blood pressure sa mga prehypertensive. Ayon sa scientific article sa World Journal of Cardiology inilathala noong February 2014, ang Taurine ay nagpapababa ng blood pressure, nagpapabagal ng bilis ng tibok ng puso at nakatutulong maging normal ang tibok ng puso. Ito ay isa ring diuretic (nagpapaihi) na makatutulong sa mga pasyenteng may congestive heart failure at nagpapaganda ng function ng blood vessels. Tumutulong din ang Taurine na mabawasan ang insulin resistance sa mga indibidwal na mataas ang blood sugar.

Ang isa pang nutrient na makatutulong magpababa ng mataas na blood pressure ay ang omega-3 fatty acids. Sa dose na 2 grams araw araw ay napatunayan ng nagpapababa ng blood pressure sa loob lamang ng anim na linggo.

Ang coenzyme Q10 (CoQ10) deficiency ay dahilan din ng pagtaas ng blood pressure kaya’t ang supplementation ng CoQ10 ay isang paraan ng mga Naturopathic practitioners upang gamutin ang altapresyon. Gayundin ang soluble fiber na makikita sa black beans, lima beans, broccoli, avocado at camote.

Dahil ang soluble fiber ay nagpapataas ng insulin sensitivity, lumalaban upang pababain ang sympathetic stimulation at nagsisilbing diuretic, nakatutulong ito na mapanatiling mababa ang blood pressure.

Sa pag-aaral ni Dr. Mark Houston ng Hypertension Institute sa Nashville, Tennessee, sa bansang Amerika na inilathala sa World Journal of Cardiology, ang pag-inom ng Vitamin C, 250 milligrams, dalawang beses sa isang araw at ang pagkain ng mayaman sa Magnesium o pag-inom ng Magnesium supplement sa dose na 500 hanggang 1,200 milligrams araw-araw ay epektibo na magpababa ng blood pressure. Maaari ring epektibo ang Vitamin B6 (Pyridoxine) dahil ayon sa pag-aaral nina Dr. Richard Keniston at Dr. John Enriquez, Sr. ng William Beaumont Army Medical Center sa El Paso, Texas, USA ay marami sa may high blood pressure ang may kakulangan sa Vitamin B6.

Tandaan lamang na maaaring magsama ang epekto ng mga nabanggit na natural supplements sa pagbaba ng blood pressure kaya’t makabubuti na ma-monitor ang iyong blood pressure habang umiinom ng isa o ilan man sa mga nabanggit ng nga natural supplements. Makatutulong din ang pagsangguni sa mga Naturopathic practitioners o doktor na may kaalaman sa naturopathic medicine.

---

Maraming Salamat sa inyong pagliham sa Sabi ni Doc at nawa’y magpatuloy sa pagbuti ang inyong kalusugan. Kung may mga katanungan pa, mag-email lamang sa Sabi ni Doc sa e-mail address na erwin.erfe@gmail.com o sa doc.bulgar@gmail.com