Aksidente sa Skyway, pinaiimbestigahan ni Sen. Villanueva

ni Ronalyn Seminiano Reonico | November 21, 2020

Pagsasagawa ng imbestigasyon ng labor inspectors ng Department of Labor and Employment (DOLE) ang naging panawagan ni Senator Joel Villanueva matapos ang aksidente sa konstruksiyon ng Skyway project ngayong Sabado nang umaga kung saan isang steel girder ang bumagsak sa ilang sasakyan sa East Service Road, Barangay Cupang, Muntinlupa City na ikinasawi ng isa at 4 ang sugatan.

Saad ni Villanueva, “Isa po sa peligrosong lugar-paggawa ang mga construction site, kaya po mahigpit ang pagpapatupad ng mga safety measures upang siguraduhin na walang aksidente na mangyayari at bawasan ang mga risk factors dahil ito ay maaaring maging mapaminsala.”

Aniya pa, “Ang mga manggagawa po natin ang unang napapahamak tuwing may aksidente sa lugar-paggawa kaya mahigpit po ang pagpapatupad natin ng occupational safety and health standards (OSHS).

“Ang agarang imbestigasyon ng ating labor inspectors ay kinakailangan po upang matukoy ang sanhi at makapagbigay ng solusyon sa problema para siguraduhing hindi na mauulit ito.”

Sa ilalim ng OSHS Law o Republic Act No. 11058, nakasaad na kinakailangang magsagawa ng inspeksiyon ang DOLE sa mga workplaces upang masiguro ang kaligtasan ng mga manggagawa. Ang mga kumpanyang lalabag sa OSHS Law ay maaaring magmulta ng P100,000.

P1.8B, ayuda ng DOLE sa mga nasalanta ng bagyo

ni Thea Janica Teh | November 18, 2020

Naglaan ng P1.8 bilyon ang Department of Labor and Employment (DOLE) para sa mga manggagawang lubos na naapektuhan ng dumaang mga bagyo.

Sa inilabas na pahayag ng DOLE, naglaan umano ito ng P312 milyon para sa mga kuwalipikadong manggagawa sa ilalim ng COVID-19 Adjustment Measures Program (CAMP) at P307 milyon naman para sa mga informal sector workers sa ilalim ng Tulong Panghanapbuhay sa Ating Disadvantaged/Displaced Workers (TUPAD) sa Cagayan Valley.

Bukod pa rito, namahagi rin ang DOLE ng 100 fiberglass boots para sa mga mangingisda sa Cagayan province na nagkakahalaga ng P10 milyon. Naglaan din ng P14 milyon para sa 3,000 informal sector workers sa Calabarzon.

Tinatayang nasa P190 milyon naman ang inilaan para sa 34,000 apektadong manggagawa sa Mimaropa habang P500 milyon naman para sa 74,000 manggagawa sa Bicol.

Nasa P24 milyon ang inilaan para sa apektadong manggagawang kabilang sa pribadong sektor na ipinamahagi noong Martes.

Matatandaang hinagupit ng Bagyong Rolly, Quinta at Ulysses ang ilang parte ng Luzon kaya idineklara ang ilang lugar sa state of calamity.

Marikina, pabahay at trabaho ang kailangan — Mayor Teodoro

ni Ronalyn Seminiano Reonico | November 17, 2020

Ipinanawagan ni Marikina City Mayor Marcelino Teodoro sa national government na magsagawa ng rehabilitasyon sa Marikina Watershed matapos ang matinding pagbaha na dulot ng Bagyong Ulysses, gayundin ang pagpapatigil sa quarrying.

Pahayag ni Teodoro, “I think we should seriously look into this matter and laws should be properly implemented.

“Quarrying activities in the upstream area at the Marikina River should also be stopped at least at this point in time and be properly regulated.”

Aniya pa, “The utilization of funds should be diverted for mitigation and preparedness, not simply for relief and rehabilitation.”

Nais din ni Teodoro na magkaroon ng programa ang pamahalaan kaugnay ng epekto ng climate change.

Aniya, “We should address this issue now. Not rhetorically or mere pronouncement but there should be a statutory framework that would comply everybody to provide programs and activities to address the effects of climate change.”

Ang river system sa buong Luzon umano ang kailangang isailalim sa rehabilitasyon upang maiwasan ang matinding pagbaha.

Aniya, “Our call really is for an integrated approach. A whole of government approach so we could effectively collaborate and address the problems brought about by climate change.”

Samantala, humingi rin ng tulong si Teodoro para sa pag-ayos at pagtayo ng bahay ng mga naapektuhan ng Bagyong Ulysses.

Aniya, “Ngayon, nakikita na namin ang extent ng damage ng bagyo, we are now requesting for housing materials for those affected and if there will be some volunteers who would like to help, puwede siguro in house rebuilding.

"Ang iba naman totally, dahil light materials 'yung kanilang bahay, inanod at nasira, wala na silang bahay na babalikan."

Tinatayang aabot pa sa 3,880 pamilya ang nananatili sa mga evacuation centers matapos malubog sa putik ang kanilang mga bahay.

Trabaho rin para sa mga residente ng Marikina ang isa pa sa mga panawagan ni Teodoro.

Aniya, “Isang panawagan din namin sa mga employer, maliban doon sa mga itinutulong na mga relief goods, nakakatulong po 'yun sa ngayon, pero ang kailangan po ng aming mga kababayan ay trabaho.

“Ang Department of Labor and Employment (DOLE) ay nagbigay ng mga emergency employment, ‘yung mga cash-for-work ng Department of Social Welfare and Development (DSWD), pero ‘yung emergency employment na ‘yun ay para sa sampung araw lamang. Ang trabaho na gagawin ng employed under the program ay maglinis.”