LPA sa Mindanao, ganap nang tropical depression – PAGASA

ni Lolet Abania | December 12, 2021

Ganap nang tropical depression ang namataang low pressure area (LPA) sa Mindanao kung saan papasok ito sa Philippine Area of Responsibility (PAR), habang posibleng maging bagyo sa mga susunod na araw, batay sa ulat ng PAGASA ngayong Linggo.

Sa latest bulletin ng PAGASA, bandang alas-10:00 ng umaga, ang tropical depression ay nasa layong 2,095 kilometro sa silangan ng Mindanao na nasa labas pa ng PAR.

May maximum sustained winds ito na aabot sa 45 kilometers per hour (kph) malapit sa gitna habang may pagbugso ito ng hanggang 55 kph.

“The tropical depression is forecast to gradually intensify and may reach tropical storm category within the next 24 hours,” ayon sa PAGASA.

Sinabi rin ng PAGASA na inaasahang papasok ang tropical depression sa bansa sa Martes na papangalanang “Odette” na posibleng tumama sa ilang lugar sa Visayas at Mindanao.

“By Wednesday evening or Thursday morning, the tropical cyclone will begin to move westward and may make landfall over the Eastern Visayas-Caraga area. Due to favorable environmental conditions, the tropical cyclone will likely continue to intensify and may reach typhoon category by Tuesday evening or Wednesday early morning,” pahayag ng ahensiya.

“Considering these developments, the public and disaster risk reduction and management offices concerned are advised to continue monitoring for updates related to this tropical cyclone,” sabi pa ng PAGASA.

Bagong produktong Coconut powdered drink, inilunsad ng DOST Davao Region

ni Jasmin Joy Evangelista | November 29, 2021

Inilunsad ng Food Processing Innovation Center - Davao (FPIC-Davao) ang “Bukolyte", isang instant (young) coconut powdered drink.

Ito ay isang alternatibo sa fruit juices sa mga pamilihan dahil wala itong artificial flavor at preservatives at taglay nito ang apat na electrolytes na potassium, sodium, calcium, at magnesium.

Ang produkto ay ginawa bilang "on-the-go" hydration dahil makakainom ka ng tubig ng niyog kahit saan at kahit kailan.

Ayon sa Department of Science and Technology, nabuo ang produktong ito sa pamamagitan ng spray-drying technology kung saan nagagawang powder ang liquid extract ng prutas pero napapanatili ang sustansya nito.

Inilunsad ang "Bukolyte" sa 2021 National Science and Technology Week noong Miyerkules sa isang mall sa Davao City kung saan ibinahagi na rin ang mga sample at ibinenta ang mga produkto sa publiko.

Hirit sa Senado... Paglikha ng vaccine institute, aprubahan na – DOST

ni Lolet Abania | October 31, 2021

Hinimok ng Department of Science and Technology (DOST) ang Senado hinggil sa pag-apruba nito sa panukalang paglikha ng isang virology at vaccine institute sa Pilipinas, kung saan makatutulong sa bansa sa paghahanda para sa isa pang posibleng krisis sa pangkalusugan.

Ayon kay DOST Secretary Fortunato dela Peña, mayroon na aniyang pondo sa initial research para sa vaccine institute nitong 2021 kahit na naka-pending pa ang nasabing panukalang batas.

“’Yan ay natutuwa ako kasi mabilis na inaksyunan sa House of Representatives, inaprubahan na nila. Ngayon ‘di pa nate-take up sa Senate.

Sana naman suportahan tayo. Pinapahalagahan ito,” ani Dela Peña sa isang radio interview ngayong Linggo.

Nitong Hulyo, inaprubahan na sa huling pagbasa sa mababang kapulungan ang measures tungkol sa paglikha ng Center for Disease Control at isang virology research institute sa Pilipinas.

Matatandaang sa huling State of the Nation Address (SONA), ipinanawagan naman ni Pangulong Rodrigo Duterte sa Kongreso na magpasa ng measures hinggil sa paglikha ng mga naturang entities na nakatuon sa tinatawag na emerging and re-emerging diseases.

Sa ngayon, sinabi ni Dela Peña na mayroon na silang isang Biosafety level 2 laboratory, kung saan nagsagawa na rin ng anim mula sa walong proyekto para sa vaccine institute.